robo Shankar: விடை பெற்றார் ரோபோ சங்கர்! விண்ணுலகத்தினரை சிரிக்க வைக்க புறப்பட்டார்! கண்ணீரில் ரசிகர்கள்!
சென்னை: பிரபல நகைச்சுவை நடிகர் ரோபோ சங்கர் உயிரிழந்த நிலையில் அவரது உடல் வளசரவாக்கத்தில் உள்ள பிருந்தாவன் காலனியில் மின்மயானத்தில் தகனம் செய்யப்பட்டது. முன்னதாக ரோபோவின் இறுதி ஊர்வலத்தில் திரைப் பிரபலங்கள், நண்பர்கள் உள்ளிட்டோர் கண்ணீர் மல்க கலந்து கொண்டனர்.
GEM மருத்துவமனை வெளியிட்ட அறிக்கையின்படி, ரோபோ சங்கர் செப்டம்பர் 16, 2025 அன்று, "கடுமையான இரைப்பை குடல் இரத்தப்போக்கு மற்றும் சிக்கலான வயிற்றுப் பிரச்சனை காரணமாக ஏற்பட்ட பல உறுப்பு செயலிழப்பு" காரணமாக ஆபத்தான நிலையில் அனுமதிக்கப்பட்டார். தீவிர சிகிச்சைப் பிரிவில் தீவிர சிகிச்சை அளிக்கப்பட்ட போதிலும், அவரது உடல்நிலை மோசமடைந்து செப்டம்பர் 18 அன்று இரவு 9:05 மணிக்கு காலமானார்.
அவருடைய உடலுக்கு அரசியல் பிரபலங்கள், திரைப்பிரபலங்கள், நண்பர்கள் என நேரில் கண்ணீர் அஞ்சலி செலுத்தினர். எம்பிக்கள் கமல்ஹாசன், திருமாவளவன், அமைச்சர் மா சுப்பிரமணியன், நாம் தமிழர் கட்சியின் சீமான் உள்ளிட்டோர் நேரில் போய் அஞ்சலி செலுத்தினர்.
இதையடுத்து மாலை 4 மணிக்கு ரோபோ சங்கரின் இறுதி ஊர்வலம் புறப்பட்டது. ராதா அவென்யூவில் இருந்த வீட்டில் இருந்து இரண்டரை கிலோ மீட்டர் தொலைவில் உள்ள வளசரவாக்கத்தில் பிருந்தாவன் காலனியில் உள்ள மின் மயானத்தில் அவருடைய உடல் தகனம் செய்யப்பட்டது. அப்போது மனைவி பிரியங்கா, மகள் இந்திரஜா, மாப்பிள்ளை கார்த்திக் உள்ளிட்டோர் கலங்கி அழுதது காண்போரை கலங்கடித்தது.
ரோபோ சங்கர் - கமல்ஹாசன்
இவரது மறைவுச் செய்தி வெளியானவுடன், திரையுலகினர் பலரும் இரங்கல் தெரிவித்து வருகின்றனர். நடிகர் மற்றும் அரசியல்வாதியான கமல்ஹாசன் தனது ட்விட்டர் பக்கத்தில், "ரோபோ சங்கர் என்பது வெறும் புனைப்பெயர். என் அகராதியில் நீ மனிதன். ஆகையால் என் தம்பி. அப்படியென்றால் என்னை விட்டுவிட்டு போய்விடுவாயா? நீ போனாய், உன் வேலை முடிந்தது. என் வேலை இன்னும் முடியவில்லை. நீ எங்களுக்கு நாளை விட்டுச் செல்கிறாய். ஆகையால் நாளை எங்களுடையது," என்று உருக்கமாகப் பதிவிட்டிருந்தார்.
நடிகை ராதிகா சரத்குமார், ரோபோ ஷங்கரின் கடின உழைப்பையும் நகைச்சுவை உணர்வையும் நினைவு கூர்ந்தார். "எல்லோரையும் தனது நகைச்சுவையால் மகிழ்வித்தவர். தன்னுடைய சிறந்த பங்களிப்பை வழங்க மிகவும் கடுமையாக உழைத்தார். இது ஒரு மிகப்பெரிய இழப்பு. அவரது குடும்பத்தினருக்கும் நண்பர்களுக்கும் எனது ஆழ்ந்த இரங்கலையும் பிரார்த்தனைகளையும் தெரிவித்துக் கொள்கிறேன்" என்று கூறினார்.
ரோபோ சங்கர் மரணம்
தமிழக முதல்வர் மு.க. ஸ்டாலின் தனது இரங்கல் செய்தியில், "மேடை நாடகங்களில் தொடங்கி, தொலைக்காட்சி மற்றும் சினிமாவில் தனது பயணத்தைத் தொடங்கி, தமிழக மக்களை மகிழ்வித்தவர். அவரது மறைவுக்கு எனது ஆழ்ந்த இரங்கலையும், அவரது குடும்பத்தினருக்கும், திரையுலகினருக்கும் எனது அனுதாபங்களையும் தெரிவித்துக் கொள்கிறேன்" என்று குறிப்பிட்டிருந்தார்.
நடிகை வரலட்சுமி சரத்குமார், ரோபோ ஷங்கரின் மரணம் அதிர்ச்சி அளிப்பதாகக் கூறி, அவருடன் பேசிய அழைப்புப் பதிவின் ஸ்கிரீன்ஷாட்டைப் பகிர்ந்தார். "நான் ஞாயிற்றுக்கிழமை அவரிடம் பேசினேன், இப்போது அவர் இல்லை... மிகவும் திடீர். என்னால் இதை நம்ப முடியவில்லை" என்று பதிவிட்டிருந்தார்.
சிம்ரன், ரோபோ ஷங்கரை "மில்லியன் கணக்கான முகங்களில் புன்னகையை வரவழைத்த ஒரு திறமைசாலி" என்று நினைவு கூர்ந்தார். நடிகர் சிலம்பரசன் (சிம்பு), "எப்போதும் சிரிப்பைப் பகிர்ந்த ஒருவரை இழப்பது மிகவும் வேதனையானது. அவர் எங்களிடத்தில் விட்டுச் சென்ற புன்னகைகள் நினைவுகளாக என்றென்றும் நிலைத்திருக்கும்" என்று தனது இரங்கல் செய்தியில் தெரிவித்தார்.
ரோபோ சங்கர் சினிமா
ரோபோ சங்கர் , தனுஷுடன் நடித்த 'மாரி', விஷாலுடன் நடித்த 'இரும்புத்திரை', விஷ்ணு விஷாலுடன் நடித்த 'வெள்ளைனு வந்துட்டா வெள்ளைக்காரன்' போன்ற படங்களில் தனது தனித்துவமான நகைச்சுவை நடிப்பால் பிரபலமானார். 'கிங்ஸ் ஆஃப் காமெடி ஜூனியர்ஸ்', 'கன்னித் தீவு', 'செம்பருத்தி', 'டாப் குக்கு டூப் குக்கு சீசன் 2' போன்ற தொலைக்காட்சி நிகழ்ச்சிகளிலும் அவர் பிரபலமானவர்.
நவீத் எஸ் ஃபரீத் எழுதி இயக்கிய 'சொட்ட சொட்ட நனைவுது' என்ற திரைப்படத்தில் கடைசியாக ரோபோ சங்கர் நடித்திருந்தார். உடல்நலக்குறைவால் அவதிப்பட்டு வந்த அவர், ஒரு படப்பிடிப்புத் தளத்தில் மயங்கி விழுந்ததாகக் கூறப்படுகிறது. உடனடியாக தனியார் மருத்துவமனைக்கு கொண்டு செல்லப்பட்ட போதிலும், சிகிச்சை பலனின்றி உயிரிழந்தார்.
ரோபோ ஷங்கர் தனது மனைவி பிரியங்கா மற்றும் விஜய்யுடன் 'பிகில்' படத்தில் நடித்த மகள் இந்திரஜா ஆகியோரை விட்டுச் சென்றுள்ளார். அவரது திடீர் மறைவு தமிழ் திரையுலகில் பெரும் அதிர்ச்சியையும் துயரத்தையும் ஏற்படுத்தியுள்ளது.
Click it and Unblock the Notifications
Sign in with Google