நேரில் ரூ.320.. ஆன்லைனில் கிட்டத்தட்ட 2 மடங்கு அதிகம்.. எல்லை மீறி போகும் ஆன்லைன் டெலிவரி செயலிகள்
பெங்களூர்: இந்தக் காலத்தில் நம்மில் பலரும் உணவுகளை ஆன்லைன் வழியாகவே ஆர்டர் செய்கிறோம். ஆன்லைன் ஆர்டர் தொடர்பாக இணையத்தில் தொடர்ச்சியாக விவாதம் இருந்தே வருகிறது. இதற்கிடையே பெங்களூரை சேர்ந்த பிரபல யூடியூபர் நளினி உனாகர் போட்ட போஸ்ட் இப்போது இணையத்தில் வேகமாகப் பரவி வருகிறது. இது குறித்து நாம் விரிவாகப் பார்க்கலாம்.
நாம் ஒரு உணவை நேரில் சென்று வாங்கும் விலையைக் காட்டிலும் ஜொமேட்டோ, ஸ்விக்கி உள்ளிட்ட தளங்களில் அதே உணவை ஆர்டர் செய்யும்போது அதன் விலை அதிகமாக இருக்கும். இது அனைவருக்கும் தெரிந்தது தான். ஆனால் இந்த ரேட் வித்தியாசம் இப்போது மிகப் பெரிய அளவுக்கு அதிகரித்துவிட்டதையே நளினி போட்ட போஸ்ட் காட்டுகிறது.
இரண்டு மடங்கு அதிகம்
அவர் தனது ஊரில் உள்ள பிரபல உணவகத்தில் இருந்து உணவை ஆர்டர் செய்துள்ளார். இரண்டு உணவுகளை மட்டுமே அவர் ஆர்டர் செய்த நிலையில், அதற்கு மொத்தக் கட்டணமாக ரூ.655 வந்துள்ளது. ஆனால், உண்மையில் சம்பந்தப்பட்ட ஹோட்டல் வெறும் ரூ.320க்கு தான் அந்த உணவுகளை விற்றுள்ளன. அதாவது கிட்டத்தட்ட 2 மடங்கை விடவும் கூட அதிகம். இது தொடர்பான போட்டோக்களையும் அவர் பகிர்ந்துள்ளார்.
ஷாக்
அதில் வெஜ் மஞ்சூரியனுக்கு ரூ.160ஐ அந்த ஹோட்டல் போட்டுள்ளது. ஆனால், ஜொமேட்டோ தளத்தில் அதற்கு ரூ.310 வசூலிக்கிறார்கள். அதேபோல சைனீஸ் பேல் ரூ.160க்கு பதில் ரூ.290க்கு விற்கப்படுகிறது. டெலிவரி சார்ஜ், பேக்கிங் சார்ஜ் உள்ளிட்ட கட்டணங்களைச் சேர்த்து மொத்தம் ₹320க்கு பதிலாக ₹655 பில் காட்டியது. ஜொமேட்டோ தளத்தில் ஆஃபர்கள் இருந்த போதிலும், அதை அப்ளை செய்தாலும் ₹550 கட்ட வேண்டும் எனச் சொல்லியிருக்கிறது. ஆஃப் பற்றித் தெரியாதவர்கள் ரூ.655ஐ முழுமையாகவே கட்டி இருப்பார்கள்.
அதாவது அதே உணவு அதே ஹோட்டலில் இருந்து வாங்கிய போதும், நேரில் வாங்குவதை விட ஆன்லைனில் ரேட் கிட்டத்தட்ட இரண்டு மடங்கு அதிகமாக இருந்துள்ளது. இந்தளவுக்கு அதிகக் கட்டணம் வசூலிப்பதை ஏற்கவே முடியாது என நளினி கண்டித்து இருக்கிறார். பில் போட்டோவை பகிர்ந்து நளினி தனது அதிருப்தியை வெளிப்படுத்தினார். அவரது போஸ்ட் உடனடியாக இணையத்தில் டிரெண்டானது.
ஜொமேட்டோ
இது இதற்கிடையே ஜொமேட்டோ இது குறித்துப் பதிலளித்துள்ளது. வழக்கம் போலவே உணவுகளின் விலையை நிர்ணயம் செய்வது ஹோட்டல்கள் தான் என்றும் தாங்கள் வெறும் இடைத்தரகர்கள் மட்டுமே எனக் கூறியுள்ளது. அவர்கள் மேலும், "எங்கள் தளத்தில் உணவுகளின் விலைகள் சம்பந்தப்பட்ட ஹோட்டல்கள் தான் தீர்மானிக்கிறார்கள். வாடிக்கையாளர்களுக்கும் உணவகங்களுக்கும் இடையே ஒரு இடைத்தரகராக மட்டுமே ஜொமேட்டோ செயல்படுகிறது. உங்கள் கருத்தைச் சம்பந்தப்பட்ட ஹோட்டல் நிர்வாகத்திற்குத் தெரியப்படுத்துவோம்" என்று மட்டும் பதிலளித்துள்ளது.
நெட்டிசன்கள் காட்டம்
அவரது போஸ்டும் ஜொமேட்டோவின் இந்த பதிலும் இணையத்தில் டிரெண்டாகி வருகிறது. அதற்கு நெட்டிசன்கள் பல்வேறு கருத்துகளைப் பதிவிட்டு வருகிறார்கள். ஜொமேட்டோ தளத்தின் வெளிப்படைத்தன்மை குறித்து பல்வேறு தரப்பினரும் கேள்வி எழுப்பினார். உணவகங்கள் விலையை நிர்ணயித்தால், ஜெமேட்டோ வசூலிக்கும் கமிஷன், விளம்பரக் கட்டணம் உள்ளிட்டவை குறித்து வெளிப்படையாக அறிவிக்க வேண்டும் என்று நெட்டிசன் பதிவிட்டார்.
உணவகங்களிடம் இருந்து ஜொமேட்டோ கமிஷனாக அதிக தொகையை வசூலிப்பதாகவும் அதை ஈடு செய்யவே ஹோட்டல்கள் தங்கள் உணவு விலையை ஆன்லைன் ஆர்டருக்கு அதிகரிப்பதாகவும் நெட்டிசன்கள் பதிவிட்டு வருகிறார்கள். வெறும் இடைத்தரகர் எனச் சொல்லிக் கொண்டாலும், தனது தளத்தில் இருக்கும் குறைகளை அவர்கள் தான் சரி செய்ய வேண்டும் என்றும் நெட்டிசன்கள் பதிவிட்டு வருகிறார்கள்.
Click it and Unblock the Notifications
Sign in with Google