அடங்காத அத்வானியின் குமுறல்.. கூட்டணிக் கட்சிகள் ரொம்பவும் முக்கியம் என்கிறார்!

டெல்லி: பாரதிய ஜனதா கட்சியின் தேசிய பிரசாரக் குழுத் தலைவராக குஜராத் முதல்வர் நரேந்திர மோடி நியமிக்கப்பட்டதால் அக்கட்சியின் மூத்த தலைவரான அத்வானிக்கு ஏற்பட்டிருக்கும் அதிருப்தி அவ்வளவு சீக்கிரம் ஓய்ந்துவிடாது போல... டெல்லியில் நேற்று நிகழ்ச்சி ஒன்றில் பேசிய அவர், பாரதிய ஜனதா கட்சிக்கு கூட்டணிக் கட்சிகள் மிகவும் அவசியம் என்று கூறியுள்ளார்.

பாஜகவின் தேசிய பிரசாரக் குழுத் தலைவராக மோடி நியமிக்கப்பட்டதால் அவரே அனேகமாக பாஜகவின் பிரதமர் வேட்பாளராக நியமிக்கப்படக் கூடிய நிலை உள்ளது. இதற்கு எதிர்ப்பு தெரிவித்துதான் அத்வானி தமது கட்சிப் பதவிகளை ராஜினாமா செய்தார். பின்னர் ஆர்.எஸ்.எஸ். தலையிட்டு சமாதானப்படுத்திவிட்டது. அதேபோல் மோடியின் நியமனத்துக்கு எதிர்ப்பு தெரிவித்து 17 ஆண்டுகால பாஜக கூட்டணியை முறித்துக் கொண்டுவிட்டது ஐக்கிய ஜனதா தளம்.!

இந்நிலையில் டெல்லியில் நேற்று நடைபெற்ற நிகழ்ச்ச்சி ஒன்றில் பேசிய அத்வானி, கட்சியின் நிறுவனர் சியாமா பிரசாத் முகர்ஜி கூட்டணிக் கட்சிகளைப் பற்றி வலியுறுத்தியிருக்கிறார். காங்கிரஸ் கட்சியைத் தோற்கடிக்க கூட்டணிக் கட்சிகள் அவசியமாகும் என்றார். பாரதிய ஜனதா கட்சியுடனான 17 ஆண்டுகால கூட்டணியை ஐக்கிய ஜனதா தளம் முறித்துக் கொண்ட நிலையில் அத்வானி இத்தகைய கருத்தை வெளியிட்டிருக்கிறார். இதன் மூலம் மோடியின் நியமனத்தை இன்னமும் தாம் ஏற்கவில்லை என்பதை மீண்டும் அத்வானி வெளிப்படுத்தி இருப்பதாகவே கருதப்படுகிறது.

English summary

Veteran L K Advani on Friday once again drew attention to fault lines in the BJP by invoking party founder Syama Prasad Mookerji to stress the relevance of coalitions in the wake of BJP's bitter break up with Janata Dal (U).