சவால்களை சமாளிக்க.. நடிகர் விஜயின் அரசியல் வருகை குறித்து ஓபிஎஸ் சொல்வதை பாருங்க

சென்னை: புதிய கட்சி தொடங்கியிருக்கும் நடிகர் விஜய்க்கு எங்களுடைய இதயப்பூர்வமான வாழ்த்துக்கள் என்றும், எதிர்வரும் சவால்களை சமாளித்து விஜய் தமிழக அரசியலில் வலம் வருவார் என்றும் ஓ பன்னீர் செல்வம் கூறினார்.

வெற்றி என்ற தனது தந்தை சந்திரசேகர் இயக்கிய திரைப்படத்தில் குழந்தை நட்சத்திரமாக அறிமுகமான நடிகர் விஜய தற்போது அதே பெயரை வைத்து, தமிழக வெற்றி கழகம் என்று அரசியல் கட்சியை ஆரம்பித்துள்ளார். விஜய் அரசியலுக்கு வருவாரா?.. இல்லையா?.. என்ற கேள்விக்கும் இன்று முற்றுப்புள்ளி வைத்து அதிகாரப்பூர்வ அறிவிப்பை வெளியிட்டுள்ளார் நடிகர் விஜய்.

தந்தையின் இயக்கத்தில் முதலில் சிறு சிறு வேடங்களில் குழந்தை நட்சத்திரமாக நடித்துக்கொண்டிருந்த விஜய், தந்தையின் இயக்கத்தில் வெளியான நாளைய தீர்ப்பு என்று படத்தின் மூலம் நடிகராக அறிமுகம் ஆனார். ஆரம்பத்தில் அவரது படங்கள் பெரிய வெற்றியடையாவிட்டாலும் விஜயின் தொடர் முயற்சியாலும், உழைப்பாலும் மக்கள் கொண்டாடும் நடிகர்களில் ஒருவராக உருவெடுத்தார்.

அரசியலுக்கு வந்தார் விஜய்: தொடர்ந்து தமிழ் திரையுலகின் டாப் நட்சத்திரம் என்ற அந்தஸ்தை பெற்றார் விஜய். தமிழகத்தில் விஜய் படம் வெளியாகும் போதெல்லாம் ரசிகர்கள் திருவிழா போல கொண்டாடி வருகிறார்கள். ஆரம்பத்தில் இருந்தே ரசிகர்களை மதித்து வரும் நடிகர் விஜய், தனது நடிகர் சங்கத்தை மக்கள் இயக்கமாக மாற்றி பல்வேறு நலத்திட்டங்களை செய்து வருகிறார். இதனால், விஜய் விரைவில் அரசியலுக்கு வரலாம் என்று கடந்த சில ஆண்டுகளாகவே பேசப்பட்டு வந்தது.

மேலும் தான் நடிக்கும் படங்களிலும் அரசியல் கலந்த வசனங்கள் இருந்து வந்தது. இதேபோல் கடந்த சில மாதங்களாக நடிகர் விஜயின் செயல்பாடுகள் அவரது அரசியல் வருகையை உறுதிப்படுத்தும் விதமாகவே இருந்தது. தொடர்ந்து தனது மக்கள் இயக்க நிர்வாகிகளை சந்தித்து ஆலோசனை செய்து கொண்டு இருந்தார். இதனால், வரும் 2026 சட்டமன்ற தேர்தலில் விஜய் அரசியலுக்கு வருவது உறுதி என அவரது ரசிகர்கள் கூறி வந்தனர்.

தமிழக வெற்றி கழகம்: இந்த நிலையில் தான் தனது அரசியல் வருகையை நடிகர் விஜய் இன்று அதிகாரப்பூர்வமாக உறுதி செய்துள்ளார். "தமிழக வெற்றி கழகம்" என்ற பெயரில் கட்சியை தொடங்கியிருக்கும் விஜய், வரும் 2026 சட்டமன்ற தேர்தல்தான் இலக்கு என்றும் நாடாளுமன்ற தேர்தலில் போட்டியில்லை.. யாருக்கும் ஆதரவு இல்லை என்றும் அறிவித்து இருக்கிறார். நடிகர் விஜய் அரசியலுக்கு வந்தது குறித்து தமிழக அரசியல் தலைவர்கள் வாழ்த்துக்களை தெரிவித்து வருகின்றனர்.

சவால்களை சமாளித்து: இந்த நிலையில், முன்னாள் முதல்வர் ஓ பன்னீர் செல்வமும் நடிகர் விஜய் புதிய கட்சி தொடங்கியிருப்பதற்கும் வாழ்த்துக்களையும், எதிர்வரும் சவால்களை சந்தித்து தமிழக அரசியலில் விஜய் வலம் வருவார் என்றும் தெரிவித்துள்ளார். இது தொடர்பாக செய்தியாளர்கள் சந்திப்பின் போது ஓ பன்னீர் செல்வம் கூறியதாவது:-

சிறந்த திரைப்பட நடிகர் விஜய் புதிய கட்சியை தொடங்கியிருக்கிறார். புதிய கட்சி தொடங்கியிருக்கும் நடிகர் விஜய்க்கு எங்களுடைய இதயப்பூர்வமான வாழ்த்துக்களை தெரிவித்துக்கொள்கிறேன். எதிர் வரும் சவால்களை சமாளித்து விஜய் தமிழக அரசியலில் வலம் வருவார் என்பதை தெரிவித்துக்கொள்கிறோம். இவ்வாறு ஓ பன்னீர் செல்வம் கூறினார்.

English summary

O Panneer Selvam said that our heartiest congratulations to actor Vijay who has started a new party, and that Vijay will overcome the upcoming challenges and enter Tamil Nadu politics.