தமிழகத்தில் பாஜகவை பலப்படுத்த வருகிறார் நரேந்திர மோடி!

By Mathi

Published: Tuesday, June 18, 2013, 9:23 [IST]

Subscribe to Oneindia Tamil

கிருஷ்ணகிரி: தமிழகத்தில் பாரதிய ஜனதாவை வலுப்படுத்த குஜராத் முதல்வர் நரேந்திரமோடி விரைவில் சுற்றுப்பயணம் மேற்கொள்வார் என்று அக்கட்சியின் அகில இந்திய பொதுச்செயலாளர் முரளிதரராவ் தெரிவித்துள்ளார்.

கிருஷ்ணகிரியில் பாரதிய ஜனதா கட்சியின் மாநில செயற்குழு கூட்டம் கடந்த 2 நாட்களாக நடைபெற்றது. அப்போது செய்தியாளர்களிடம் பேசிய முரளிதரராவ், கோவாவில் நடந்த கட்சியின் தேசிய செயற்குழு கூட்டத்தில் எடுத்த முடிவின்படி லோக்சபா தேர்தலை சந்திக்க கட்சி தயாராகி வருகிறது. காங்கிரஸ் கட்சி ஊழல் நிறைந்த கட்சியாக உருமாறிவிட்டது. தேசிய ஜனநாயக கூட்டணியை பலப்படுத்த குஜராத் முதல்வர் நரேந்திரமோடி நாடு முழுவதும் சுற்றுப்பயணம் மேற்கொள்கிறார். கட்சியை வலுப்படுத்த தமிழகம் முழுவதும் அவர் விரைவில் சுற்றுப் பயணம் மேற்கொள்ள உள்ளார்.

கோவையில் வரும் ஆகஸ்ட் மாதத்தில் இளைஞர்கள் எழுச்சி மாநாடு நடைபெற உள்ளது. பாரதிய ஜனதாவின் உணர்வை புரிந்து கொண்டவர்களும் நல்ல பிரதமர் தேவை என்பதை உணர்ந்தவர்களும் எங்கள் கூட்டணிக்கு வரலாம் என்றார் அவர்.

Published On June 18, 2013