பாஜகவை விட ‛பெஸ்ட்’.. ஆனாலும் மோசம்! கர்நாடகாவில் காங்கிரஸ் டெபாசிட் இழந்த தொகுதிகளின் லிஸ்ட் இதோ

பெங்களூர்: கர்நாடகா சட்டசபை தேர்தலில் பாஜகவை தோற்கடித்து காங்கிரஸ் கட்சி ஆட்சியை பிடித்து இருந்தாலும் கூட அந்த கட்சியும் சில தொகுதிகளில் படுதோல்வியடைந்துள்ள தகவல் தற்போது வெளியாகி உள்ளது. அதாவது டெபாசிட் தொகையை கூட பெறமுடியாமல் காங்கிரஸ் வேட்பாளர்கள் தோற்றுள்ள நிலையில் அந்த தொகுதிகளின் பட்டியல் வெளியாகி உள்ளது.

கர்நாடகாவில் பாஜக ஆட்சி நடந்தது. முதல்வராக பசவராஜ் பொம்மை இருந்தார். 5 ஆண்டு சட்டசபை காலம் முடியும் நிலையில் இந்திய தேர்தல் ஆணையம் தேர்தலை அறிவித்தது. கர்நாடகா சட்டசபை தேர்தல் கடந்த 10ம் தேதி நடத்தப்படும் என இந்திய தேர்தல் ஆணையம் அறிவித்தது. இதையடுத்து கடந்த 10ம் தேதி தேர்தல் நடந்தது. 224 தொகுதிகளுக்கும் ஒரேகட்டமாக ஓட்டுப்பதிவு நடந்தது.

மொத்தம் 73.19 சதவீத ஓட்டுகள் பதிவானது. இந்த ஓட்டுகள் மே 13ல் எண்ணப்பட்டு முடிவுகள் அறிவிக்கப்பட்டன. இதில் காங்கிரஸ் கட்சி 135 தொகுதிகளில் வென்று அசத்தியது. பாஜக 66 தொகுதிகளில் மட்டுமே வெற்றி பெற்றது. கடந்த 2018 தேர்தலில் 104 இடங்களில் பாஜக வென்ற நிலையில் இந்த முறை பெரிய அளவில் சறுக்கலை சந்தித்தது. ஜேடிஎஸ் 19 இடங்களிலும் மற்றவர்கள் 4 தொகுதிகளிலும் மட்டுமே வெற்றி பெற்றனர். இதன்மூலம் காங்கிரஸ் கட்சி கர்நாடகாவில் தனித்து ஆட்சியை அமைக்கிறது.

நீண்ட இழுபறிக்கு பிறகு முதல்வராக சித்தராமையா தேர்வு செய்யப்பட்டுள்ளார். துணை முதல்வராக கர்நாடகா மாநில காங்கிரஸ் தலைவர் டிகே சிவக்குமார் தேர்வு செய்யப்பட்டுள்ளார். இவர்கள் நாளை மறுநாள் பெங்களூரில் நடக்கும் விழாவில் பதவியேற்க உள்ளனர். இதற்கிடையே தான் கர்நாடகா சட்டசபை தேர்தல் ரிசல்ட் தொடர்பாக தற்போது புதிய தகவல் ஒன்று வெளியாகி உள்ளது.

அதாவது கர்நாடகாவில் காங்கிரஸ் வெற்றி பெற்று தனித்து ஆட்சியமைத்தாலும் கூட அந்த கட்சியின் வேட்பாளர்கள் பல தொகுதிகளில் டெபாசிட்டை இழந்து படுதோல்வியடைந்துள்ளனர். அதன்படி பெலகாவி மாவட்டம் அரபாவி, ராயபாக், பெலகாவி தெற்கு, ராய்ச்சூர் மாவட்டம் தேவதுர்கா தொகுதிகளில் டெபாசிட்டை காங்கிரஸ் வேட்பாளர்கள் இழந்துள்ளனர்.

மேலும் ராமநகர் மாவட்டம் சென்னப்பட்டணா, ஹாசன், உத்தர கன்னடா மாவட்டம் குமட்டா, சிவமொக்கா மாவட்டம் சிகாரிப்புரா, சிவமொக்கா புறநகர், துமகூரு புறநகர், பெங்களூர் யஷ்வந்தபுரா என 11 தொகுதிகளில் காங்கிரஸ் வேட்பாளர்கள் படுதோல்வியடைந்து டெபாசிட்டை இழந்துள்ளனர்.

இதேபோல் கர்நாடகா சட்டசபை தேர்தலில் பாஜக வேட்பாளர்கள் 31 தொகுதிகளில் டெபாசிட்டை இழந்தனர். இதில் கனகபுரா தொகுதியில் டிகே சிவக்குமாரை எதிர்த்த அமைச்சர் ஆர் அசோக்கும் ஒருவர் ஆவார். அப்படி பார்த்தால் பாஜகவை ஒப்பிடும்போது காங்கிரஸ் கட்சி வேட்பாளர்கள் குறைந்த தொகுதிகளில் தான் டெபாசிட்டை இழந்துள்ளனர் என்பது குறிப்பிடத்தக்கது.

English summary

Even though the Congress party has come to power after defeating the BJP in the Karnataka assembly elections, it is now being reported that the party has also lost badly in some constituencies. In other words, the list of constituencies has been released where the Congress candidates have lost without even being able to receive the deposit amount.