உழைப்பாளர் தினத்தில் பிறந்து உழைப்பால் உயர்ந்தவர் அஜித் - பிறந்தநாள் வாழ்த்து கூறிய ஓ.பி.எஸ்.

Published: Saturday, April 30, 2022, 22:51 [IST]

Subscribe to Oneindia Tamil

சென்னை: உழைப்பின் மேன்மையை உலகிற்கு உணர்த்திய மே தின நாளன்று பிறந்து, உழைப்பால் உயர்ந்து, பல கோடி ரசிகர்களின் உள்ளங்களை கொள்ளை கொண்டவர் நடிகர் அஜித்குமார் என ட்விட்டரில் அதிமுக ஒருங்கிணைப்பாளர் ஓ.பன்னீர்செல்வம் பிறந்தநாள் வாழ்த்து தெரிவித்து உள்ளார்.

சிவாஜி - எம்.ஜி.ஆர்., ரஜினி - கமல் என்ற தமிழ் சினிமா நடிகர்களின் போட்டி இணை வரிசையில் அடுத்த தலைமுறையாக வந்ததுதான் அஜித் - விஜய் இணை. இருவருமே இன்று வரை பல கோடிக்கணக்கான ரசிகர்களை தன்னகத்தே கொண்டுள்ளனர்.

அந்த வகையில் அமராவதியில் அறிமுகமாகி பல வெற்றிப்படங்களை கொடுத்து ரசிகர்களை மகிழ்வித்து வலிமையுடன் 60 திரைப்படங்களை நிறைவு செய்த அஜித்குமார் நாளை மே 1 ஆம் தேதி தனது பிறந்தநாளை கொண்டாட உள்ளார்.

வாழ்த்து மழையில் அஜித்

1971 ஆம் மே 1 ஆம் தேதி பிறந்த நடிகர் அஜித்குமாரின் 51 வது பிறந்தநாளுக்கு ரசிகர்கள் தொடங்கி சினிமா, அரசியல் பிரபலங்கள் வரை பலரும் இப்போதே வாழ்த்துக்களை தெரிவிக்க தொடங்கி விட்டனர். குறிப்பாக அவரது ரசிகர்கள் வலிமையோடு பிறந்தநாளை கொண்டாட தயாராகி வருகின்றனர். சமூக வலைதளங்களில் இப்போதே அஜித்தின் திரையுலக சாதனை குறித்து தகவல்களை திரட்டி வெளியிட்டு வருகின்றனர்.

ரசிகர்கள் அமர்களம்

ஹேஷ்டேக்குகள், பேன் மேட் போஸ்டர்கள் என சமூக வலைதளங்களை அமர்களப்படுத்தி வருகிறார்கள் அஜித் ரசிகர்கள். அண்மையில் பெரும் எதிர்பார்ப்புகளுக்கு மத்தியில் வெளியான வலிமை திரைப்படம் போதிய வரவேற்பை பெறாவிட்டாலும் திரையரங்குகளுக்கு திரும்ப திரும்ப சென்று படத்தின் வசூலுக்கு பங்கம் வராமல் சாதனை படைக்க அஜித் ரசிகர்கள் பெரும் பங்காற்றி இருக்கின்றனர்.

நாளை அப்டேட் வெளியாகுமா?

நாளை தனது அஜித் பிறந்தநாளை முன்னிட்டு அவரது அடுத்தடுத்த திரைப்படங்கள் குறித்த அறிவிப்புகள் வெளியாகும் என எதிர்பார்க்கப்படுகிறது. குறிப்பாக நேர்கொண்ட பார்வை, வலிமையை தொடர்ந்து எச்.வினோத் இயக்கத்தில் அஜித்தின் 61 வது திரைப்படம் குறித்த அப்டேட் வெளியாகும் என ரசிகர்கள் எதிர்பார்க்கின்றனர்.

ரசிகர்கள் எதிர்பார்ப்பு

அஜித்தின் 62 வது படத்தில் இயக்குநர் விக்னேஷ் சிவனுடன் இணைய இருப்பதாக அதிகாரப்பூர்வ அறிவிப்பும் வெளியானது. 63 வது படத்தில் 4 வது முறையாக சிறுத்தை சிவாவுடன் இணைய உள்ளதாக தகவல் வெளியானது. இந்த திரைப்படங்கள் குறித்து ஏதேனும் தகவல் நாளை வெளியிடப்படலாம் என்றும் செய்திகள் வருகின்றன.

ஓ.பன்னீர்செல்வம் வாழ்த்து

இந்த நிலையில்தான், அதிமுக ஒருங்கிணைப்பாளரும் முன்னாள் முதலமைச்சருமான ஓ.பன்னீர்செல்வம் நடிகர் அஜித்துக்கு பிறந்தநாள் வாழ்த்து தெரிவித்துள்ளார். அவர் தனது ட்விட்டர் பதிவில், "உழைப்பின் மேன்மையை உலகிற்கு உணர்த்திய மே தின நாளன்று பிறந்து, உழைப்பால் உயர்ந்து, பல கோடி ரசிகர்களின் உள்ளங்களை கொள்ளை கொண்ட திரைப்பட நடிகர் திரு. அஜித்குமார் அவர்களுக்கு எனது இனிய பிறந்தநாள் நல்வாழ்த்துகள்!" எனக் குறிப்பிட்டு இருக்கிறார்.

Published On April 30, 2022