INDIA.. பாஜகவுக்கு எதிரான எதிர்க்கட்சிகளின் கூட்டணிக்கு இதுதான் பெயர்! பின்னணி அர்த்தம் இதுதான்!

பெங்களூர்: 2024 நாடாளுமன்ற தேர்தல் கூட்டணிக்காக 26 கட்சிகள் இணைந்து கூட்டணியை அமைத்துள்ளன. இந்த கூட்டணிக்கு இந்தியா (INDIA) என பெயரிடப்பட்டுள்ள நிலையில் அதன் பின்னணி அர்த்தம் மற்றும் கூட்டணியில் உள்ள கட்சிகளின் முழுவிபரம் வெளியாகி உள்ளது.

2024 நாடாளுமன்ற தேர்தலில் பாஜகவை வீழ்த்த எதிர்க்கட்சிகள் வியூகம் வகுத்து வருகின்றன. 2வது கட்டமாக பெங்களூரில் நேற்று எதிர்க்கட்சி தலைவர்களின் ஆலோசனை கூட்டம் தொடங்கி நடந்தது. இந்த கூட்டத்தின் 2வது நாள் ஆலோசனை இன்று தொடங்கியது.

சோனியா காந்தி தலைமையில் மொத்தம் 26 கட்சிகளின் தலைவர்கள் பங்கேற்றனர். இந்த கூட்டத்தில் எதிர்க்கட்சிகளின் கூட்டணிக்கான பெயர் முடிவு செய்யப்பட்டுள்ளது. அதன்படி I-N-D-I-A என பெயர் வைக்கப்பட்டுள்ளதாக தகவல்கள் வெளியாகி உள்ளது.

I-N-D-I-A என்பதற்கு Indian National Developmental Inclusive Alliance என்பது தான் விரிவாக்கமாகும். தமிழில் கூற வேண்டும் என்றால் இந்திய தேசிய வளர்ச்சி உள்ளடக்கிய கூட்டணி என சொல்லலாம். இந்த கூட்டணியில் பாஜகவுக்கு எதிராக 26 கட்சிகள் தற்போது இடம்பெற்றுள்ளது. மேலும் இந்த கூட்டணியின் முதல் ஆங்கில எழுத்துகளை சேர்த்து படித்தால் இந்தியா என்று பொருள் வரும்.

இதன்மூலம் நாட்டின் நலன் கருதி இந்த கூட்டணி அமைக்கப்பட்டுள்ளது என்பதை பொதுமக்களுக்கு எளிதில் எடுத்து கூறலாம் என்பதன் நோக்கத்தில் தான் இந்த பெயர் கூட்டணிக்கு வைக்க முடிவு செய்யப்பட்டுள்ளதாக தகவல்கள் வெளியாகி உள்ளன. தற்போது புதிதாக உருவாக்கப்பட்டுள்ள இந்த கூட்டணியில் மொத்தம் 26 கட்சிகள் இடம்பெற்றுள்ளன.

அதன்படி காங்கிரஸ், மேற்கு வங்க முதல்வர் மம்தா பானர்ஜியின் திரிணாமுல் காங்கிரஸ், தமிழக முதல்வர் ஸ்டாலின் திமுக, டெல்லி முதல்வர் அரவிந்த் கெஜ்ரிவாலின் ஆம்ஆத்மி கட்சி, பீகார் முதல்வர் நிதிஷ் குமாரின் ஐக்கிய ஜனதாதளம், லாலு பிரசாத் யாதவின் ராஷ்ட்ரிய ஜனதாதளம், ஜார்கண்ட் முதல்வர் ஹேமந்த் சோரணின் ஜார்கண்ட் முக்தி மோர்ச்சா கட்சி, சரத் பவாரின் தேசியவாத காங்கிரஸ் கட்சி, மகாராஷ்டிரா மாநில முதல்வர் உத்தவ் தாக்கரேவின் சிவசேனா, உத்தர பிரதேச எதிர்க்கட்சி தலைவரான அகிலேஷ் யாதவின் சமாஜ்வாதி கட்சிகள் இடம் பெற உள்ளன.

மேலும் முன்னாள் பிரதமர் சரண் சிங்கின் மகன் அஜய் சிங்கின் ராஷ்ட்ரிய லோக் தளம், அப்னா தளம் (காமிராவாடி), பாரூக் அப்துல்லாவின் ஜம்மு காஷ்மீரின் தேசிய மாநாடு கட்சி, மக்கள் ஜனநாயக கட்சி, மார்க்சிஸ்ட் கம்யூனிஸ்ட் கட்சி, இந்திய கம்யூனிஸ்ட் கட்சி, இந்திய கம்யூனிஸ்ட் விடுதலை கட்சி(மார்க்சிஸ்ட் லெனினிஸ்ட்), புரட்சிகர சோசலிஸ்ட் கட்சி, ஆல் இந்தியா பார்வர்ட் பிளாக் உள்ளிட்ட கட்சிகளும் இந்த கூட்டணியில் இடம் பெற்றுள்ளன.

மேலும் தமிழகத்தை சேர்ந்த வைகோவின் மதிமுக, திருமாவளவனின் விடுதலை சிறுத்தைகள் கட்சி, ஈஸ்வரனின் கொங்குநாடு மக்கள் தேசிய கட்சி, ஜவாஹூருல்லாவின் மனித நேய மக்கள் கட்சி, காதர் மொகீதினின் இந்திய யூனியன் முஸ்லிம் லீக், கேரளா காங்கிரஸ் (எம்), கேரளா காங்கிரஸ் (ஜோசப்) என மொத்தம் 26 கட்சிகள் இந்த கூட்டணியில் இடம் பெற்றுள்ளன.

English summary

26 parties have formed an alliance for the 2024 parliament election alliance. The information behind this alliance is known as India.2024 நாடாளுமன்ற தேர்தல் கூட்டணிக்காக 26 கட்சிகள் இணைந்து கூட்டணியை அமைத்துள்ளன. இந்த கூட்டணிக்கு இந்தியா (INDIA) என பெயரிடப்பட்டுள்ள நிலையில் அதன் பின்னணியில் உள்ள தகவல் வெளியாகி உள்ளது.