வரலாறு முக்கியம் அமைச்சரே! 2021ல் கெத்தாக ஜெயித்த திமுக! அடிவாங்கிய அதிமுக! உற்சாக நாதக!
சென்னை: தமிழ்நாடு சட்டப்பேரவைத் தேர்தல் 2026 வாக்கு எண்ணிக்கை தொடங்கியுள்ள இந்த நேரத்தில், கடந்த 2021 தேர்தல் முடிவுகளை குறித்து பார்ப்போம். அந்த தேர்தலில் திமுக - அதிமுக , நாம் தமிழர் என மும்முனைப் போட்டி நிலவிய நிலையில், திமுக எளிதாக வென்றது.
2021ஆம் ஆண்டு நடைபெற்ற தேர்தல் பல காரணங்களால் மிகவும் முக்கியமானதாக இருந்தது. முன்னாள் முதல்வர்கள் கலைஞர் கருணாநிதி மற்றும் ஜெயலலிதா ஆகிய இரு பெரிய அரசியல் தலைவர்களின் மறைவுக்குப் பிறகு நடந்த முதல் சட்டமன்றத் தேர்தல் என்பதால், தமிழக அரசியலில் புதிய கட்டத்தை அது தொடங்கியது. மேலும், அப்போது கொரோனா கால கட்டுப்பாடுகள் இருந்த நிலையிலும் தேர்தல் சிறப்பாக நடத்தப்பட்டது.
அந்த தேர்தலில் மொத்த வாக்காளர்கள் சுமார் 6.29 கோடி இருந்தனர். இதில் 73.63 சதவீதம் வாக்குகள் பதிவானது குறிப்பிடத்தக்கது. திமுக கூட்டணி, அதிமுக கூட்டணி மற்றும் நாம் தமிழர் கட்சி ஆகியவற்றுக்கு இடையே மூன்று முனைப் போட்டி நிலவியது.
திமுக தலைவர் முக ஸ்டாலி தலைமையில் அந்தக் கட்சி முதன்முறையாக சட்டமன்றத் தேர்தலை சந்தித்தது. காங்கிரஸ், இடதுசாரி கட்சிகள், மதிமுக, விசிக உள்ளிட்ட 13 கட்சிகளுடன் வலுவான கூட்டணியை அமைத்து திமுக களம் இறங்கியது. மறுபுறம் அதிமுக தலைமையிலான கூட்டணியில் பாஜக, பாமக, தமிழ் மாநில காங்கிரஸ் உள்ளிட்ட கட்சிகள் இணைந்திருந்தன.
வாக்கு எண்ணிக்கை முடிவில், திமுக கூட்டணி 133 தொகுதிகளில் வெற்றி பெற்று தெளிவான பெரும்பான்மையுடன் ஆட்சியை கைப்பற்றியது. இதன் மூலம் இரண்டு தொடர்ச்சியான தோல்விகளுக்கு முற்றுப்புள்ளி வைத்து திமுக மீண்டும் ஆட்சிக்கு வந்தது. அதிமுக 66 இடங்களில் வெற்றி பெற்றது. கூட்டணி கட்சிகளான பாமக 5 இடங்களிலும், பாஜக 4 இடங்களிலும் வெற்றி பெற்றன.
அதே நேரத்தில், நாம் தமிழர் கட்சி எந்த தொகுதியிலும் வெற்றி பெறவில்லை என்றாலும், சுமார் 7 சதவீத வாக்குகளை பெற்று மாநிலத்தில் மூன்றாவது பெரிய கட்சியாக தன்னை நிலைநிறுத்தியது.
மொத்தத்தில், 2021 தேர்தல் தமிழக அரசியலில் ஒரு பெரிய திருப்புமுனையாக அமைந்தது. அந்த தேர்தல் முடிவுகள் தான் தற்போதைய அரசியல் சமன்பாடுகளுக்கும் அடிப்படையாக உள்ளன. இந்நிலையில், 2026 தேர்தல் முடிவுகள் அந்த நிலையை மாற்றுமா அல்லது தொடருமா என்பது இன்று வெளியாகும் முடிவுகளில் தெளிவாக தெரியவரும்.
Click it and Unblock the Notifications
Sign in with Google