மத்திய கர்நாடகாவில்.. பாஜகவுக்கு ஏமாற்றம்..கை ஓங்கும் காங்கிரஸ்..இந்தியா டுடே கருத்துக்கணிப்பு

பெங்களூர்: கர்நாடக சட்டப்பேரவைக்கு இன்று ஒரே கட்டமாக வாக்குப்பதிவு நடைபெற்று முடிந்தது. இந்த நிலையில், மத்திய கர்நாடகா மண்டலத்தில் உள்ள 23 தொகுதிகளில் காங்கிரஸ் 12 தொகுதிகளில் வெற்றி பெறும் என்று இந்தியா டுடே தேர்தலுக்கு பிந்தைய கருத்துக்கணிப்பு வெளியிட்டுள்ளது.

கர்நாடகாவில் தற்போதைய சட்டப்பேரவையின் பதவிக் காலம் வரும் 24 ஆம் தேதியுடன் முடிவுக்கு வருகிறது. இதனால் அம்மாநில சட்டப்பேரவைக்கு தேர்தல் நடத்த இந்திய தேர்தல் ஆணையம் தெரிவித்தது. இதன்படி, கர்நாடகாவில் உள்ள 224 தொகுதிகளுக்கும் ஒரே கட்டமாக மே 10 (இன்று) ஆம் தேதி தேர்தல் நடைபெறும் என்று தேர்தல் ஆணையம் கடந்த மார்ச் மாதம் 29 ஆம் தேதி அறிவித்தது.

வேட்பு மனு தாக்கல் ஏப்ரல் 13 ஆம் தேதி தொடங்கி 20 ஆம் தேதி நிறைவு பெற்றது. தேர்தல் இன்று நடைபெற்றது. காலை 7 மணி முதல் மாலை 6 மணி வரை விறு விறுப்பாக வாக்குப்பதிவு நடைபெற்றது. கர்நாடக தேர்தல் களத்தில் மொத்தம் 2,615 வேட்பாளர்கள் உள்ளனர். ஆளும் பாஜக சார்பில் 224 வேட்பாளர்களும், காங்கிரஸ் கட்சி சார்பில் 223 வேட்பாளர்களும் ஜேடிஎஸ் கட்சி சார்பில் 209 வேட்பாளர்களும் களத்தில் உள்ளனர்.

கர்நாடகாவில் பாஜக, காங்கிரஸ், ஜேடிஎஸ் இடையே மும்முனை போட்டி நிலவுகிறது. கர்நாடகாவில் பாஜக தற்போது 116 இடங்களுடன் தனிபெரும்பான்மையுடன் ஆட்சி நடத்தி வரும் நிலையில், அடுத்து யார் ஆட்சி என்ற வாக்காளர்களின் தீர்ப்பு வரும் 13 ஆம் தேதி தெரியும். வாக்குப்பதிவு முடிந்துள்ள நிலையில், 23 தொகுதிகளை கொண்ட மத்திய கர்நாடகா மண்டலத்தில் தேர்தலுக்கு பிந்தைய கருத்துக்கணிப்பு முடிவுகளை இந்தியா டுடே வெளியிட்டுள்ளது.

இதில், காங்கிரஸ் கட்சி 12 இடங்களில் வெற்றி பெறும் என்று இந்தியா டுடே கருத்துக்கணிப்பு கூறியுள்ளது. பாஜகவிற்கு 10 இடங்களும், ஜேடிஎஸ் கட்சி ஒரு இடத்திலும் வெல்லும் என்று கருத்துக்கணிப்பு கூறுகிறது. கடலோர கர்நாடகாவில் பாஜக கை ஓங்கியிருந்த நிலையில், மத்திய கர்நாடகாவில் நிலைமை மாறியிருக்கிறது.

English summary

Polling for the Karnataka Legislative Assembly was completed in one phase today. In this situation, the Congress will win 12 of the 23 constituencies in the central Karnataka region, according to India Today's post-election poll.