எனது நண்பர் டெல்லி கணேஷ்.. அருமையான மனிதர் , அற்புதமான நடிகர்.. இரங்கல் தெரிவித்த நடிகர் ரஜினிகாந்த்
சென்னை: பழம்பெரும் நடிகர் டெல்லி கணேஷ் உடல்நலக் குறைவால் உயிரிழந்துள்ள சம்பவம் திரையுலகினர் அனைவரையும் பெரும் சோகத்தில் ஆழ்த்தியுள்ளது. இந்நிலையில், நடிகர் டெல்லி கணேஷ் மறைவிற்கு நடிகர் ரஜினிகாந்த் இரங்கல் தெரிவித்துள்ளார்.
தமிழ் திரையுலகில் நடிப்பால் தனக்கென தனி முத்திரையை பதித்தவர் நடிகர் டெல்லி கணேஷ். வயது முதிர்வு மற்றும் உடல்நலக்குறைவு காரணமாக நடிகர் டெல்லி கணேஷ் (80) நேற்று இரவு காலமானார். கடந்த 3 நாட்களாக அவருக்கு உடல்நிலை சரியில்லாமல் இருந்துள்ளது. இதையடுத்து, அடிக்கடி மருத்துவமனையில் அனுமதிக்கப்பட்டு சிகிச்சை பெற்று வந்த நிலையில், மூன்று நாட்களுக்கு முன் அவரின் உடல்நிலை மோசமானது.
இந்நிலையில், நேற்று இரவு 9 மணிக்கு உறங்கச் சென்ற நிலையில் 11.30 மணியளவில் உயிரிழந்துள்ளார். அவரது மறைவிற்கு தமிழ்நாடு முழுக்க திரைப் பிரபலங்கள் பலரும் இரங்கல் தெரிவித்து வருகின்றனர். குணச்சித்திர கதாப்பாத்திரங்கள், காமெடி, வில்லன் என அனைத்து கதாபாத்திரத்திலும் தனது அசாத்திய நடிப்பின் மூலம் மக்கள் மனதில் இடம்பிடித்தவர்.
தூத்துக்குடி மாவட்டம், வல்லநாடு டெல்லி கணேஷின் சொந்த ஊராகும். இந்திய விமானப்படையில் டெல்லி கணேஷ் பணியாற்றி வந்த நிலையில், திரைத் துறையின் மேல் கொண்ட ஆர்வம் காரணமாக அப்பணியை உதறிவிட்டு திரைத் துறைக்கு வந்தவர். இயக்குநர் கே.பாலச்சந்தரால் டெல்லி கணேஷ் என்று அன்போடு அழைக்கப்பட்டவர் சுமார் 400க்கு மேற்பட்ட படங்களில் நடித்துள்ளார்.
டெல்லி கணேஷின் மறைவுக்கு திரைப் பிரபலங்கள், அரசியல் கட்சியினர் என அனைத்து தரப்பினரும் இரங்கலைத் தெரிவித்து வருகின்றனர். முதல்வர் மு.க.ஸ்டாலின் அவர்களும் இரங்கல் தெரிவித்துள்ளார். இதைத்தொடர்ந்து, நடிகர் ரஜினிகாந்த் டெல்லி கணேஷுக்கு இரங்கல் தெரிவித்துள்ளார்.
இதுகுறித்து, அவர் எக்ஸ் தள பக்கத்தில் தெரிவித்துள்ளதாவது; "என்னுடைய நண்பர் டெல்லி கணேஷ் அருமையானதொரு மனிதர். அற்புதமான நடிகர். அவருடைய மறைவு செய்தி கேட்டு நான் மனம் வருந்துகிறேன். அவருடைய குடும்பத்தினருக்கும், நண்பர்களுக்கும் என்னுடைய அனுதாபங்களைத் தெரிவித்துக் கொள்கிறேன்" தெரிவித்துள்ளார்.
Click it and Unblock the Notifications
Sign in with Google