‛நேரில் வாங்க’.. ஜேபி நட்டா, அமித் மாளவியாவுக்கு சிக்கல்.. கர்நாடகா போலீஸ் சம்மன்! விடாத காங்கிரஸ்
பெங்களூர்: லோக்சபா தேர்தலையொட்டி கர்நாடகா பாஜகவின் எக்ஸ் பக்கத்தில் சர்ச்சைக்குரிய வகையில் அனிமேஷன் வீடியோ பதிவிட்டது தொடர்பாக அந்த கட்சியின் தேசிய தலைவர் ஜேபி நட்டா மற்றும் ஐடி விங்க் பொறுப்பாளார் அமித் மாளவியா ஆகியோர் நேரில் விசாரணைக்கு ஆஜராகும்படி பெங்களூர் போலீசார் சம்மன் அனுப்பி உள்ளனர்.
கர்நாடகாவில் காங்கிரஸ் ஆட்சி நடக்கிறது. முதல்வராக சித்தராமையா உள்ளார். கர்நாடகாவை பொறுத்தவரை மொத்தம் 28 லோக்சபா தொகுதிகள் உள்ளன.
இந்த தொகுதிகளுக்கு மொத்தம் 2 கட்டங்களாக தேர்தல் நடந்து முடிந்துள்ளன. அதன்படி கடந்த மாதம் 26ம் தேதி 14 தொகுதிகளுக்கும், அதன்பிறகு நேற்று 14 தொகுதிகளுக்கும் தேர்தல் என்பது நடந்து முடிந்தது.
இதற்கிடையே தான் தேர்தல் வேளையில் கர்நாடகா பாஜகவின் அதிகாரப்பூர்வ எக்ஸ் பக்கத்தில் அனிமேஷன் வீடியோ ஒன்று வெளியிடப்பட்டது. அந்த வீடியோவில், ‛‛காங்கிரஸ் கட்சி தனது தேர்தல் வாக்குறுதியில் எஸ்சி, எஸ்டி மற்றும் ஒபிசி பிரிவினருக்கான நிதியை இஸ்லாமியர்களுக்கு வழங்குவதாக கூறி உள்ளது'' என்பதை காட்டும் வகையிலான காட்சிகள் இடம்பெற்றிருந்தது.
இதுதொடர்பாக கர்நாடகா காங்கிரஸ் சார்பில் தேர்தல் ஆணையத்தில் புகாரளிக்கப்பட்டது. புகாரில் பாஜக தேசிய தலைவர் ஜேபி நட்டா அறிவுரையின்படி அந்த கட்சியின் ஐடி விங்க் பொறுப்பாளர் அமித் மாளவியா இந்த அமிமேஷன் வீடியோவை வெளியிட்டுள்ளார். இந்த வீடியோ தொடர்பாக ஜேபி நட்டா, அமித் மாளவியா, கர்நாடகா பாஜக தலைவர் விஜயேந்திரா ஆகியோர் மீது நடவடிக்கை எடுக்க வேண்டும் என கூறப்பட்டு இருந்தது.
இந்த புகாரை தொடர்ந்து போலீசார் விசாரணை நடத்தி நடவடிக்கை எடுக்க தேர்தல் ஆணையம் உத்தரவிட்டது. இந்நிலையில் தான் பாஜகவின் தேசிய தலைவர் ஜேபி நட்டா மற்றும் பாஜகவின் ஐடி விங்க் பொறுப்பாளர் அமித் மாளவியா ஆகியோருக்கு பெங்களூர் ஹைகிரவுண்ட் போலீசார் சம்மன் அனுப்பி உள்ளனர்.
அதில் ‛‛சம்மன் கையில் கிடைத்த 7 நாட்களில் காலை 11 மணிக்கு ஹைகிரவுண்ட் போலீஸ் நிலைய விசாரணை அதிகாரி முன்பு ஆஜராகி விளக்கம் அளிக்க வேண்டும்'' என தெரிவிக்கப்பட்டுள்ளது.
Click it and Unblock the Notifications
Sign in with Google