மாஸ்டர்மூவ்.. கர்நாடகாவில் பாஜக, ஜேடிஎஸ்க்கு செக்.. காங்., 2ம்கட்ட வேட்பாளர் பட்டியலை கவனிச்சீங்களா

பெங்களூர்: கர்நாடகா சட்டசபை தேர்தலில் போட்டியிடும் காங்கிரஸ் கட்சி வேட்பாளர்களின் 2வது கட்ட வேட்பாளர் பட்டியல் இன்று வெளியிடப்பட்டுள்ளது. ஏற்கனவே 124 தொகுதிகளுக்கு வேட்பாளர் அறிவிக்கப்பட்டு இருந்த நிலையில் இன்று 42 தொகுதிகளுக்கான வேட்பாளர்களின் பெயர்கள் வெளியிடப்பட்டுள்ளன. இதில் பாஜக, ஜேடிஎஸ் கட்சிகளின் ஓட்டு வங்கியாக உள்ள லிங்காயத் மற்றும் ஒக்கலிகர் சமுதாயத்தை சேர்ந்தவர்களுக்கு அதிகளவில் வாய்ப்பு வழங்கப்பட்டுள்ளது.

கர்நாடகா சட்டசபை தேர்தல் மே மாதம் 10ம் தேதி நடைபெற உள்ளது. ஓட்டு எண்ணிக்கை மே 13ல் நடக்கிறது. காங்கிரஸ் கட்சி சார்பில் தேர்தல் தேதி அறிவிப்புக்கு முன்பே 124 தொகுதிகளுக்கான முதற்கட்ட வேட்பாளர் பட்டியல் வெளியிடப்பட்டது. இந்த பட்டியலின்படி முன்னாள் முதல்வர் சித்தராமையா மைசூர் மாவட்டம் வருணா தொகுதியிலும் காங்கிரஸ் கட்சியின் மாநில தலைவர் டிகேசிவக்குமார் ராமநகர் மாவட்டம் கனகபுரா தொகுதியிலும் போட்டியிடுவதாக அறிவிக்கப்பட்டது.

இதன் தொடர்ச்சியாக இன்று 2வது கட்டமாக 42 தொகுதிகளுக்கு வேட்பாளர் பட்டியல் வெளியிடப்பட்டது. இதில் பாஜகவில் இருந்து காங்கிரஸ் கட்சியில் இணைந்தவர்களுக்கு வாய்ப்பு வழங்கப்பட்டுள்ளது. அதன்படி பாஜக எம்எல்சி பதவியை ராஜினாமா செய்து தாய் கட்சியான காங்கிரஸ் கட்சிக்கு திரும்பிய பாபுராவ் சின்சனசூர் குர்மித்கல் தொகுதியில் வேட்பாளராக அறிவிக்கப்பட்டுள்ளார்.

இந்த 2ம் கட்ட வேட்பாளர் பட்டியலில் பாஜகவின் ஓட்டு வங்கியாக இருக்கும் லிங்காயத் சமுதாயத்தினருக்கு அதிகமான வாய்ப்பு வழங்கப்பட்டுள்ளது. அதன்படி 2வது கட்ட வேட்பாளர் பட்டியலில் 42 பேரின் பெயர்கள் இடம்பெற்றிருக்கும் நிலையில் அவர்களில் 11 பேர் லிங்காயத் சமுதாயத்தினர் ஆவார்கள். அதேபோல் ஜேடிஎஸ் கட்சியின் ஓட்டு வங்கியாக உள்ள ஒக்கலிகர் சமுதாயத்தினரும் 11 பேர் களமிறக்கப்பட்டுள்ளன. இதன் மூலம் பாஜக, ஜேடிஎஸ் கட்சிகளின் ஓட்டு வங்கியை காங்கிரஸ் கவரும் முயற்சியில் ஈடுபட்டுள்ளது.

குருபா சமுதாயத்தை சேர்ந்த 3 பேருக்கும், பெஸ்டா-கோலி-முகவீரா, மாராத்தா, எஸ்சி(இடது), எஸ்சி(வலது), வால்மீகி சமுதாயத்தை சேர்ந்த 2 பேருக்கும், இதுதவிர நாயுடு, இடிகா, ராஜ்புத், ரெட்டி சமுதாயத்தை சேர்ந்த தலா ஒருவருக்கும் 2வது கட்ட வேட்பாளர் பட்டியலில் வாய்ப்பு வழங்கப்பட்டுள்ளது. இததவிர 3 முஸ்லிம்களுக்கும் தேர்தலில் வேட்பாளர்களாக அறிவிக்கப்பட்டுள்ளனர்.

English summary

The 2nd phase candidate list of Congress party candidates contesting in the Karnataka assembly elections has been released today. Candidates for 124 constituencies have already been declared, but today the names of candidates for 42 constituencies have been announced. In this, the Lingayat and Okkaligar communities, which are the vote bank of the BJP and JDS parties, have been given more opportunities.