பிரான்ஸ் ஓவர்.. ஐக்கிய அரபு எமிரேட்ஸ் சென்ற பிரதமர் மோடி! அதிபரோடு இன்று முக்கிய மீட்டிங்!

அபுதாபி: 2 நாள் சுற்றுப்பயணத்தை முடித்துவிட்டு பிரான்சில் இருந்து புறப்பட்ட பிரதமர் மோடி ஐக்கிய அரபு எமிரேட்சுக்கு சென்றார். அங்கு அவர் அதிபர் ஷேக் முகமது பின் சயீத் அல் நஹ்யானை சந்தித்து பேச உள்ளார். இந்த சந்திப்பின் பின்னணி பற்றிய முக்கிய தகவல்கள் வெளியாகி உள்ளன.

பிரான்ஸில் ஒவ்வொரு ஆண்டும் ஜூலை 14ம் தேதி ‛பாஸ்டில் டே' என்ற பெயரில் தேசிய தினம் கொண்டாடப்பட உள்ளது. அதன்படி நேற்று அங்கு தேசியதினம் கொண்டாடப்பட்டது. இந்த விழாவில் பிரதமர் மோடி சிறப்பு விருந்தினராக பங்கேற்றார்.

விழாவில் பிரதமர் மோடி, பிரான்ஸ் அதிபர் இமானுவேல் மேக்ரான் ஆகியோருக்கு பிரான்ஸ் நாட்டின் படை வீரர்களும், இந்தியாவின் முப்படை வீரர்களும் அணிவகுப்பு மரியாதை செய்தனர். இந்த விழாவில் பங்கேற்பதற்காக பிரதமர் மோடி அங்கு 2 நாள் சுற்றுப்பயணம் செய்தார்.

முன்னதாக நேற்று முன்தினம் பிரான்ஸ் சென்ற பிரதமர் மோடிக்கு அங்கு சிறப்பான வரவேற்பு அளிக்கப்பட்டது. மோடி இந்திய வம்சாவளியினர் மத்தியில் உற்சாக பேசினார். பிரான்சில் திருவள்ளுவர் சிலை அமைக்கப்படும் எனவும், உலகின் பழமையான மொழி தமிழ் தான். உலகின் பழமையான மொழி இந்திய மொழி என்பதை விட நமக்கு பெரிய பெருமை வேறு என்ன இருக்க முடியும் என பூரிப்புடன் தெரிவித்தார்.

மேலும் இமானுவேல் மேக்ரான் மற்றும் அவரது மனைவி சார்பில் பிரதமர் மோடிக்கு இரவு விருந்து வழங்கப்பட்டது. அதோடு பிரதமர் மோடிக்கு பிரான்ஸ் நாட்டின் கிராண்ட் கிராஸ் ஆப் தி லீஜியன் ஆப் ஹானர் எனும் உயரிய விருதை இமானுவேல் மேக்ரான் வழங்கினார். மேலும் இருநாடுகள் இடையே முக்கிய ஒப்பந்தங்கள் கையெழுத்தாகின.

தற்போது பிரான்ஸ் நாட்டில் பிரதமர் மோடியின் 2 நாள் சுற்றுப்பயணம் முடிவுக்கு வந்துள்ளது. இதையடுத்து பிரதமர் மோடி பிரான்சில் இருந்து ஐக்கிய அரபு எமிரேட்சுக்கு ஒருநாள் பயணமாக விமானத்தில் புறப்பட்டார். ஐக்கிய அரபு எமிரேட்சியின் அபுதாபியில் பிரதமர் மோடி இறங்கினார். இதையடுத்து பிரதமர் மோடியை ஐக்கிய அரபு எமிரேட்சின் இளவரசர் ஷேக் காலித் பின் முகமது பின் ஷயாத் அல் நஹ்யான் வரவேற்றார்.

இதையடுத்து பிரதமர் மோடி, அதிபர் ஷேக் முகமது பின் சயீத் அல் நஹ்யானை சந்தித்து பேச உள்ளார். இந்த வேளையில் எரிபொருள், உணவு பாதுகாப்பு உள்ளிட்ட விவகாரங்கள் குறித்து இருவரும் விவாதிக்க உள்ளனர். மேலும் இருநாடுகள் சார்ந்த வர்த்தக ஒப்பந்தம் கையெழுத்தாக உள்ளது. அதன்பிறகு ஐக்கிய அரபு எமிரேட்ஸ் சுற்றுப்பயணத்தை முடித்து கொள்ளும் பிரதமர் மோடி அங்கிருந்து இந்தியா புறப்பட்டு வருகிறார் என்பது குறிப்பிடத்தக்கது.

English summary

Prime Minister Narendra Modi left for United Arab Emirates after completing a 2-day tour in France. While he is going to meet President Sheikh Mohammed bin Zayed Al Nahyan there, important information about it has come out.