‛‛மோடி போஸ்டரை நான் ஏன் பிடிக்கனும்’’.. மறுத்த பஞ்சாயத்து தலைவி பரிதா பேகம்! கொதித்துப்போன பாஜக
பெங்களூர்: பிரதமர் நரேந்திர மோடியின் போட்டோ பொரித்த போஸ்டரை பஞ்சாயத்து தலைவி வாங்க மறுத்த சம்பவம் பெரும் பரபரப்பை ஏற்படுத்தி உள்ளது. இதுதொடர்பான வீடியோ வெளியான நிலையில் பாஜகவினர் அவரை கடுமையாக விமர்சனம் செய்து வருகின்றனர்.
வரும் ஏப்ரல் அல்லது மே மாதம் நாடாளுமன்ற தேர்தல் நடைபெற உள்ளது. அனைத்து கட்சிகளும் தேர்தலுக்கு தயாரகி வருகிறது. இந்நிலையில் தான் மத்திய அரசின் நலத்திட்டங்கள் குறித்து பல்வேறு வகைகளில் பொதுமக்களுக்கு விழிப்புணர்வு ஏற்படுத்தப்பட்டு வருகிறது.
இதன் ஒருபகுதியாக பிரதமர் நரேந்திர மோடி கடந்த ஆண்டு நவம்பர் மாதம் 15ம் தேதி 'விக்சித் பாரத் சங்கல்ப யாத்திரை' எனும் நிகழ்ச்சியை ஜார்கண்டில் தொடங்கி வைத்தார். இதன்மூலம் நாடு முழுவதும் பிரசார வாகனங்கள் சென்று வருகின்றன.
ஜனவரி மாதம் 25ம் தேதிக்குள் 2.60 லட்சம் கிராம பஞ்சாயத்து மற்றும் 4 ஆயிரத்துக்கும் அதிகமான நகர உள்ளாட்சி அமைப்புகளில் இந்த யாத்திரையை நடத்த மத்திய அரசு திட்டமிட்டுள்ளது. அந்த வகையில் கர்நாடகாவில் இந்த யாத்திரை தொடர்பான விழிப்புணர்வு நிகழ்ச்சி நடத்தப்பட்டு வருகிறது.
அதன்படி கொப்பல் மாவட்டம் குக்கனூர் தாலுகா குதிரிமோடி கிராம பஞ்சாயத்தில் நிகழ்ச்சிக்கு ஏற்பாடு செய்யப்பட்டு இருந்தது. இந்த பஞ்சாயத்தில் தலைவராக இருப்பவர் பரிதா பேகம். இவர் இஸ்லாமிய மதத்தை சேர்ந்தவர். இந்த நிகழ்ச்சியில் கிராம பஞ்சாயத்து உறுப்பினர்கள் உள்பட ஏராளமானவர்கள் பங்கேற்றனர். அவர்களுக்கு பிரதமர் மோடியின் போட்டோ பொறிக்கப்பட்ட போஸ்டர்கள் வழங்கப்பட்டது.
பஞ்சாயத்து தலைவியான பரிதா பேகத்திடமும் அந்த போஸ்டர் வழங்கப்பட்டது. அப்போது பிரதமர் மோடியின் போட்டோவுடன் கூடிய போஸ்டரை பரிதா பேகம் வாங்க மறுத்தார். நான் பிரதமர் போஸ்டரை வாங்க மாட்டேன். இது மத்திய அரசின் திட்டம் தொடர்பான விழிப்புணர்வு நிகழ்ச்சி என தெரிவித்தார். அந்த போஸ்டரை வழங்கியவர் மீண்டும் மீண்டும் கூறினாலும் கூட பரிதா பேகம் அதனை பெற மறுத்துவிட்டார். இது அங்கு பெரும் பரபரப்பை ஏற்படுத்தியது.
இதனை அங்கிருந்தவர்கள் தங்களின் செல்போனில் வீடியோவாக எடுத்தனர். இந்த வீடியோ தற்போது இணையதளங்களில் வெளியாகி வேகமாக பரவி வருகிறது. பரிதா பேகமின் இந்த செயலுக்கு பாஜகவினர் கடும் எதிர்ப்பு தெரிவித்து வருகின்றனர்.
Click it and Unblock the Notifications
Sign in with Google