அதிமுகவிலிருந்து விலகி விஜயின் தவெகவில் இணைந்தார் நிர்மல் குமார்! என்ன பதவி தெரியுமா?

Updated: Friday, January 31, 2025, 14:57 [IST]

Subscribe to Oneindia Tamil

சென்னை: அதிமுகவின் தகவல் தொழில்நுட்ப அணியின் இணைச் செயலாளராக இருந்த நிர்மல் குமார் (Nirmal Kumar), இன்றைய தினம் நடிகர் விஜய்யின் தமிழக வெற்றிக் கழகத்தில் (TVK) இணைந்தார்.

முன்னதாக, நிர்மல் குமாரின் ட்விட்டர் பக்கத்தில் அதிமுக பதவிகளையும், இரட்டை இலை சின்னத்தையும் நிர்மல் குமார் நீக்கியிருந்தார். இதனிடையே, விடுதலைச் சிறுத்தைகள் கட்சியில் இருந்து விலகிய ஆதவ் அர்ஜுனா பட்டினம்பாக்கத்தில் உள்ள விஜய் இல்லத்தில் சுமார் 40 நிமிடங்களுக்கு மேல் பேச்சுவார்த்தை நடத்தியிருந்தார். அவர் பனையூரில் அலுவலகத்திற்கு வந்து விஜய்யை சந்தித்து தவெகவில் இணைந்தார்.

ஆதவ் அர்ஜுனாவுக்கு கட்சியின் ஆலோசகர் அல்லது மாநில துணைப் பதவியும் தேர்தல் யுத்திகளை வகுக்கும் முக்கியமான பொறுப்பும் வழங்கப்படும் என சொல்லப்படுகிறது. அதே வேளையில் அவர் விஜய், புஸ்ஸி ஆனந்த் ஆகியோரின் கீழ் செயல்படுவார் என்றும் சொல்லப்படுகிறது.

இன்று 2ஆம் கட்ட மாவட்டச் செயலாளர்கள் குறித்த அறிவிப்புகள் வெளியாகிறது. இதில் விஜய் கலந்து கொண்டு நிர்வாகிகளை நியமிக்கிறார். அப்போது ஆதவ் அர்ஜுனாவின் நியமனம் அறிவிக்கப்படும் என தெரிகிறது.

அது போல் நிர்மல் குமார் பனையூரில் உள்ள தவெக அலுவலகத்திற்கு வருகை தந்தார். அவரை பொதுச் செயலாளர் புஸ்ஸி ஆனந்த் வரவேற்று அழைத்துச் சென்றார். பிறகு விஜய் பனையூர் அலுவலகத்திற்கு வந்ததும் அவரை சந்தித்து தவெகவில் நிர்மல் குமார் இணைந்தார். அவருக்கு தவெக துணை பொதுச் செயலாளர் பதவி கொடுக்கப்பட்டுள்ளது.

தமிழக பாஜக தகவல் தொழில்நுட்ப பிரிவு தலைவராக இருந்தவர் சிடிஆர் நிர்மல் குமார். இவர் அந்த கட்சியில் இருந்து விலகி கடந்த 2023 ஆம் ஆண்டு அதிமுகவில் இணைந்தார். நிர்மல் குமாரை பொருத்தவரை அவர் சிறந்த வியூக வகுப்பாளர். சமூகவலைதளங்களில் அரசுக்கு எதிராக முக்கிய பிரச்சினைகளை எழுப்புவார்.

அவர் தற்போது விஜய்யின் தமிழக வெற்றிக் கழகத்தில் நிர்மல் குமார் இணைவதால் அக்கட்சிக்கு வலுசேர்க்கும் என்றே சொல்லப்படுகிறது. மேலும் அதிமுகவில் இருந்து நீக்கப்படாத, ஒதுக்கப்படாத நிர்மல் குமார் தற்போது விஜய் கட்சியில் இணைவதால் அவருக்கு உரிய பதவியும் கிடைக்கும் என சொல்லப்படுகிறது. அதிமுகவிலிருந்து நிர்மல் குமார் எதற்காக விலகினார் என தெரியவில்லை.

ஆதவ் அர்ஜுனாவும் சிறந்த தேர்தல் வியூக வகுப்பாளர், அவர் மாநாடு உள்ளிட்டவைகளை சிறப்பாக நடத்துவதில் வல்லவர். இதை விடுதலைச் சிறுத்தைகள் கட்சியில் இருந்த போதே, அவர் நிரூபித்துவிட்டார். இவர்களை போல் ஏராளமான திறமையான இளைஞர்கள் தவெகவில் இணைவார்கள் என தெரிகிறது.