‛கோபமான டிகே சிவக்குமார்’.. காங்கிரஸ் தொண்டரின் கன்னத்தில் ஓங்கி அடித்ததால் பரபரப்பு! ஷாக் வீடியோ
பெங்களூர்: லோக்சபா தேர்தல் பிரசாரத்தின்போது திடீரென்று டென்ஷனான கர்நாடகா துணை முதல்வர் டிகே சிவக்குமார் காங்கிரஸ் தொண்டரின் கன்னத்தில் ஓங்கி அடித்த சம்பவம் பெரும் பரபரப்பை ஏற்படுத்தியது. தற்போது இந்த வீடியோ இணையதளத்தில் வேகமாக பரவி வருகிறது.
கர்நாடகாவில் மொத்தம் 28 லோக்சபா தொகுதிகள் உள்ளன. 2 கட்டங்களாக தேர்தல் அறிவிக்கப்பட்டது. முதற்கட்ட தேர்தல் கடந்த 26ம் தேதி நடந்தது. பெங்களூரில் உள்ள 3 தொகுதிகள், மைசூர், மண்டியா, பெங்களூர் புறநகர் உள்ளிட்ட தென்கர்நாடகா பகுதியில் உள்ள 14 தொகுதிகளுக்கு அன்றைய தினம் ஓட்டுப்பதிவு நடந்தது.
இதையடுத்து மீதமுள்ள 14 லோக்சபா தொகுதிகளுக்கும் வரும் 7 ம்தேதி லோக்சபா தேர்தல் நடைபெற உள்ளது. இந்த தொகுதிகள் வடகர்நாடகா மாவட்டங்களில் உள்ளன. அதன்படி சிக்கோடி, பெலகாவி, பாகல்கோட்டை, பிஜாப்பூர், , குல்பர்கா, ராய்ச்சூர், பீதர், கொப்பல், பல்லாரி, ஹாவேரி, தார்வார், உத்தர கன்னடா, தாவணகெரோ, சிவமொக்கா ஆகிய 14 தொகுதிகளுக்கு நாளை மறுநாள் தேர்தல் நடைபெற உள்ளது.
இந்த தொகுதிகளுக்கான தேர்தல் பிரசாரம் என்பது இன்று மாலையுடன் முடிவடைந்தது. முன்னதாக கர்நாடகா மாநிலத்தின் காங்கிரஸ் தலைவரும், துணை முதல்வருமான டிகே சிவக்குமார் தனது கட்சி வேட்பாளர்களை ஆதரித்து தீவிர பிரசாரம் மேற்கொண்டார். ஹாவேரி லோக்சபா தொகுதிக்குட்பட்ட சவனூரில் நேற்று இரவு டிகே சிவக்குமார் பிரசாரத்துக்கு சென்றார்.
அப்போது டிகே சிவக்குமாரை பார்க்க ஏராளமானவர்கள் அங்கு கூடியிருந்தனர். டிகே சிவக்குமார் தனது காரில் இருந்து இறங்கி நடந்து சென்றார். அப்போது திடீரென்று காங்கிரஸ் தொண்டர் ஒருவர் டிகே சிவக்குமார் அருகே வந்து அவரது தோளில் கைப்போட்டபடி சிரித்து கொண்டே நடந்தார். இதனை சற்றும் எதிர்பார்க்காத டிகே சிவக்குமார் கோபத்தின் உச்சிக்கு சென்றார். உடனடியாக அவர் அந்த தொண்டரின் கன்னத்தில் ஓங்கி அறைந்தார்.
இதையடுத்து சுதாரித்து கொண்ட போலீசார் அந்த நபரை அங்கிருந்து இழுத்து சென்றனர். இதுதொடர்பான வீடியோ தற்போது இணையதளத்தில் வேகமாக பரவி வருகிறது. டிகே சிவக்குமாரின் இந்த செயலுக்கு பாஜக தலைவர்கள் கடும் கண்டனங்களை பதிவு செய்து வருகின்றனர்.
டிகே சிவக்குமார் பிரசாரம் செய்த ஹாவேரி தொகுதியின் சிட்டிங் எம்பியாக பாஜகவின் சிவக்குமார் சென்னபசப்பா உதாசி இருந்தார். இவருக்கு இந்த முறை தேர்தலில் சீட் வழங்கப்படவில்லை. அவருக்கு பதிலாக முன்னாள் முதல்வர் பசவராஜ் பொம்மை பாஜக வேட்பாளராக நிறுத்தப்பட்டுள்ளார். அவரை எதிர்த்த காங்கிரஸ் சார்பில் ஏஜி மத் வேட்பாளராக போட்டியிட்டுள்ளார். பசவராஜ் பொம்மையை வீழ்த்தும் முனைப்பில் காங்கிரஸ் ஹாவேரி தொகுதியில் தீவிரமாக பிரசாரம் மேற்கொண்டு வந்தது என்பது குறிப்பிடத்தக்கது.
Click it and Unblock the Notifications
Sign in with Google