லோக்சபா தேர்தல்: காங். படுதோல்வி- பாஜகவுக்கு ஆறுதல் இடங்களே- டைம்ஸ் நவ் கருத்துக் கணிப்பு

டெல்லி: லோக்சபா தேர்தல் தற்போது நடைபெற்றால் ஆளும் காங்கிரஸ் ஐக்கிய முற்போக்குக் கூட்டணி படுதோல்வியை சந்திக்கும் என்றும் அதே நேரத்தில் எதிர்க்கட்சியான பாரதிய ஜனதாவுக்கு சற்றே ஆறுதலாக மட்டுமே கூடுதல் இடங்கள் கிடைக்கும் என்றும் டைம்ஸ் நவ்-சி வோட்டர்ஸ் கருத்துக் கணிப்பில் தெரியவந்துள்ளது.

டைம்ஸ் நவ் கருத்துக் கணிப்பு முடிவுகள்:

ஐக்கிய முற்போக்குக் கூட்டணி கடந்த 2009-ம் ஆண்டு தேர்தலில் 228 இடங்களைப் பெற்றிருந்தது. ஆனால் தற்போது தேர்தல் நடைபெற்றால் 136 இடங்கள்தான் கிடைக்கும். இதில் காங்கிரஸ் கட்சி கடந்த முறை 206 இடங்களைக் கைப்பற்றியது. இம்முறையோ 119 தொகுதிகள் மட்டுமே காங்கிரஸுக்கு கிடைக்குமாம். அதாவது 87 தொகுதிகள் காங்கிரஸ் 'கையை'விட்டு போய்விடும்.

பாரதிய ஜனதா தலைமையிலான தேசிய ஜனநாயகக் கூட்டணி கடந்த தேர்தலில் 132 இடங்களைக் கைப்பற்றியது. இம்முறை சற்றே ஆறுதலாக 156 இடங்களைக் கைப்பற்றலாம். இதில் பாரதிய ஜனதா கட்சி கடந்த முறை 116 இடங்களைப் பெற்றிருந்தது. இம்முறை கூடுதலாக 15 தொகுதிகள் வரை அதாவது 131 தொகுதிகள் வரை கிடைக்கலாம்.

உத்தேச 3வது அணிக்கு 116 இடங்கள்

ஐக்கிய முற்போக்குக் கூட்டணி, தேசிய ஜனநாயகக் கூட்டணியில் இடம்பெறாத இதர கட்சிகளை அதாவது 3வது அணி ஒன்று உருவானால் அதில் இடம்பெறலாம் என்று உத்தேசிக்கப்படுகிற கட்சிகளும் அவை பெறும் இடங்களும்:

சமாஜ்வாடி- 33, இடதுசாரிகள் - 33, பிஜூ ஜனதா தளம்- 12, ஐக்கிய ஜனதா தளம்- 11, தெலுங்குதேசம்- 9, ராஷ்டிரிய ஜனதா தளம்-12, இந்திய தேசிய லோக்தள்- 2, திமுக-5, அசாம் கன பரிஷத் -2, மதச்சார்பற்ற ஜனதா தளம்- 3 என மொத்தம் 116 தொகுதிகள் வரை கிடைக்கும்.

உத்தேச 4வது அணிக்கு எத்தனை இடங்கள்?

ஐமு கூட்டணி, தேஜ கூட்டணி, 3வது அணியில் இடம்பெறாத 4வது அணி கட்சிகளாக கருதப்படுபவையும் அவை பெறும் இடங்களும்..

அதிமுக 29- திரிணாமுல் -22, பகுஜன் சமாஜ்- 27, ஒய்.எஸ்.ஆர். காங்கிரஸ் 14, தெலுங்கானா ராஷ்டிரிய சமிதி-11, தேமுதிக 2, மகாராஷ்டிரா நவநிர்மான் சேனா 3 தொகுதிகளையும் கைப்பற்றுமாம். மொத்தம் 122 தொகுதிகள் வரை உத்தேச 4வது அணிக்கு கிடைக்குமாம்.

பாஜக அணிக்கு 145-160

தி ஹிண்டு- சி.என்.என். தொலைக்காட்சி கருத்துக் கணிப்பிலும் டைம்ஸ்நவ் கருத்துக் கணிப்பிலும் பார்த்தால் பாரதிய ஜனதா தலைமையிலான கூட்டணிக்கு 145 முதல் 160 வரையிலான இடங்கள் கிடைப்பது உறுதியாகி இருக்கிறது. இருப்பினும் தெலுங்கானா விவகாரத்தில் காங்கிரஸ் மேற்கொள்ளப் போகும் முடிவு காங்கிரஸின் எண்ணிக்கையை சற்றே கூடும் போது இரண்டு கட்சிகளுக்கும் இடையேயான தொகுதிகள் வித்தியாசம் குறைவாகத்தான் இருக்கும். இதனால் பாரதிய ஜனதா, காங்கிரஸ் இரண்டுமே வலுவான அணி சேர்க்கைக்கான 'யுத்தத்தை' நடத்தக் கூடும்.

English summary

We could end up with a Lok Sabha in which, for the first time, the single largest party has less than one-fourth of the 543 seats and no front has even a third. That is what would happen if elections were held now, according to a Times Now-CVoter opinion poll. It projects that the NDA would win 156 seats with the BJP getting 131 of them, while the UPA would win 136 with the Congress pegged to 119.