விஜய் அரசியல் என்ட்ரியே அதிரிபுதிரி.. தமிழக வெற்றிக் கழகம் உறுப்பினர் சேர்க்கை செயலி முடங்கியது

சென்னை: நடிகர் விஜயின் தமிழக வெற்றிக் கழகத்தின் உறுப்பினர் சேர்க்கை செயலி முடங்கியது.இன்று மாலை 5 மணிக்கு உறுப்பினர் சேர்க்கைக்கான செயலியை விஜய் அறிமுகம் செய்த நிலையில் அது முடங்கி உள்ளது.

தமிழகத்தை பொறுத்தவரை அரசியலுக்கும், திரைத்துறைக்கும் நெருங்கிய தொடர்பு உள்ளது. நடிகர், நடிகையாக ஜொலித்தவர்கள் கட்சி தொடங்கி முதல்வர் பதவி வரை எட்டிப்பிடித்துள்ளனர். இதற்கு எம்ஜிஆர், ஜெயலலிதா ஆகியோர் உதாரணம். நடிகர் விஜயகாந்த் தேமுதிக எனும் கட்சியை தொடங்கி எதிர்க்கட்சி தலைவர் வரை சென்றார்.

இதுதவிர சரத்குமார் சமத்துவ மக்கள் கட்சியை தொடங்கி எம்எல்ஏ ஆனார். மேலும் நடிகர் கமல்ஹாசன் மக்கள் நீதி மய்யத்தை தொடங்கி அரசியலில் ஈடுபட்டு வருகிறார். இவரது கட்சி இன்னும் அரசியலில் வெற்றியை பதிவு செய்யவில்லை. மேலும் பல நடிகர், நடிகைகள் பாஜக, காங்கிரஸ், திமுக, அதிமுகவில் இணைந்து செயல்பட்டு வருகின்றனர்.

அந்த வரிசையில் சமீபத்தில் இணைந்தவர் நடிகர் விஜய். தமிழக வெற்றிக் கழகம் என்ற பெயரில் புதிதாக கட்சியை தொடங்கினார். வரும் நாடாளுமன்ற தேர்தலில் போட்டியிடவில்லை என அறிவித்துள்ள விஜய் வரும் 2026 சட்டசபை தேர்தலில் களமிறங்க தயாராகி வருகிறார். மேலும் தற்போது கட்சியை பலப்படுத்தும் பணி மற்றும் 2 கோடி உறுப்பினர்களை கட்சியில் இணைக்கும் பணியை அவர் தொடங்கி உள்ளார்.

இந்நிலையில் தான் கட்சியில் உறுப்பினர்களை சேர்க்கும் வகையில் புதிய செயலி ஒன்றை இன்றைய தினம் நடிகர் விஜய் அறிமுகம் செய்தார். அதன்படி, இன்று மாலை 5 மணிக்கு நடிகர் விஜய் தனது கட்சியில் பொதுமக்கள் உறுப்பினராக சேர்வதற்கான இணையதள லிங்கை வெளியிட்டார். மேலும் கட்சியின் உறுப்பினராக சேர்ந்த விஜய் வீடியோ வாயிலாக கோரிக்கையையும் வைத்தார்.

மேலும் கட்சியில் உறுப்பினர் சேர்க்கை QR-Code இணைப்புகளைப் பயன்படுத்தி, மிகவும் எளிய முறையில் உறுப்பினர் அட்டையை உடனடியாகப் பெற்றுக்கொள்ள வசதி ஏற்படுத்தி கொடுக்கப்பட்டது. அதன்படி தமிழக வெற்றிக் கழகத்தில் உறுப்பினர்களாக இணைய கீழே குறிப்பிட்டுள்ள லிங்குகளையும் அவர் வெளியிட்டுள்ளார். அதன்படி

WhatsApp users - https://bit.ly/tvkhq

TelegramApp users - https://t.me/tvkvijaybot

WebApp users - https://bit.ly/tvkfamily

Send WhatsApp message as 'TVK' to 09444-00-5555

இந்த 3 லிங்க்குகள் மற்றும் செல்போன் எண்ணை பயன்படுத்தி பொதுமக்கள் அவரது கட்சியில் உறுப்பினராக சேர முடியும். இந்நிலையில் தான் ஒரே நேரத்தில் ஏராளாமனவர்கள் உறுப்பினராக சேர முயன்றனர். இதனால் தற்போது அனைத்து விஜய் கட்சியின் இணையதள செயலி முடங்கி உள்ளது. வாட்ஸ் அப், டெலிகிராம் என அனைத்து தளங்களும் முடங்கி உள்ளது. உறுப்பினராக இணைய முயற்சி செய்வோருக்கு ஒருமுறை பயன்படுத்தும் OTP செல்வதில் பிரச்சனை ஏற்பட்டுள்ளது. இதனால் விஜய் ரசிகர்கள் சோகத்தில் ஆழ்த்துள்ளனர். இதற்கிடையே தான் முடங்கிய செயலியை மீட்கும் பணி தீவிரமாக நடந்து வருகிறது.

English summary

Actor Vijay's Tamilaga Vettri Kazhagam's membership application is downed. Today at 5 pm, Vijay introduced the application for membership. All platforms such as WhatsApp and Telegram are down due to the large number of people trying to join the membership at the same time. The recovery process is going on.