கர்நாடக சட்டசபை தேர்தல்: சித்தராமையாவை எதிர்த்து போட்டியிடும் பாஜக வேட்பாளர் யார்? எடியூரப்பா சூசகம்

பெங்களூர்: கர்நாடக சட்டசபை தேர்தல் தேதி அறிவிக்கப்பட்டுள்ள நிலையில், பாஜக காங்கிரஸ் கட்சிகள் வேட்பாளர்களை அறிவித்து வருகிறது. அந்த வகையில், காங்கிரசின் சித்தராமையாவிற்கு எதிராக தனது மகன் விஜேயந்திரா நிறுத்தப்பட வாய்ப்பு இருப்பதாக கர்நாடக பாஜகவின் முக்கிய தலைவரான எடியூரப்பா சூசகமாக தெரிவித்துள்ளார். இதனால் அந்த தொகுதி தற்போதே கவனம் பெற்றுள்ளது.

கர்நாடகாவில் தற்போது பாஜக ஆட்சி நடைபெற்று வருகிறது. முதல்வராக பசவராஜ் பொம்மை உள்ளார்.

கர்நாடக சட்டசபையின் பதவிக்காலம் வரும் மே மாதம் 24 ஆம் தேதி நிறைவு பெற உள்ள நிலையில், அங்கு வரும் மே மாதம் 10 ஆம் தேதி தேர்தல் நடைபெறும் என்ற அறிவிப்பை தேர்தல் ஆணையம் வெளியிட்டது.

சித்தராமையா போட்டி

மே 13 ஆம் தேதி வாக்கு எண்ணிக்கை நடைபெறுகிறது. தேர்தல் அறிவிப்புக்கு முன்பே கர்நாடகாவில் தேர்தல் களம் சூடுபிடித்தது. தேர்தல் தேதி அறிவிக்கப்படுவதற்கு முன்னதாகவே காங்கிரஸ் கட்சி 124 தொகுதிகளுக்கான தனது முதல் வேட்பாளர் பட்டியலை கடந்த வாரம் வெளியிட்டு இருந்தது. காங்கிரஸ் சார்பில் வருணா தொகுதியில் முன்னாள் முதல்வர் சித்தராமையா போட்டியிடுவதாக அறிவிப்பு வெளியானது.

வெற்றி எளிதாக இருக்காது

கர்நாடகாவில் காங்கிரஸ் கட்சியில் முக்கிய தலைவராக சித்தராமையா உள்ளார். கடந்த 2013 முதல் 2018 வரை காங்கிரஸ் ஆட்சிக்காலத்தில் முதல்வராக இருந்த சித்தராமையா தற்போது எதிர்க்கட்சி தலைவராக உள்ளார். இவர் தற்போது பாகல்கோட்டை மாவட்டம் பாதாமி தொகுதி எம்எல்ஏவாக இருந்து வரும் தேர்தலில் கோலார் தொகுதியில் போட்டியிடுவதாக அறிவித்தார். ஆனால் கோலார் தொகுதியில் கட்சி தலைவர்கள் இடையேயான கருத்து வேறுபாட்டால் சித்தராமையாவின் வெற்றி எளிதாக இருக்காது என சொல்லப்பட்டது.

பாஜக வேட்பாளர் யார்

இதனால் சித்தராமையாவின் சொந்த தொகுதியான வருணாவில் போட்டியிடும்படி காங்கிரஸ் மேலிடம் அறிவுறுத்தியது. இதற்கு சித்தராமையாவும் ஒப்புக்கொண்டதாகவும் கட்சி வட்டாரத்தில் தகவல் வெளியானது. அதன்பிறகே வருணா தொகுதியில் சித்தராமையா போட்டியிடுவதாக அறிவிக்கப்பட்டது. சித்தராமையா வருணா தொகுதியில் போட்டியிடுவதாக அறிவிப்பு வெளியானதில் இருந்தே அந்த தொகுதியில் பாஜக சார்பில் நிறுத்தப்படும் வேட்பாளர் என்ற பேச்சு அரசியல் வட்டாரத்தில் பலமாக எழுந்நது.

விஜேயந்திரா நிறுத்தப்படுகிறார்?

தற்போது வருணா தொகுதியில் சித்தராமையாவின் மகன் யாதிந்த்ரா எம்.எல்.ஏவாக உள்ளார். இதனால், சித்தராமையாவை வீழ்த்த காய் நகர்த்தி வரும் பாஜக சவாலான வேட்பாளரையே நிறுத்தும் என்று சொல்லப்பட்டது. இந்த நிலையில், சித்தராமையாவிற்கு எதிராக தனது மகன் விஜேயந்திரா நிறுத்தப்பட வாய்ப்பு இருப்பதாக கர்நாடக பாஜகவின் முக்கிய தலைவரான எடியூரப்பா சூசகமாக தெரிவித்துள்ளார். வருணா தொகுதியில் பிஒய் விஜேயந்திரா களம் இறக்கப்படுவாரா என்பது குறித்து முடிவு செய்ய உயர்மட்ட ஆலோசனைகள் நடப்பதாக எடியூரப்பா கூறினார்.

கவனம் பெறும் வருணா தொகுதி

தேர்தல் தேதியை தேர்தல் ஆணையம் அறிவித்ததும் அவசரமாக செய்தியாளர்கள் சந்திப்பு நடத்திய எடியூரப்பா இந்த தகவலை கூறினார். வருணா தொகுதியில் சித்தராமையாவை எதிர்த்து பாஜக சார்பில் விஜேயந்திரா வேட்பாளராக அறிவிக்கப்பட்டால் தொகுதியில் கடும் போட்டி நிலவும் எனவும் தெரிகிறது. வருணா தொகுதியில் இரு பெரும் தலைகள் மோதிக்கொள்ளும் சூழல் இருப்பதால் அந்த தொகுதி மீது இப்போதே அரசியல் நோக்கர்கள் பார்வை விழத் தொடங்கியுள்ளது.

English summary

As Karnataka assembly election date has been announced, BJP Congress parties are announcing their candidates. In that regard, Yeddyurappa, a prominent leader of the Karnataka BJP, has hinted that there is a possibility of his son Vijayendra being fielded against the Congress's Siddaramaiah. As a result, the block has gained immediate attention.