அண்மையில் தான் தற்கொலை காட்சியில் நடித்தாராம் நடிகை நந்தினி! நிஜத்திலும் உயிரை மாய்த்துக்கொண்ட சோகம்

சென்னை: தமிழ் சின்னத்திரை ரசிகர்களிடையே பிரபலமான 'கௌரி' சீரியல் நடிகை நந்தினி, பெங்களூரில் தனது உயிரை மாய்த்துக்கொண்ட சம்பவம் பெரும் அதிர்ச்சியை ஏற்படுத்தியுள்ளது. கடந்த சில நாட்களுக்கு முன் சென்னையில் நடந்த படப்பிடிப்பில், நடிகை நந்தினி, விஷம் குடித்து தற்கொலை செய்து கொள்ளும் காட்சியில் நடித்ததாக தகவல் வெளியாகியுள்ளது.

ஆந்திராவை பூர்வீகமாகக் கொண்ட நந்தினி, கன்னட சின்னத்திரை உலகில் தனது பயணத்தைத் தொடங்கினார். ஜீவ ஹூவாகிடே, சங்கர்ஷா, மதுமகளு மற்றும் நீனாதே நா உள்ளிட்ட பல பிரபலமான கன்னட தொலைக்காட்சித் தொடர்களில் துணை வேடங்களில் நடித்தார். தற்போது தமிழில் வெற்றிகரமாகத் தடம் பதித்து வந்த நிலையில், விபரீத முடிவை எடுத்துள்ளார்.

தமிழில் கலைஞர் டிவியில் ஒளிபரப்பாகும் 'கௌரி' சீரியலில் துர்கா மற்றும் கனகா என்கிற பெயகள் கொண்ட இரட்டை கதாபாத்திரங்களில் நடித்து வந்தார் நந்தினி. அவரது யதார்த்தமான நடிப்பால் குறுகிய காலத்திலேயே அதிக ரசிகர்களைப் பெற்றவர், திடீரென தற்கொலை செய்துகொண்டது அதிர்ச்சியை ஏற்படுத்தி உள்ளது.

நந்தினி நடித்து வந்த​​'கௌரி' நேற்று இரவு பெங்களுரில் தான் தங்கியிருந்த அறையில் தூக்கிட்டு தற்கொலை செய்து கொண்டுள்ளார். தற்கொலைக்கான காரணம் குறித்து பெங்களூர் போலீசார் வழக்குப் பதிவு செய்து தீவிர விசாரணை நடத்தி வருகின்றனர். வளர்ந்து வந்த இளம் நடிகை இப்படி தற்கொலை செய்துகொண்டது ரசிகர்களையும், சக கலைஞர்களையும் சோகத்தில் ஆழ்த்தியுள்ளது.

கௌரி சீரியலின் ஷூட்டிங் ஆரம்பத்தில் பெங்களூரில் நடந்து வந்த நிலையில், சமீபகாலமாக இந்த சீரியலின் ஷூட்டிங் சென்னைக்கு மாற்றப்பட்டுள்ளது. இதில், கடந்த சில நாட்களுக்கு முன் சென்னையில் நடந்த படப்பிடிப்பில், நடிகை நந்தினி விஷம் குடித்து தற்கொலை செய்து கொள்ளும் காட்சியில் நடித்துள்ளார். இந்நிலையில் தான் அவர் பெங்களுர் சென்றிருந்த நிலையில் அங்கு தூக்கிட்டு தற்கொலை செய்துகொண்டுள்ளார்.

சில நாட்களுக்கு முன்பு கூட இன்ஸ்டாகிராமில் மகிழ்ச்சியாக புகைப்படங்களை பதிவிட்டார் நந்தினி. அவரின் இந்த திடீர் மறைவை ரசிகர்களாலும், உடன் நடித்த சக நடிகர்களாலும் ஏற்றுக்கொள்ள முடியவில்லை. பலரும், தங்கள் வேதனையை சமூக வலைதளங்களில் பகிர்ந்து வருகின்றனர்.

அண்மையில், 'சிறகடிக்க ஆசை' சீரியல் நடிகை ராஜேஸ்வரி உயிரிழந்த சோகம் மறைவதற்குள், மற்றொரு இளம் சீரியல் நடிகை தற்கொலை முடிவை எடுத்திருப்பது சின்னத்திரை வட்டாரத்தை நிலைகுலையச் செய்துள்ளது. தற்கொலை செய்து கொண்ட நந்தினிக்கு இன்னும் திருமணம் ஆகவில்லை என்பது குறிப்பிடத்தக்கது.