இதான் 360 டிகிரி.. ரொம்ப பேசிக் இதெல்லாம்! அண்ணாமலைக்கு "பாடம்" எடுத்த பிடிஆர்.. இப்படி சொல்லிட்டாரே

Updated: Friday, May 27, 2022, 20:25 [IST]

Subscribe to Oneindia Tamil

சென்னை: திமுகவும் பாஜகவும் 360 டிகிரி எதிரி என்று அண்ணாமலை கூறிய கருத்துக்கு அமைச்சர் பிடிஆர் பழனிவேல் தியாகராஜன் பதிலடி கொடுத்துள்ளார்.

நேற்று பிரதமர் மோடி பல்வேறு திட்டங்களை நாட்டுக்கு அர்ப்பணிக்கும் நிகழ்வில் பங்கேற்பதற்காக மோடி வருகை புரிந்தார். ரூ.31,400 கோடி மதிப்பிலான திட்டங்களை அவர் நாட்டிற்கு அர்ப்பணித்தார்.

நீட், தமிழை ஆட்சி மொழியாக்குவது உள்ளிட்ட பல்வேறு கோரிக்கைகளை பிரதமர் மோடி முன் முதல்வர் ஸ்டாலின் மேடையில் எடுத்து வைத்தார். முக்கியமாக முதல்வர் ஸ்டாலினின் பேச்சு தேசிய அளவில் கவனம் பெற்றது.

மோடி

இந்த நிலையில் நேற்று பிரதமர் மோடியின் தமிழ்நாடு பயணம் குறித்து பேசிய அண்ணாமலை, முதல்வர் ஸ்டாலினின் பேச்சை விமர்சனம் செய்து இருந்தார். அதில் முதல்வர் ஸ்டாலின் அவையில் பேசிய விதம் சரியில்லை. தமிழ்நாடு முதலமைச்சரின் மோசமான நடத்தையால் நான் வெட்கப்படுகிறேன். முதல்வரும் நானும் கொள்கையில் 360 டிகிரி மாறுபட்டவர்கள் . 360 டிகிரி நாங்கள் திமுக எதிரிதான். ஆனால் அதற்காக முதல்வருக்கு உண்டான மரியாதையை கொடுக்காமல் இருக்க மாட்டோம்.

அண்ணாமலை விமர்சனம்

முதல்வர் பதவிக்கு என்று மரியாதை உள்ளது. அந்த மரியாதையை நாங்கள் கொடுப்போம். முதல்வருக்கு உண்டான மரியாதையை கண்டிப்பாக நாங்கள் வழங்குவோம். அதேபோல் பிரதமர் பதவிக்கு உண்டான மரியாதையை முதல்வர் ஸ்டாலின் வழங்கி இருக்க வேண்டும். ஆனால் அப்படி செய்யாமல் முதல்வர் ஸ்டாலின் எதோ கட்சி நிகழ்ச்சி போல பிரதமர் மோடி கலந்து கொண்ட நிகழ்ச்சியில் பேசி இருக்கிறார் என்று அண்ணாமலை குறிப்பிட்டு இருந்தார்.

360 டிகிரி

இந்த நிலையில் நெட்டிசன்கள் பலர் அண்ணாமலையின் இந்த 360 கருத்தை விமர்சனம் செய்து வருகிறார்கள். ஏனென்றால் 360 டிகிரி என்பது எதிர் எதிர் துருவம் கிடையாது. அதே ஒரு புள்ளியை குறிக்கும். அதாவது ஏ என்ற புள்ளிக்கு 360 என்பது அதே ஏ என்ற புள்ளிதான். இந்த நிலையில் அண்ணாமலைக்கு ஜியோமெட்ரி தெரியவில்லை என்று திமுகவினர் பலர் கடுமையாக கிண்டல் செய்து வருகின்றனர்.

பிடிஆர் பழனிவேல் தியாகராஜன்

திமுக மூத்த அமைச்சர் பிடிஆர் பழனிவேல் தியாகராஜனும் அண்ணாமலையை விமர்சனம் செய்துள்ளார். அவர் வெளியிட்டுள்ள கருத்தில், இதுதான் 360.. இது மிகவும் பேசிக் விஷயம் என்பதால் அதை யுபிஎஸ்சி தேர்வில் சேர்க்கவில்லை போல என்று பிடிஆர் கிண்டல் செய்துள்ளார். அண்ணாமலை முன்னாள் ஐபிஎஸ் அதிகாரி என்பதால் யுபிஎஸ்டி தேர்வை சுட்டிக்காட்டி பிடிஆர் விமர்சனம் செய்துள்ளார்.