அதே நாள்.. லைட்டை பூரா தன் பக்கம் திருப்பிய விஜய்! அரசியல் என்ட்ரிக்கு ‘அஸ்திவாரம்’: அதிரும் களம்!

சென்னை : நடிகர் விஜய் அரசியலுக்கு வருவார் என்பது தொடர்பாக பல்வேறு பேச்சுகள் இருந்துவரும் நிலையில், மே 28ஆம் தேதி ஒரு மாஸ் பிளானுக்கு அச்சாரம் போட்டுள்ளார் விஜய். நாடாளுமன்றம் திறக்கும் அதே நாளில் அத்தனை பேரையும் தன் பக்கம் திருப்பும் வகையில் ஒரு திட்டம் தீட்டியுள்ளார் விஜய்.

தமிழ்நாட்டின் 234 தொகுதிகளிலும் இலவச மதிய உணவு வழங்க விஜய் மக்கள் இயக்கம் ஏற்பாடு செய்துள்ளது. அதன்படி 'தளபதி விஜய் ஒரு நாள் மதிய உணவு சேவையகம்' என்ற திட்டம் மூலம் உலக பட்டினி தினமான மே 28ஆம் தேதி காலை 11 மணி முதல் இலவச மதிய உணவு வழங்கப்பட இருக்கிறது.

மே 28 : தமிழ்நாடு மட்டுமின்றி புதுச்சேரி, கேரளா, கர்நாடகா, ஆந்திரா, மகாராஷ்டிரா உள்ளிட்ட மாநிலங்களிலும் விஜய் மக்கள் இயக்கம் உணவு வழங்க ஏற்பாடு செய்யப்பட்டுள்ளதாக அறிவிக்கப்பட்டுள்ளது. அன்றைய தினம் பிரதமர் மோடி புதிய நாடாளுமன்ற கட்டடத்தைத் திறந்து வைக்க உள்ளது குறிப்பிடத்தக்கது.

நேரடியாக அரசியலில் இறங்குவதாக விஜய் அறிவிக்காவிட்டாலும், கடந்த ஊரக மற்றும் நகர்ப்புற உள்ளாட்சித் தேர்தலில் கணிசமான இடங்களில் விஜய் மக்கள் இயக்கம் சார்பில் போட்டியிட்டவர்கள் வெற்றி பெற்றனர். அவர்களை நேரில் அழைத்துச் சந்தித்து வாழ்த்து தெரிவித்தார் விஜய்.

விஜய் அரசியல் : அண்மையில், விஜய் மக்கள் இயக்கத்தில் புதிய உறுப்பினர்களைச் சேர்க்கும் பணி தீவிரப்படுத்தப்பட்டுள்ளது. கடந்த ஏப்ரல் 15-ஆம் தேதி முதல் ஒவ்வொரு மாவட்டமாக விஜய் மக்கள் இயக்க நிர்வாகிகள் ஆலோசனை கூட்டம் விஜய் மக்கள் இயக்க பொதுச் செயலாளர் புஸ்ஸி ஆனந்த் தலைமையில் நடைபெற்று வருகிறது.

கடந்த ஏப்ரல் 14ஆம் தேதி சட்டமேதை அம்பேத்கரின் 132வது பிறந்த நாள் விழாவையொட்டி அம்பேத்கரின் சிலைக்கு, மாலை அணிவித்து மரியாதை செலுத்த வேண்டும் என்று அனைத்து மாவட்ட நிர்வாகிகளுக்கும் நடிகர் விஜய் உத்தரவிட்டிருந்தார். அதன்படி, விஜய் மக்கள் இயக்கத்தினர் தமிழ்நாடு முழுவதும் அம்பேத்கர் சிலைகளுக்கு மரியாதை செலுத்தினர்.

பிளான் ரெடி : இந்நிலையில் தான், மே 28ஆம் தேதி அனைத்து இடங்களிலும், இலவச மதிய உணவு வழங்க விஜய் உத்தரவிட்டுள்ளார். பசி என்னும் பிணியைத் தீர்ப்போம் என்கிற நோக்கத்துடன் ஏழை எளியோருக்கு உணவு வழங்கும் விழிப்புணர்வை ஏற்படுத்தும் வகையில் களத்தில் இறங்கியிருக்கிறார் விஜய்.

அண்மையில் நடந்த விஜய் மக்கள் இயக்க நிர்வாகிகள் கூட்டத்தில் பொதுச் செயலாளர் புஸ்ஸி ஆனந்த் முக்கிய ஆலோசனைகளை வழங்கியதாக தகவல் வெளியானது. திராவிட கட்சிகளுக்கு மாற்றாக விஜய் மக்கள் இயக்கத்தின் அரசியலும், செயல்பாடுகளும் இருக்க வேண்டும் என்று விஜய் திட்டமிட்டிருப்பதாக அவர் கூறியதாக தகவல் வெளியானது.

அரசியல் அஸ்திவாரம் : வரும் காலத்தில் அரசியல் களத்தில் தீவிரமாகச் செயல்படும் வகையில் விஜய் மக்கள் இயக்கத்தினர் ஆயத்தமாக இருக்க வேண்டும், அரசியல் இயக்கத்திலும் செயல்படக்கூடாது என்றும் புஸ்ஸி ஆனந்த் நிர்வாகிகளுக்கு அறிவுறுத்தியதாக கூறப்பட்டது. இந்நிலையில் தான் புஸ்ஸி ஆனந்த், இந்த இலவச மதிய உணவு திட்ட அறிவிப்பை வெளியிட்டுள்ளார்.

பிரதமர் மோடி, புதிய நாடாளுமன்ற கட்டிடத்தை மே 28ஆம் தேதி திறந்து வைக்க இருப்பது பெரும் எதிர்பார்ப்புகளைக் கிளப்பி இருக்கும் சூழலில், அன்றைய தினமே தன்மீது கவனம் பதியும்படி மாஸான சம்பவத்திற்கு திட்டமிட்டுள்ளார் விஜய். விஜய்யின் அரசியல் என்ட்ரிக்கு இந்த சம்பவமே வலுவான அஸ்திவாரமாக இருக்கும் என்ற பேச்சுகள் இப்போதே எழுந்துள்ளன.

English summary

While there are various talks about actor Vijay entering politics, Vijay has announced a mass plan on May 28. On the same day as new Parliament opening ceremony, Vijay has made a plan to turn all the people to his side.