கருணாநிதி பிறந்தநாளில் பிறந்த குழந்தைகளுக்கு தங்க மோதிரம் அணிவித்த மு.க. ஸ்டாலின்

சென்னை: திமுக தலைவர் கருணாநிதியின் பிறந்தநாள் அன்று பிறந்த மற்றும் தமிழ் பெயர் வைக்கப்பட்ட 101 குழந்தைகளுக்கு திமுக பொருளாளர் மு.க. ஸ்டாலின் தங்க மோதிரம் அணிவித்தார்.

திமுக தலைவர் கருணாநிதியின் பிறந்தநாள் அன்று பிறந்த குழந்தைகளுக்கும், தமிழ் பெயர் வைக்கப்பட்ட குழந்தைகளுக்கும் என மொத்தம் 101 குழந்தைகளுக்கு 1 கிராம் தங்க மோதிரம் அணிவிக்கும் நிகழ்ச்சி இன்று காலை சென்னையில் நடந்தது. தேனாம்பேட்டையில் உள்ள அன்பகத்தில் நடந்த நிகழ்ச்சிக்கு முன்னாள் மேயர் மா. சுப்பிரமணியன் தலைமை வகித்தார்.

இந்த நிகழ்ச்சியில் திமுக பொருளாளர் மு.க. ஸ்டாலின் கலந்து கொண்டு குழந்தைகளுக்கு மோதிரத்தை அணிவித்தார்.

அப்போது அவர் பேசுகையில்,

கலைஞர் பிறந்தநாள் விழாவை பயனுள்ள விழாவாக நடத்தி பல்வேறு நலத்திட்ட உதவிகளை வழங்கிக் கொண்டிருக்கிறோம். அவரது பிறந்தநாள் அன்று மாநகராட்சி மருத்துவமனைகளில் பிறந்த குழந்தைகள் மற்றும் தமிழ் பெயர் வைக்கப்பட்ட குழந்தைகள் ஆகியோருக்கு இன்று மோதிரம் அணிவித்தோம். அனைவரும் தமிழ் பெயரை தங்கள் குழந்தைகளுக்கு வைக்க இந்த நிகழ்ச்சி ஒரு முன் உதாரணமாக இருக்கும். நீங்கள் உங்கள் பேரன், பேத்திக்கும் தமிழ் பெயரை சூட்ட வேண்டும்.

பெரியார், அண்ணா, கலைஞர் ஆகியோர் தமிழுக்காகவும், தமிழ் மொழிக்காகவும் பாடுபட்டவர்கள். அவர்கள் வழியில் நாம் அனைவரும் பாடுபட வேண்டும் என்றார்.

English summary

DMK treasurer MK Stalin gave gold rings to babies who have come to this world on DMK supremo Karunanidhi's birthday.