நம்பியவர்களை கழுத்தறுக்கிறார் Ops! தம்பியை நீக்கியதால் நீங்கள் நல்லவரா? விளாசும் பெங்களூர் புகழேந்தி

Updated: Saturday, March 5, 2022, 16:07 [IST]

Subscribe to Oneindia Tamil

சென்னை: தன்னை நம்பியவர்கள் அனைவரையும் ஓ.பி.எஸ். ஏமாற்றி கழுத்தறுப்பதாக அதிமுக முன்னாள் செய்தித் தொடர்பாளர் பெங்களூர் புகழேந்தி தெரிவித்திருக்கிறார்.

தம்பியை கட்சியை விட்டு நீக்கியதால் நீங்கள் ஒன்றும் நல்லவர் ஆகிவிட மாட்டீர்கள் என தனது வீடியோ பதிவில் ஓ.பன்னீர்செல்வத்தை வெளுத்து வாங்கியிருக்கிறார்.

மேலும், ஜெயக்குமாருக்கான மாவட்டம் தோறும் ஆர்ப்பாட்டம் நடத்திய அதிமுக முன்னாள் அமைச்சர்கள் ராஜேந்திரபாலாஜிக்கும், மணிகண்டனுக்கும் ஏன் நடத்தவில்லை என வினவியிருக்கிறார்.

வீடியோ பதிவு

சசிகலாவை சந்தித்த காரணத்துக்காக ஓ.ராஜாவை ஓ.பி.எஸ்., இ.பி.எஸ். நீக்கியது குறித்து அதிமுக முன்னாள் செய்தித் தொடர்பாளர் வீடியோ பதிவு ஒன்றை வெளியிட்டுள்ளார். ஓ.ராஜாவுக்கே இந்த நிலை என்றால் சையது கானின் நிலை என்னவாகும் என கேள்வி எழுப்பியிருக்கிறார். மேலும், சசிகலா விவகாரத்தை வைத்து விளையாட்டுச் செய்தியை போல் பேட்டிகள் கொடுக்கப்பட்டு வருவதாக சாடியிருக்கிறார்.

ஜெயக்குமாருக்கு மட்டும்

அதேபோல் ஜெயக்குமார் கைதுக்கு தமிழகம் முழுவதும் அதிமுக சார்பில் ஆர்ப்பாட்டங்கள் நடத்தப்பட்ட நிலையில், இதேபோல் முன்னாள் அமைச்சர்கள் ராஜேந்திரபாலாஜிக்கும், மணிகண்டனுக்கும் ஏன் அதிமுக ஆர்ப்பாட்டம் நடத்தவில்லை என கேள்வி எழுப்பியிருக்கிறார். ஓ.பி.எஸ். ஏன் தான் இப்படி இருக்கிறார் என தனக்கு புரியவில்லை என்றும் அவரை பற்றி மேலும் பேச ஒன்றுமில்லை எனவும் அவரை விமர்சித்துள்ளார். ஓ.பி.எஸ். தவறு மேல் தவறு செய்து வருவதாக சாடினார்.

நல்லவர் இல்லை

இன்று சொந்த தம்பியையே கட்சியை விட்டு நீக்கிவிட்டார் என்பதால் அவர் ஒன்றும் நல்லவர் ஆகிவிட முடியாது என்றும் தனது மதிப்பையும் தன் மீதான நம்பகத்தன்மையையும் ஓ.பி.எஸ். இழந்து வருவதாகவும் பெங்களூர் புகழேந்தி தெரிவித்திருக்கிறார். சசிகலாவை இணைக்கக்கோரி நேற்று ஓ.பி.எஸ்.ஸை சந்தித்தவர்களும் அச்சத்துடன் இருப்பதாகவும் அவரை நம்பி எதுவும் செய்ய முடியவில்லை எனவும் கூறியிருக்கிறார்.

கடும் விமர்சனம்

பெங்களூர் புகழேந்தியை போலவே அதிமுகவில் உள்ள பலரும் ஓ.பி.எஸ். மீதான தங்கள் அதிருப்தியை வெளிப்படுத்தத் தொடங்கியிருக்கின்றனர். இதனிடையே ஓ.ராஜாவை கட்சியில் இருந்து நீக்கிய விவகாரம் அதிமுகவில் மீண்டும் சலசலப்பை உருவாக்கியிருப்பது குறிப்பிடத்தக்கது.