ரிலையன்ஸ் வசம் போன மன்னா ஃபுட்ஸ்.. ரூ.156 கோடிக்கு தமிழக நிறுவனத்திடம் டீலை முடித்த அம்பானி!

சென்னை: தமிழ்நாட்டைச் சேர்ந்த சௌத்தர்ன் ஹெல்த் புட்ஸ் நிறுவனத்தை ரிலையன்ஸ் நிறுவனம் வாங்கியுள்ளது. இதன் மூலம் தென்னிந்தியாவில் புகழ்பெற்ற Manna தயாரிப்புகள் இனி ரிலையன்ஸ் வசமாகிறது. முகேஷ் அம்பானியின் ரிலையன்ஸ் நிறுவனம் சமீப காலமாகப் பல்வேறு நிறுவனங்களை வாங்கி வரும் நிலையில், சவுத் ஹெல்த் புட்ஸை இப்போது வாங்கியுள்ளது. இது குறித்து நாம் விரிவாகப் பார்க்கலாம்!

கச்சா எண்ணெய்யை வாங்கி பெட்ரோலாக அதை சுத்திகரித்து விற்பனை செய்வதும் ஏற்றுமதி செய்வதும் தான் ரிலையன்ஸ் நிறுவனத்தின் பிரதான வேலை. ஆனால், கச்சா எண்ணெய் டிமாண்ட் தொடர்ந்து குறைந்து வருவதால், ரிலையன்ஸ் நிறுவனம் கடந்த சில ஆண்டுகளாகவே வேறு பல துறைகளிலும் கவனம் செலுத்தி வருகிறது.

ரிலையன்ஸ்

கடந்த சில ஆண்டுகளுக்கு முன்பு தான் ஜியோவை ஆரம்பித்தது. அதன் பிறகு வரிசையாகப் பல்வேறு துறைகளிலும் ஜியோ மெல்ல நுழைந்து வருகிறது. சமீபத்தில் கூட அது கேம்பாகோலாவை லான்ச் செய்து விற்று வருகிறது. இப்படி கன்சியூமர் ப்ராடக்ட்ஸ் பிரிவில் ஜியோ தொடர்ந்து கவனம் செலுத்தி வருகிறது

இதற்கிடையே ரிலையன்ஸ் இண்டஸ்ட்ரீஸின் கன்சியூமர் ப்ராடக்ட்ஸ் பிரிவு இப்போது தமிழ்நாட்டின் புகழ்பெற்ற மன்னா பிராண்டின் தாய் நிறுவனமான சௌத்தர்ன் ஹெல்த் ஃபுட்ஸை வாங்கியுள்ளது. ரூ.156 கோடி ரூபாய் கொடுத்து ரிலையன்ஸ் இந்த டீலை முடித்துள்ளது. இதன் மூலம் ரிலையன்ஸ் கன்சியூமர் ப்ராடக்ட்ஸ் லிமிடெட், தனது உணவு மற்றும் அத்தியாவசியப் பொருட்கள் பிரிவைப் பலப்படுத்தியுள்ளது.

சௌத்தர்ன் ஹெல்த் புட்ஸ்

ரிலையன்ஸ் நிறுவனம் வரிசையாகப் பல்வேறு நிறுவனங்களை வாங்கி வரும் நிலையில், அந்த வரிசையில் சௌத்தர்ன் ஹெல்த் புட்ஸ் இணைந்துள்ளது. சமீபத்தில் தான் ரிலையன்ஸ் நிறுவனம் உதயம், இன்டிபென்டன்ஸ், சில் உள்ளிட்ட பிராண்டுகளை வாங்கியிருந்தது. இதன் மூலம் சிறுதானியம் மற்றும் ஹெல்த் உணவுப் பிரிவில் ரிலையன்ஸ் கவனம் செலுத்தப் போவது தெளிவாகத் தெரிகிறது.

கடந்த 20 ஆண்டுகளுக்கும் மேலாக மன்னா பிராண்டு, தமிழகம் மற்றும் அண்டை மாநிலங்களில் ஆரோக்கியமான உணவுப் பொருட்களை உற்பத்தி செய்வதில் முன்னணி நிறுவனமாக இருக்கிறது.. இந்தியர்கள் இப்போது ஆரோக்கியமான, சத்தான உணவுகளை நாடுவதால் சமீபத்திய ஆண்டுகளில் இந்தப் பிரிவுகள் பெரும் வளர்ச்சியடைந்துள்ளன.

திட்டம் என்ன

குறைந்த விலையில் ஆரோக்கியமான உணவுப் பொருட்களுக்கான தேவை அதிகரித்து வருவதால், ரிலையன்ஸ் நிறுவனத்தின் இந்தத் தொடர் கையகப்படுத்தும் நடவடிக்கைகள் முக்கியத்துவம் பெறுகிறது. இந்த பொருட்களை நாடு முழுக்க சந்தைப்படுத்துவதன் மூலம் இந்த மார்கெட்டில் வலுவான இருப்பை உருவாக்குவதே ரிலையன்ஸின் திட்டம்

இது குறித்து ரிலையன்ஸ் கன்சியூமர் இயக்குநர் டி. கிருஷ்ணகுமார் கூறுகையில், "தமிழகத்தில் மன்னா, மிகவும் நம்பகமான ஆரோக்கிய பிராண்ட். சிறுதானிய உணவுகள், பானங்கள், குழந்தை உணவுகள் என அதன் தயாரிப்புகள் பிரபலமானவை. மன்னாவை வாங்கியதன் மூலம் எங்கள் பேக்கேஜ் உணவுப் பிரிவு வலுவடையும்" என்று அவர் தெரிவித்தார்.

மன்னா

சௌத்தர்ன் ஹெல்த் ஃபுட்ஸ் நிறுவனம் சிறுதானியங்கள், ஓட்ஸ், தானியம், ஹெல்த் மிக்ஸ், காலை உணவு மற்றும் உலர் பழங்கள் உள்ளிட்ட பல்வேறு வகையான உணவுப் பொருட்களை விற்பனை செய்கிறது. அதன் மன்னா பிராண்ட், சிறுதானிய மாவு, குழந்தை உணவு உள்ளிட்ட மிக்ஸ்களில் கவனம் செலுத்துகிறது. மன்னாவுக்கு எனத் தனி வாடிக்கையாளர்களே உள்ளதும் குறிப்பிடத்தக்கது.

English summary

Reliance Consumer Products buys Tamil Nadu-based Manna Foods(மன்னா புட்ஸை வாங்கிய ரிலையன்ஸ் நிறுவனம்): Reliance Acquires Manna Foods latest news in tamil.