மோடி கடித விவகாரம்.. திமுக எம்பிக்கள் கையெழுத்து போலி.. உரிமை மீறல் தீர்மானம் கொண்டுவர திட்டம்!

டெல்லி: மோடிக்கு விசா தரக் கூடாது என்று அமெரிக்க அதிபருக்கு அனுப்பி வைக்கப்பட்ட கடித விவகாரம் தொடர்பாக பார்லிமென்ட்டில் உரிமை மீறல் தீர்மானம் கொண்டுவர திமுக எம்.பிக்கள் திட்டமிட்டுள்ளதாக தெரிகிறது.

குஜராத் கலவரத்தைத் தொடர்ந்து அம்மாநில முதல்வர் நரேந்திர மோடிக்கு அமெரிக்கா விசா மறுத்து வருகிறது. மோடிக்கு விசா வழங்கவே கூடாது என்பதை வலியுறுத்தி கடந்த ஆண்டு திமுக, காங்கிரஸ் உள்ளிட்ட 12 கட்சிகளின் 65 எம்.பிக்கள் அமெரிக்க அதிபர் ஒபாமாவுக்கு கடிதம் அனுப்பி வைத்தனர்.

இதன் பின்னர் அண்மையில் அமெரிக்கா சென்ற பாஜக தலைவர் ராஜ்நாத் சிங்கும் மோடிக்கு விசா பெற்றுவிடுவதில் மும்முரம் காட்டினார். இதனால் மீண்டும் கடந்த ஆண்டு அனுப்பி வைக்கப்பட்ட அதே கடிதம் அமெரிக்க அதிபருக்கு அனுப்பி வைக்கப்பட்டது.

ஆனால் இந்த கடிதத்தில் இடம்பெற்றுள்ள தங்களது கையெழுத்துகள் மோசடியாக பயன்படுத்தப்பட்டுள்ளன என்று மார்க்சிஸ்ட் மூத்த தலைவர் சீத்தாராம் யெச்சூரி, திமுகவின் கே.பி. ராமலிங்கம் உள்ளிட்டோர் மறுத்தனர். மேலும் திமுக தலைவர் கருணாநிதியும் தமது கட்சி எம்.பி.க்கள் எவரும் அதில் கையெழுத்திடவில்லை.. அப்படி கையெழுத்திட்டால் கடும் நடவடிக்கை எடுக்கப்படும் என்று கூறியிருந்தார்.

ஆனால் திமுகவின் கூட்டணிக் கட்சியான விடுதலைச் சிறுத்தைகள் கட்சியின் தலைவர் தொல். திருமாவளவனோ தாம் கையெழுத்திட்டது உண்மை என்று கூறினார். இந்நிலையில் அமெரிக்காவின் தடவியல் துறையினர் இக்கடிதம் உண்மையானது என்று கூறியிருந்ததது.

தற்போது திமுகவின் லோக்சபா எம்.பியான டி.கே.எஸ். இளங்கோவன், பார்லிமென்ட்டில் மழைக்கால கூட்டத் தொடரில் இது தொடர்பாக எமது எம்.பிக்கள் உரிமை மீறல் தீர்மானம் கொண்டுவர திட்டமிட்டுள்ளனர். எங்களது எம்.பி.க்களின் கையெழுத்துகள் மோசடியாக பயன்படுத்தப்பட்டிருப்பது தெள்ளத் தெளிவாக தெரியவந்துள்ளது என்றார்.

"ஈழத் தமிழர் பிரச்சனை போன்ற வேறு சில மனுக்களில் நாங்கள் கையெழுத்திட்டிருந்தோம். அக்கையெழுத்தை மோடிக்கு எதிரான கடிதத்தில் பயன்படுத்தி உள்ளனர். நான் ஈழத் தமிழர் பிரச்சனைக்கு கையெழுத்திட்டது நினைவு இருக்கிறது. நிச்சயமாக மோடி விவகாரத்தில் கையெழுத்திடமாட்டேன். அப்படி ஒரு மனுவுடன் ஒருவர் என்னை அணுகினால் கட்சித் தலைமையை அணுகுமாறுதான் நான் கூறுவேன்" என்று பெயர் வெளியிட விரும்பாத திமுக எம்பி ஒருவர் தெரிவித்துள்ளார்.

English summary

DMK members may move a privilege motion in the ensuing monsoon session of parliament against "misuse" of their signatures in a letter urging US President Barack Obama to deny visa to Gujarat Chief Minister Narendra Modi, said the party spokesperson.