நடிகர் ஹரி வைரவனுக்கு சிறுநீரக செயலிழப்புக்கு சிகிச்சை.. விரைவில் நடிக்க வைப்பதாக மனைவி நம்பிக்கை

Updated: Monday, September 26, 2022, 12:16 [IST]

Subscribe to Oneindia Tamil

சென்னை: வெண்ணிலா கபடி குழு நடிகர் ஹரி வைரவனுக்கு நிறைய பேர் உதவி செய்து வரும் நிலையில் அவரை சிகிச்சைக்காக மருத்துவமனையில் சேர்த்துள்ளார்கள்.

வெண்ணிலா கபடி குழு, நான் மகான் அல்ல உள்ளிட்ட படங்களில் நடித்த ஹரி வைரவனுக்கு இரு சிறுநீரகங்களும் செயலிழந்து, கை, கால், முகம் எல்லாம் வீங்கி நடக்கவே முடியாமல் அவதிப்பட்டு வருகிறார். இது குறித்து செய்திகள் வெளியாகின.

இந்த நிலையில் அவருடன் நடித்த நடிகர்களும் ரசிகர்களும் அவருக்கு உதவி செய்ய முன் வந்ததை அடுத்து அவர் மருத்துவமனையில் அனுமதிக்கப்பட்டு சிகிச்சை பெற்று வருகிறார்.

நடிகர் ஹரிவைரவன்

இதுகுறித்து நடிகர் ஹரி வைரவனின் மனைவி கவிதா தனியார் சேனலுக்கு அளித்த பேட்டியில், நடிகர் வைரவனை மருத்துவமனையில் சேர்த்துள்ளோம். அங்கு அவருக்கு சிறப்பான சிகிச்சை அளிக்கப்பட்டு வருகிறது. வைரவனின் நிலை குறித்து செய்திகளும் வீடியோக்களும் வெளியானதை அடுத்து உதவிகள் வந்து குவிகின்றன.

விஜய் சேதுபதி

விஜய் சேதுபதி, சூரி, விஷ்ணு விஷால் உள்ளிட்டோர் எங்களுக்கு பண உதவி செய்துள்ளார்கள். இது போக இலங்கை உள்ளிட்ட நாடுகளிலிருந்தும் எங்களை தொடர்பு கொண்டு உதவி செய்கிறார்கள். எனக்கு இப்போது புது நம்பிக்கையும் தெம்பும் பிறந்தது போல் உள்ளது.

வைரவனின் முகம், கை, கால்களில் வீக்கம்

வைரவனின் முகம், கை, கால்களில் உள்ள வீக்கத்தை முதலில் குறைப்பதாக மருத்துவர் கூறியுள்ளார். வைரவனை பழைய நிலைக்கு கொண்டு வர முடியும் என்றும் கூறியுள்ளார்கள். அவரை சினிமாவில் மீண்டும் நடிக்க வைப்பேன். அவருக்கு மருந்து, மாத்திரை எல்லாம் கிடையாது. மசாஜ், உடற்பயிற்சி உள்ளிட்டவை கொண்டு சிகிச்சை அளிக்கிறார்கள். இதனால் எந்த பக்க விளைவுகளும் இருக்காது என்பதால் இந்த சிகிச்சையை நாங்கள் தேர்வு செய்துள்ளோம்.

விரைவில் குணமடையும் வைரவன்

விரைவில் வைரவனை சரி செய்வோம் என மருத்துவர் கூறியுள்ளார். உடலில் உள்ள நீரை நீக்கிவிட்டு நரம்பு சம்பந்தப்பட்ட பிரச்சினைகளை சரி செய்வதாக கூறியுள்ளார்கள். முதலில் வைரவனை நடக்க வைக்க சிகிச்சை அளிக்கிறார்கள். இவையெல்லாம் சரி செய்துவிட்டாலே சிறுநீரகம் தானாக செயல்பட தொடங்கிவிடும். ஒரு மாதத்திற்கு மருத்துவமனையில் தங்க வேண்டும். அவர்கள் கொடுக்கும் உணவையே சாப்பிட வேண்டும்.

மருத்துவர் பரிந்துரைத்த உணவு

வீட்டுக்கு போன பிறகும் மருத்துவர் பரிந்துரைத்த உணவையே உட்கொள்ள வேண்டும் என கூறியுள்ளார்கள். எனவே எனது கணவரின் சிகிச்சைக்கு உதவிய அத்தனை நல்லுள்ளங்களுக்கும் நன்றி. எனது கணவர் நடிகர் என்பதால் அதற்கான பலன் வேகமாக கிடைக்கிறது. ஆனால் என் கணவரை போல் எத்தனையோ பேர் கஷ்டப்பட்டு வருகிறார்கள். அவர்களுக்கும் உதவிகளை செய்ய வேண்டும் என்ற கோரிக்கையை வைக்கிறேன் என்றார் கவிதா.