கிராமங்களில் கலக்கிய காங்கிரஸ்.. பாஜகவை காப்பாற்றிய நகரங்கள்! கர்நாடகா தேர்தல் சொல்லும் பாடம்

பெங்களூர்: கர்நாடகா மாநில சட்டப்பேரவைத் தேர்தல் முடிவுகள் வெளியாகி அதில் காங்கிரஸ் கட்சி பெரும் வெற்றிபெற்று இருக்கும் நிலையில், அம்மாநிலத்தில் கிராம புறங்கள், நகர்புறங்களில் எந்தெந்த கட்சிகளுக்கு ஆதரவு கிடைத்து உள்ளது என்பதை பார்ப்போம்.

கர்நாடகா மாநிலத்தில் கிராம புறங்கள், நகர்புறங்கள், மாநகரங்களில் எந்தெந்த கட்சிகளை சேர்ந்தவர்கள் அதிக தொகுதிகளில் வெற்றிபெற்று இருக்கிறார்கள் என்று பார்ப்போம். அந்த வகையில் கர்நாடக தொகுதிகளை நகர்புறங்கள், சிறு நகரங்கள், கிராமபுறங்கள் என பிரித்து இருக்கிறோம்.

அந்த வகையில், கர்நாடகா மாநில சட்டசபைத் தேர்தலில் பெரும்பான்மை பலத்துடன் வெற்றிபெற்ற காங்கிரஸ் கட்சியை விட நகர்புறங்களில் பாஜகவே அதிக தொகுதிகளில் வெற்றிபெற்று உள்ளது. கர்நாடகாவில் 47 நகர்புற தொகுதிகள் இருக்கின்றன. இதில் பாரதிய ஜனதா கட்சி 24 தொகுதிகளிலும், காங்கிரஸ் கட்சி 23 இடங்களிலும் வெற்றிபெற்று இருக்கின்றன. மதசார்பற்ற ஜனதா தளம் கட்சி ஒரு நகர்புற தொகுதியில்கூட இல்லை.

சிறுநகரங்களை எடுத்துக்கொண்டால் கர்நாடகா மாநிலத்தில் 26 தொகுதிகள் இருக்கின்றன. இதில் காங்கிரஸ் கட்சி 15 இடங்களில் வெற்றிபெற்று இருக்கின்றன. பாரதிய ஜனதா கட்சி 8 இடங்களிலும், மதசார்பற்ற ஜனதா தளம் 2 இடங்களில் வென்று உள்ளன. பாஜக முன்னாள் அமைச்சர் ஜனார்த்தன ரெட்டியின் கல்யாண ராஜ்ய பிரகதி பக்‌ஷா கட்சி சிறு நகரங்களில் 1 தொகுதியை வென்று இருக்கிறது.

கர்நாடகாவில் கிராமபுற தொகுதிகளே அதிகம் இருக்கின்றன. அம்மாநிலத்தில் 151 தொகுதிகள் கிராமபுறங்களிலேயே அமைந்து உள்ளன. காங்கிரஸ் கிராமபுற தொகுதிகளைதான் மொத்தமாக தட்டித்தூக்கி இருக்கிறது. பாரதிய ஜனதா கட்சி 34 இடங்களில் மட்டுமே வென்று உள்ளது.

குமாரசாமியின் மதசார்பற்ற ஜனதா வென்ற 19 தொகுதிகளில் 17 தொகுதிகள் கிராமபுறங்களில்தான். சர்வோதயா கர்நாடகா பக்‌ஷா கட்சி 1 தொகுதியிலும், சுயேட்சை ஒரு தொகுதியிலும் வெற்றிபெற்று உள்ளது. இதில் பாஜக நகர்புறங்களில் அதிக இடங்களில் வெற்றிபெற்றதற்கு காரணம் பெங்களூருதான்.

காரணம் தலைநகர் பெங்களூருவில் உள்ள 28 இடங்களில் 16 இடங்களில் பாரதிய ஜனதா வெற்றிபெற்று உள்ளது. 12 இடங்களில் காங்கிரஸ் வென்று இருப்பது குறிப்பிடத்தக்கது. கர்நாடகாவில் நேற்று வெளியான சட்டப்பேரவை தேர்தல் முடிவுகளில் காங்கிரஸ் கட்சி 136 தொகுதிகளிலும், ஆளும் பாரதிய ஜனதா கட்சி 65 இடங்களிலும் வெற்றிபெற்று இருக்கின்றன.

குமாரசாமியின் மதசார்பற்ற ஜனதா தளம் கட்சி 19 தொகுதிகளிலும், பாஜக முன்னாள் அமைச்சர் ஜனார்த்தன ரெட்டியின் கல்யாண ராஜ்ய பிரகதி பக்‌ஷா கட்சி ஒரு தொகுதியிலும், சர்வோதயா கர்நாடகா பக்‌ஷா கட்சி 1 தொகுதியிலும், சுயேட்சை ஒரு தொகுதியில் வெற்றிபெற்று உள்ளனர்.

English summary

As the results of the Karnataka state assembly elections have been released and the Congress party has won a big victory in it, let's see which parties have received support in the rural and urban areas of the state.