பெட்ரோல் விலை 96 காசு, டீசல் விலை 91 காசு குறைப்பு

டெல்லி: 3 மாதத்தில் 7வது முறையாக பெட்ரோல் விலை மீண்டும் குறைக்கப்பட்டுள்ளது. பெட்ரோல் விலை 96 காசுகள் குறைக்கப்பட்டுள்ளது. அதே போல டீசல் விலையும் 91 காசுகள் குறைக்கப்பட்டுள்ளது. டீசல் விலை கடந்த 2 மாதத்தில் 3வது முறையாக குறைக்கப்பட்டுள்ளது.

நேற்று நள்ளிரவு முதல் இந்த விலை மாற்றம் அமலுக்கு வந்தது.

சென்னையில் ஒரு லிட்டர் பெட்ரோல் விலை, 67.01 ரூபாயாக இருந்தது. இது, தற்போது 66.05 ரூபாயாக நிர்ணயிக்கப்பட்டுள்ளது. அதே போல், 56.84 ரூபாயாக இருந்த ஒரு லிட்டர் டீசல் விலை, 91 காசுகள் குறைக்கப்பட்டு, 55.93 ரூபாயாக நிர்ணயம் செய்யப்பட்டுள்ளது.

சர்வதேச அளவில், கச்சா எண்ணெய் விலை வீழ்ச்சி கண்டுள்ளதால், உள்நாட்டில், பெட்ரோல், டீசல் விலை குறைக்கப்பட்டுள்ளது.

கடந்த ஆகஸ்ட் முதல் தற்போது வரை, பெட்ரோல் விலை, 7 முறை குறைக்கப்பட்டுள்ளது.

கடந்த அக்டோபர் 18ம் தேதி, டீசல் மீதான விலை கட்டுப்பாடு நீக்கப்பட்டு அதன் விலை, லிட்டருக்கு 3.37 ரூபாய் குறைக்கப்பட்டது. நவம்பர் 1ம் தேதி, மீண்டும் டீசல் விலை லிட்டருக்கு, 2.25 ரூபாய் குறைக்கப்பட்டது.

தற்போது, 3வது முறையாக, டீசல் விலை குறைக்கப்பட்டுள்ளது.

இதற்கிடையே கடந்த நவம்பர் 13ம் தேதி மத்திய அரசு பெட்ரோல், டீசல் மீதான உற்பத்தி வரியை லிட்டருக்கு, 1.50 ரூபாய் உயர்த்தியது குறிப்பிடத்தக்கது.

English summary

State-run oil marketing companies have slashed petrol prices by 96 paise per litre from Monday and diesel prices by 91 paise. This is the seventh consecutive reduction in petrol prices in the last four months and the third cut in diesel prices since October 18 when the Cabinet deregulated the fuel.