வருங்கால முதலமைச்சர் உதயநிதி ஸ்டாலின்! ரொம்ப பொறுப்புமிக்க தம்பி! நடிகர் விஜயகுமார் ஆருடம்!
சென்னை: உதயநிதி ஸ்டாலினை வருங்கால முதலமைச்சர் என ஆருடம் கூறிய நடிகர் விஜயகுமார், எந்த பொறுப்பைக் கொடுத்தாலும் சிறப்பாக செயல்படக் கூடியவர் அவர் என புகழாரம் சூடியுள்ளார்.
சென்னையில் நேற்று நடைபெற்ற மாமன்னன் திரைப்பட ஆடியோ வெளியீட்டு விழாவில் பேசிய அவர் இதனைக் கூறினார். எம்.ஜி.ஆர். அமைச்சராக இருந்த போது அவர் நடித்த கடைசி திரைப்படத்தில் தாம் நடித்திருப்பதாகவும் அதேபோல் இப்போது உதயநிதி அமைச்சராக இருக்கும் நிலையில் அவர் நடித்துள்ள கடைசி படத்திலும் தாம் நடித்திருப்பதாக நடிகர் விஜயகுமார் தெரிவித்தார்.
அன்றைய முதலமைச்சருடனும் தாம் நடித்திருக்கிறேன் வருங்கால முதலமைச்சருடனும் தாம் நடித்திருக்கிறேன் என்றும் இது யாருக்கும் கிடைக்காத வாய்ப்பு எனவும் பேசினார். அமைச்சர் உதயநிதி ஸ்டாலினை பொறுத்தவரை எந்தவொரு காரியத்தையும் ஏனோ தானோ என்று செய்யமாட்டார் என்றும் மிகுந்த பொறுப்புடன் சிறப்பாக செயல்படக் கூடியவர் எனவும் பாராட்டினார்.
நடிகர் விஜயகுமாரின் இந்த பேச்சு சினிமா வட்டாரத்தில் மட்டுமல்ல அரசியல் ரீதியாகவும் முக்கியத்துவம் வாய்ந்ததாக கருதப்படுகிறது. உதயநிதி ஸ்டாலினுக்கு துணை முதலமைச்சர் பதவி கொடுக்கப்படலாம் என கூறப்படும் நிலையில் நடிகர் விஜயகுமார் அவரை முதலமைச்சராகவே ஆவார் என குறிப்பிட்டுள்ளார்.
இதனிடையே மாமம்மன் ஆடியோ ரிலீஸ் விழாவில் பங்கேற்ற பிறகு செய்தியாளர்களை சந்தித்த முதலமைச்சர் ஸ்டாலினின் மருமகன் சபரீசன், சினிமாவை விட உதயநிதிக்கு வேறு சில முக்கிய பொறுப்புகள் நிறைய இருப்பதாக தெரிவித்திருந்தார். தற்போது உதயநிதி வசம் சிறப்புத் திட்ட செயலாக்கத்துறை இருப்பதால் துணை முதல்வருக்கு நிகரான பதவி என கடந்த ஆண்டு திருச்சியில் நடைபெற்ற அரசு விழாவில் அமைச்சர் அன்பில் மகேஷ் கூறியிருந்தார்.
Click it and Unblock the Notifications
Sign in with Google