மோடிக்கு எதிரான 65 எம்.பிக்களின் கடிதம் உண்மையானதே

டெல்லி : குஜராத் முதல்வரும் பாரதிய ஜனதா கட்சியின் லோக்சபா தேர்தல் பிரசாரக் குழுத் தலைவருமான நரேந்திர மோடிக்கு விசா தர எதிர்ப்புத் தெரிவித்து 12 கட்சிகளைச் சேர்ந்த 65 எம்.பி.க்கள் அமெரிக்க அதிபர் ஒபாமாவுக்கு அனுப்பிய கடிதம் உண்மை என அறிவிக்கப்பட்டுள்ளது.

குஜராத் கலவரத்தைத் தொடர்ந்து மோடிக்கு அமெரிக்கா தொட்ர்ந்தும் விசா வழங்க மறுத்து வருகிறது. மோடிக்கு விசா வழங்க வேண்டும் என்பதற்கான லாபி ஒரு புறம் மும்முரம் காட்டிவருகிறது. இந்நிலையில் கடந்த ஆண்டு காங்கிரஸ், திமுக, மார்க்சிஸ்ட் உள்ளிட்ட 12 கட்சிகளைச் சேர்ந்த 65 எம்.பிக்கள், மோடிக்கு விசா வழங்கக் கூடாது என எதிர்ப்பு தெரிவித்து அமெரிக்க அதிபர் ஒபாமாவுக்கு கடிதம் அனுப்பியிருந்தனர்.

அண்மையில் அமெரிக்கா சென்றிருந்த பாஜக தலைவர் ராஜ்நாத்தும் சிங்கும் கூட மோடிக்கு விசா வழங்குவதற்கான லாபியில் ஈடுபட்டார். இதைத் தொடர்ந்து கடந்த ஆண்டு அனுப்பி வைக்கப்பட்ட அதே கடிதம் மீண்டும் அமெரிக்க அதிபர் ஒபாமாவுக்கு அனுப்பி வைக்கப்பட்டது. ஆனால் புதிய சர்ச்சையாக மார்க்சிஸ்ட் மூத்த தலைவர் சீதாராம் யெச்சூரி, திமுக எம்.பி. ராமலிங்கம் உள்ளிட்ட பலரும் அக்கடிதத்தில் இருக்கும் கையெழுத்து தங்களுடையது அல்ல என்று கூறினர். திமுக தலைவர் கருணாநிதியும் தமது கட்சியைச் சேர்ந்த எந்த எம்.பி.யும் அக்கடிதத்தில் கையெழுத்துப் போடவில்லை.. அப்படி கையெழுத்திட்டால் கடும் நடவடிக்கை எடுக்கப்படும் என்று எச்சரிந்தார்.

இதனிடையே அமெரிக்காவின் கலிபோர்னியாவை சேர்ந்த தடயவியல் ஆய்வாளர் கூறுகையில் இந்திய எம்பிக்களின் கையெழுத்துக்கள் உண்மையானது மட்டுமன்றி அது அதிகாரபூர்வமானதுதான் என்று தெளிவாக குறிப்பிட்டுள்ளார். இந்த கடிதம் அவர்கள் கூறியதுபோல வெட்டி ஒட்டப்பட்டது அல்ல. அவர்கள் மூன்று பக்க கடிதம் எழுதி இருக்கிறார்கள். அவர்களின் கையெழுத்துக்கள் உண்மையானது என்று உறுதிபட தெரிவித்துள்ளார்.

English summary

The controversy over Indian MPs' letters to President Barack Obama for denying visa to Narendra Modi has taken a new turn with a California-based Forensic Document Examiner certifying that the signatures of the lawmakers are "original and authentic" and not a cut and paste job as claimed.