தேசிய கொடிக்கு பதில் காவி கொடி.. சிக்கலில் கர்நாடக அமைச்சர்! சட்டசபையில் இரவு பகலாக காங்கிரஸ் தர்ணா
பெங்களூர்: டெல்லி செங்கோட்டையில் தேசியக்கொடிக்கு பதில் காவிக்கொடி ஏற்றப்படும் என பேசிய பாஜக மூத்த தலைவர் ஈஸ்வரப்பாவின் அமைச்சர் பதவியை பறிக்க கோரி கர்நாடக சட்டசபையில் காங்கிரஸ் எம்எல்ஏக்கள் இரவில் தூங்கினர். தொடர் தர்ணாவில் ஈடுபட்டு வருகின்றனர்.
கர்நாடகத்தில் பாஜக ஆட்சி நடக்கிறது. பசவராஜ் பொம்மை முதலமைச்சராக உள்ளார். இவரது அமைச்சரவையில் மூத்த அமைச்சராக இருப்பவர் ஈஸ்வரப்பா. இவர் கிராம வளர்ச்சி, பஞ்சாயத்து ராஜ் துறையை நிர்வகித்து வருகிறார். ஈஸ்வரப்பா சர்ச்சைக்கு பெயர் பெற்றவர்.
சமீபத்திய ஹிஜாப் பிரச்னைக்கு மத்தியில் டெல்லி செங்கோட்டையில் காவிகொடி ஏற்றப்படும் காலம் வரலாம் என ஈஸ்வரப்பா பேசினார்.
தேசியக் கொடி
செங்கோட்டையில் தேசியக்கொடிக்கு பதில் காவி கொடி ஏற்றுவதாக ஈஸ்வரப்பா தெரிவித்ததற்கு காங்கிரஸ் கட்சியினர் கடும் கண்டனம் தெரிவித்தனர். ஈஸ்வரப்பாவை அமைச்சரைவில் இருந்து நீக்க வேண்டும் என சட்டசபை கூட்டத்தொடரிலும் காங்கிரஸ் கட்சியினர் வலியுறுத்தினர்.
தர்ணா
இந்த விவகாரத்தில் நேற்று சட்டசபையில் காங்கிரஸ் கட்சியினர் தர்ணா, தேசியக்கொடியை பிடித்து போராட்டம் நடத்தினர். இதையடுத்து சபாநாயகர் விஸ்வேஸ்வர ஹெக்டே காகேரி தேசியக்கொடி பயன்படுத்த கூடாது என கூறினார். தொடர்ந்து கூச்சல், குழப்பம் நிலவியது. சபாநாயகர் இருக்கை முன் தர்ணாவில் ஈடுபட்டனர். அப்போது இரங்கல் தீர்மானம் கொண்டு வந்ததால், அது முடியும் வரை காங்கிரசார் சற்று அமைதியாயினர். பின் மீண்டும் ஆக்ரோஷமடைந்து பா.ஜ.,வுக்கு எதிராக கோஷம் எழுப்பினர்.
சட்டசபையில் தூங்கிய காங்கிரஸ்
மேலும் ஈஸ்வரப்பாவை அமைச்சர் பதவியில் இருந்து நீக்க வலியுறுத்தி நேற்று இரவு காங்கிரஸ் எம்எல்ஏக்கள், எம்எல்சிக்கள்(கர்நாடக மேலவை உறுப்பினர்கள்) சட்டசபையில் இரவு நேர தர்ணாவில் ஈடுபட்டனர். முன்னாள் முதல்வர் சித்தரமையா, காங்கிரஸ் தலைவர் டிகே சிவக்குமார் உள்பட காங்கிரஸ் எம்எல்ஏக்கள் அனைவரும் இரவில் சட்டசபையிலேயே படுத்து தூங்கினர். அரசு தரப்பில், மெத்தை, தலையணை, உணவு, குடிநீர், போர்வை வழங்கப்பட்டது.
விவாத பொருள்
மேலும் ஈஸ்வரப்பா தனது அமைச்சர் பதவியை ராஜினாமா செய்ய வேண்டும் என்பதில் காங்கிரஸ் கட்சியினர் தீவிரமாக உள்ளனர். இந்த விவகாரம் ஹிஜாப் பிரச்னை ஆகியவற்றால் கர்நாடக அரசியல்களம் விவாதபொருளாக மாறியுள்ளது.
Click it and Unblock the Notifications
Sign in with Google