சித்தராமையாவிடம் திருமாவளவன் வைத்த முக்கிய டிமாண்ட்! கர்நாடகாவில் 'சீறப்போகும்' விடுதலை சிறுத்தைகள்!

கர்நாடக தேர்தல் களத்தில் கால் பதிக்க தயாராகும் விசிக.

Published: Tuesday, February 21, 2023, 10:31 [IST]

Subscribe to Oneindia Tamil

பெங்களூர்: கர்நாடக சட்டமன்றத் தேர்தல் நெருங்கும் நிலையில், விடுதலை சிறுத்தைகள் கட்சி தலைவர் திருமாவளவன் காங்கிரஸ் மூத்த தலைவர் சித்தராமையாவை நேரில் சந்தித்து பேசியிருப்பதுடன் சில முக்கிய டிமாண்ட்களையும் வைத்திருக்கிறார்.

கர்நாடக சட்டமன்றத் தேர்தலில் காங்கிரஸ் கூட்டணியில் இரண்டு அல்லது ஒரு தொகுதியை வாங்கிவிட வேண்டும் என்பது விடுதலை சிறுத்தைகள் கட்சியின் கணக்காக உள்ளது.

இது தொடர்பாக நாம் ஒன் இந்தியா தமிழில் ஓரிரு மாதங்களுக்கு முன்பு தனிச்செய்தி வெளியிட்டிருந்தோம். நாம் வெளியிட்ட செய்தியை உறுதிப்படுத்தும் வகையில் அடுத்தடுத்த அரசியல் நகர்வுகள் நடந்து வருகின்றன.

கர்நாடக தேர்தல்

224 சட்டமன்ற உறுப்பினர்களை கொண்ட கர்நாடகாவில், மீண்டும் ஆட்சியை தக்க வைக்க பாஜக பல்வேறு வியூகங்களை வகுத்து வருகிறது. இதனிடையே காங்கிரஸ் தரப்பிலும் பாஜகவை எதிர்கொள்வதற்கான செயல்திட்டங்கள் வகுக்கப்பட்டுள்ளன. சசிகாந்த் செந்தில் தலைமையிலான குழு இதற்காக ஒர்க் அவுட் செய்து வருகிறது. அதேபோல் தேர்தல் வியூக வகுப்பாளர் சுனில் டீமும் டி.கே.சிவக்குமாருடன் இணைந்து பணியாற்றி வருகிறது.

கூட்டணி பேச்சுவார்த்தை

தேர்தலுக்கு நாள் நெருங்கி வருவதால் கூட்டணிப் பேச்சுவார்த்தைகள் தீவிரமடைந்துள்ளன. அந்த வகையில் கர்நாடக சட்டசபை தேர்தலில் களமிறங்கும் ஐடியாவில் உள்ள விடுதலை சிறுத்தைகள் கட்சிக்கு காங்கிரஸ் கூட்டணியில் இரண்டு அல்லது ஒரு தொகுதியையாவது வாங்கிவிட வேண்டும் என விரும்புகிறார் திருமாவளவன். 2 நாட்களுக்கு முன்னர் காங்கிரஸ் மூத்த தலைவர் சித்தராமையாவை நேரில் சந்தித்து பேசிய போது தமிழர்கள் அதிகம் வசிக்கும் தொகுதி ஒன்றின் பெயரை குறிப்பிட்டு அதில் உள்ள தமிழர்கள் வாக்கு வங்கி பற்றி எடுத்துக் கூறியதாக தெரிவிக்கப்படுகிறது.

கட்சியின் அமைப்பு

கர்நாடகாவில் விசிகவின் கட்டமைப்பை பலப்படுத்தும் பணியில் ஈடுபட்டுள்ள திருமாவளவன் அவ்வப்போது பெங்களூருக்கு சென்று தனது கட்சி நிர்வாகிகளை சந்தித்து பேசி வருகிறார். இதேபோல் தனது பிரதிநிதிகளாக கட்சியின் உயர்மட்ட நிர்வாகிகளையும் அங்கு அனுப்பி வருகிறார். தினேஷ்குண்டுராவ், டிகே சிவக்குமார் ஆகியோருடன் சித்த ராமையா கலந்து ஆலோசனை செய்த பிறகு விசிக சீட் விவகாரத்தில் இறுதி முடிவு எடுக்கப்படும் எனத் தெரிகிறது.

எகிறும் எதிர்பார்ப்பு

கர்நாடக சட்டமன்றத் தேர்தலில் விடுதலை சிறுத்தைகள் கட்சி போட்டியிடும் திட்டத்தில் இருப்பதால் அடுத்தடுத்த அரசியல் நகர்வுகள் பல்வேறு எதிர்பார்ப்புகளை ஏற்படுத்தியுள்ளன.

Published On February 21, 2023