என் வாழ்நாளில் ஆர்எம் வீரப்பனை மறக்கவே முடியாது! நேரில் அஞ்சலி செலுத்திய நடிகர் ரஜினிகாந்த் உருக்கம்

Updated: Tuesday, April 9, 2024, 21:12 [IST]

Subscribe to Oneindia Tamil

சென்னை: ஆர் எம் வீரப்பன் எப்போதுமே பணத்திற்கு பின்னால் போனதே இல்லை. என் வாழ்நாளில் ஆர்எம் வீரப்பனை மறக்கவே முடியாது என்று நேரில் அஞ்சலி செலுத்திய பிறகு ரஜினிகாந்த் உருக்கமாக பேட்டியளித்தார்.

மறைந்த முதல்வர்கள் எம்ஜிஆர், கருணாநிதி உள்ளிட்டோரிடம் மிக நெருக்கமாக இருந்த முன்னாள் அமைச்சர் ஆர்.எம்.வீரப்பன் சென்னையில் இன்று காலமானார். அவருக்கு வயது 98. முதுமை காரணமாக அரசியல் வாழ்க்கைக்கு ஓய்வு கொடுத்துவிட்டு, சென்னை தியாகராயநகரில் உள்ள தனது வீட்டில் ஓய்வு எடுத்து வந்த அவருக்கு திடீரென்று முச்சுத்திணறல் ஏற்பட்டது.

Actor Rajinikanth pays tribute to RM Veerappan

இதையடுத்து, சென்னை கிரீம்ஸ் சாலையில் உள்ள அப்பல்லோ மருத்துவமனையில் அவர் அனுமதிக்கப்பட்டார். அங்கு அவருக்கு தீவிர சிகிச்சை அளிக்கப்பட்டு வந்த நிலையில், இன்று பிற்பகல் சிகிச்சை பலனளிக்காமல் உயிரிழந்தார். ஆர் எம் வீரப்பன் மறைவுக்கு அரசியல் தலைவர்கள் இரங்கல் தெரிவித்து வருகிறார்.

சென்னை தியாகராய நகரில் உள்ள ஆர் எம் வீரப்பன் இல்லத்தில் பொதுமக்கள் அஞ்சலிக்காக அவரது உடல் வைக்கப்பட்டது. அரசியல் தலைவர்கள், பொதுமக்கள் என பல்வேறு தரப்பினரும் ஆர் எம் வீரப்பனுக்கு அஞ்சலி செலுத்தி வருகிறார்கள்.

அந்த வகையில், நடிகர் ரஜினிகாந்தும் ஆர் எம் வீரப்பன் உடலுக்கு நேரில் சென்று அஞ்சலி செலுத்தினார். பின்னர் செய்தியாளர்களுக்கு பேட்டி அளித்த ரஜினிகாந்த் கூறியதாவது:- முழு வாழ்க்கையை வாழ்ந்து நம்மை விட்டு பிரிந்து இருக்கிறார் உத்தமர் ஆர்.எம். வீரப்பன். எம்ஜிஆரின் தனிப்பட்ட வாழ்க்கையிலும் சரி.. சினிமா வாழ்க்கையிலும் சரி.. அரசியல் வாழ்க்கையிலும் சரி..

அவருக்கு வலது கையாக இருந்தவர் ஆர்.எம் வீரப்பன். அவரால் உருவாக்கப்பட்ட பல சிஷ்யர்கள் மத்திய மாநில அமைச்சர்களாக ஆகி கல்வி அதிபர்களாக ஆகி பேரும் புகழும் பணத்தோடு இப்போதும் வலம் வந்து கொண்டு இருக்கிறார்கள். ஆர் எம் வீரப்பன் எப்போதுமே பணத்திற்கு பின்னால் போனதே இல்லை.

கடமை கண்ணியம் கட்டுப்பாடு என்பதை கடைபிடித்து வாழ்ந்தவர். எனக்கும் அவருக்குமான நட்பு மிக ஆழமானது.. உணர்ச்சிகரமானது.. புனிதமானது. என் வாழ்நாளில் அவரை நான் மறக்கவே முடியாது. அவரை இழந்து வாடும் குடும்பத்தினருக்கும் அவர் சம்பந்தப்பட்ட அனைவருக்கும் எனது ஆழ்ந்த இரங்கல்கள். இவ்வாறு அவர் கூறினார்.