வேட்புமனு.. கர்நாடகா CM பசவராஜ் பொம்மையின் சொத்து எவ்வளவு தெரியுமா? ஸ்டாலினை விட 5 மடங்கு அதிகமாமே

பெங்களூர்: கர்நாடகா சட்டசபை தேர்தலில் ஹாவேரி மாவட்டம் சிக்கான் தொகுதியில் முதல்வர் பசவராஜ் பொம்மை போட்டியிடுகிறார். நேற்று அவர் வேட்புமனுத்தாக்கல் செய்த நிலையில் அவரது மொத்த சொத்து மதிப்புகள் வெளியாகி உள்ளன. அதன்படி பார்த்தால் தமிழ்நாடு முதல்வர் ஸ்டாலினை விட பசவராஜ் பொம்மை 5 மடங்கு அதிக சொத்து வைத்திருப்பது தெரியவந்துள்ளது.

கர்நாடகாவில் பாஜக ஆட்சி நடக்கிறது. முதல்வராக பசவராஜ் பொம்மை உள்ளார். எடியூரப்பா முதல்வர் பதவியை ராஜினாமா செய்த நிலையில் பசவராஜ் பொம்மை அப்பதவியை பெற்றார். கடந்த 2 ஆண்டுகளுக்கும் மேலாக அவர் முதல்வராக தொடர்ந்து வருகிறார்.

இந்நிலையில் தான் கர்நாடகா சட்டசபையின் பதவிக்காலம் மே 24ல் முடிவடைய உள்ளது. இதனால் இந்திய தேர்தல் ஆணையம் தேர்தல் தேதியை அறிவித்துள்ளது. அதன்படி மே மாதம் 10ம் தேதி தேர்தல் நடைபெற உள்ளது. மே 13ல் ஓட்டு எண்ணிக்கை நடைபெற உள்ளது.

பாஜக வேட்பாளர் பட்டியல்: இந்த தேர்தலில் வெற்றி பெற்று மீண்டும் ஆட்சியை பிடிக்கும் முனைப்பில் பாஜக உள்ளது. 2 கட்டங்களாக பாஜகவில் வேட்பாளர் பட்டியல் வெளியிடப்பட்டது. முதலில் 189 தொகுதிகளுக்கும், 2வதாக 23 தொகுதிகளுக்கும் வேட்பாளர்கள் அறிவிக்கப்பட்டுள்ளனர். மொத்தம் 224 தொகுதிகள் இருக்கும் நிலையில் 212 தொகுதிகளுக்கு வேட்பாளர்கள் அறிவிக்கப்பட்டுள்ளனர். இன்னும் 12 தொகுதிகளுக்கான வேட்பாளர்கள் விரைவில் அறிவிக்கப்பட உள்ளனர்.

பசவராஜ் பொம்மை தொகுதி: இந்த தேர்தலில் பசவராஜ் பொம்மை தொகுதி மாறலாம் என்ற தகவல்கள் கசிந்தன. இறுதியாக அது நடக்கவில்லை. பசவராஜ் பொம்மை தற்போது எம்எல்ஏவாக உள்ள ஹாவேரி மாவட்டம் சிக்கான் தொகுதியிலேயே மீண்டும் போட்டியிடுகிறார். இவர் இந்த தொகுதியில் 2008 முதல் தற்போது வரை 3 முறை எம்எல்ஏவாக உள்ளார். 4 வது முறையாக தற்போது போட்டியிடுகிறார்.

சொத்து மதிப்பு: அதன்படி நேற்று பசவராஜ் பொம்மை வேட்புமனுத்தாக்கல் செய்தார். அந்த மனுவில் அவரது சொத்து விபரங்களை பசவராஜ் பொம்மை குறிப்பிட்டுள்ளார். அதன்படி அவரது மொத்த சொத்து மதிப்பு 49.70 கோடி என்பது தெரியவந்துள்ளது. இதில் 5.98 கோடி அசையும் சொத்துகளாகவும், ரூ.42.15 கோடி அசையா சொத்துகளாகவும் இருப்பது தெரியவந்தது.

மகனுக்கு கடன்: மேலும் அவரது மனைவி சன்னம்மா பெயரில் ரூ.1.14 கோடியும், மகள் அதிதி பெயரில் 1.12 கோடியும் முதலீடு இருப்பது தெரியவந்தது. மேலும் மகன் பரத்துக்கு ரூ.14.74 லட்சத்தை பசவராஜ் பொம்மை கடன் கொடுத்துள்ளார். மேலும் கடந்த மார்ச் 26ம் தேதி தார்வார் மாவட்டம் உப்பள்ளி தாலுகாவில் தாரிஹாலா கிராமத்தில் பசவராஜ் பொம்மை 3 ஏக்கர் நிலத்தை வாங்கியிருப்பதும் தெரிவிக்கப்பட்டுள்ளது.

ஸ்டாலினை விட அதிகம்: இந்நிலையில் தான் தமிழ்நாடு முதல்வர் ஸ்டாலினின் சொத்து மதிப்பை விட பசவராஜ் பொம்மையின் சொத்து மதிப்பு 5 மடங்கு அதிகமாக இருப்பது தெரியவந்துள்ளது. அதாவது ஏடிஆர் எனும் ஜனநாயக சீர்திருத்த அமைப்பு சமீபத்தில் அனைத்து மாநில முதல்வர்களின் சொத்து விபரங்களை அவர்கள் தாக்கல் செய்த வேட்பு மனுக்களின் அடிப்படையில் வெளியிட்டது.

ஸ்டாலின் சொத்து எவ்வளவு?: இதில் 28 மாநிலங்கள், டெல்லி மற்றும் புதுச்சேரி ஆகிய இரண்டு யூனியன் பிரதேசங்கள் என மொத்தம் 30 முதல்வர்களின் விவரங்கள் இடம்பெற்றுள்ளன. இதில் ரூ.510 கோடி சொத்துடன் ஆந்திர மாநில முதல்வர் ஜெகன் மோகன் ரெட்டி முதலிடம் பிடித்தார். இந்த பட்டியலில் தமிழ்நாடு முதல்வர் ஸ்டாலின் 14வது இடத்தில் இருக்கிறார். இவருக்கு ரூ.8.88 கோடி சொத்து இருப்பது தெரியவந்தது. அதன்படி பார்த்தால் முதல்வர் பசவராஜ் பொம்மையின் சொத்து மதிப்பு முதல்வர் ஸ்டாலினை விட 5 மடங்கு அதிகமாக உள்ளது என்பது குறிப்பிடத்தக்கது.

English summary

Chief Minister Basavaraj Bommai is contesting from Sikan constituency in Haveri district in the Karnataka assembly elections. His total assets have been revealed since he filed his nomination yesterday. According to this, it has been revealed that Basavaraj Bommai has 5 times more assets than Tamil Nadu Chief Minister Stalin.