கர்நாடகா அடுத்த முதல்வர் யார்? டாப்பில் வந்த மாஜி சி.எம்! பசவராஜ் பொம்மை ‘அவுட்’.. ஆஹா.. கதை மாறுதே!

பெங்களூர் : கர்நாடகா சட்டமன்றத் தேர்தலையொட்டி, கருத்துக்கணிப்புகள் நடத்தப்பட்டு வருகின்றன. Edupress group நடத்திய கருத்துக்கணிப்பில் பாஜகவே மீண்டும் ஆட்சி அமைக்கும் என்றாலும், பசவராஜ் பொம்மைக்கு முதல்வர் வேட்பாளராக மிகக் குறைந்த ஆதரவே இருப்பதாகத் தெரிவிக்கப்பட்டுள்ளது.

கர்நாடகாவின் அடுத்த முதல்வருக்கான ரேஸில் எடியூரப்பாவே முன்னணியில் இருப்பதாக இந்தக் கருத்துக் கணிப்பில் தெரிவிக்கப்பட்டுளது.

பாஜகவின் ஜெகதீஷ் ஷெட்டர், காங்கிரஸின் சித்தராமையா, டிகே சிவக்குமார் ஆகியோர் அடுத்தடுத்த இடங்களில் உள்ளனர்.

பாஜக ஆட்சியை தக்கவைக்கும்

கர்நாடகாவில் தேர்தல் அறிவிக்கப்பட்டுள்ள நிலையில், தேர்தலுக்கு முந்தைய கருத்துக்கணிப்புகளின் முடிவுகள் வெளியிடப்பட்டு வருகின்றன. அந்த வகையில் Edupress group இந்த தேர்தல் தொடர்பாக வாக்காளர்களிடம் நடத்திய கருத்துக்கணிப்பு முடிவுகளை வெளியிட்டுள்ளது. அதன்படி, கர்நாடகாவில் பாஜக 110-120 இடங்களிலும், காங்கிரஸ் கட்சி 70-80 இடங்களிலிம், மதச்சார்பற்ற ஜனதா தளம் கட்சி 10-15 இடங்களையும் மற்றவை 4-9 இடங்களையும் வெல்லக்கூடும் எனத் தெரிவிக்கப்பட்டுள்ளது.

அடுத்த முதல்வர் யார்?

மேலும், கர்நாடகாவில் அடுத்த முதலமைச்சராக யாரை தேர்ந்தெடுக்க விரும்புகிறீர்கள் என்ற கேள்விக்கு வாக்காளர்கள் அளித்துள்ள பதில் ஆச்சர்யத்தை ஏற்படுத்தியுள்ளது. பாஜக மீண்டும் ஆட்சிக்கு வரவேண்டும் என வாக்காளர்கள் விரும்பினாலும், தற்போதைய முதல்வர் பசவராஜ் பொம்மைக்கு மிகக் குறைவான ஆதரவே கிடைத்துள்ளது. இந்தக் கருத்துக்கணிப்பில் 23 சதவீதம் பேர் கர்நாடக முன்னாள் முதல்வரும், பாஜக மூத்த தலைவருமான பி.எஸ்.எடியூரப்பாவை முதல்வர் வேட்பாளராக ஆதரித்துள்ளனர்.

சித்தராமையா

முன்னாள் முதலமைச்சரும், பாஜக மூத்த தலைவருமான ஜெகதீஷ் ஷெட்டரை அடுத்த முதலமைச்சராக இந்த கருத்துக்கணிப்பில் பங்கேற்றவர்களில் 22 சதவீதம் பேர் விரும்புவதாகத் தெரிவிக்கப்பட்டுள்ளது. காங்கிரஸ் கட்சியின் மூத்த தலைவரும், முன்னாள் முதல்வருமான சித்தராமையா 20 சதவீத வாக்குகளைப் பெற்று, அடுத்த முதலமைச்சருக்கான போட்டியில் மூன்றாவது இடத்தில் இருக்கிறார்.

டிகே சிவகுமார்

கர்நாடக மாநில காங்கிரஸ் கமிட்டி தலைவர் டி.கே.சிவக்குமார் இந்தக் கருத்துக்கணிப்பில் 19 சதவீத வாக்குகளைப் பெற்று நான்காவது இடத்தைப் பிடித்துள்ளார். கர்நாடக முன்னாள் முதல்வரும், மதச்சார்பற்ற ஜனதா தளத்தின் மூத்த தலைவருமான எச்.டி.குமாரசாமிக்கு அடுத்த முதல்வருக்கான ரேஸில் 10 சதவீத ஆதரவு கிடைத்துள்ளது. தற்போதைய கர்நாடக முதல்வர் பசவராஜ் பொம்மை, இந்தக் கருத்துக்கணிப்பில் வெறும் 5 சதவீத வாக்குகளை மட்டுமே பெற்றுள்ளார்.

பசவராஜ் பொம்மை

தற்போதைய கர்நாடக முதல்வர் பசவராஜ் பொம்மை மீதான ஊழல் குற்றச்சாட்டுகளும், பாஜகவில் நிலவும் உட்கட்சிப் பூசல்களும் பாஜகவை பாதித்துள்ள சூழலிலும் கர்நாடகாவில் பாஜக ஆட்சி நீடிக்கவே வாக்காளர்கள் விரும்புகின்றனர் என்றும், பாஜக தனது முதலமைச்சர் வேட்பாளரை மாற்றினால் இந்த தேர்தலில் பாஜகவுக்கு சாதகமான பலன் கிடைக்கும் என வாக்காளர்கள் கருத்து தெரிவித்துள்ளதாகவும் இந்தக் கருத்துக்கணிப்பு முடிவுகளில் தெரிவிக்கப்பட்டுள்ளது.

English summary

Edupress group survey predicts that Yediyurappa is the most popular leader of Karnataka and 23 percent supported him as Chief Minister candidate.Interestingly, Chief Minister Basavarj Bommai could secure only 5 per cent of the vote share.