உள்ளாட்சி தேர்தல்: கூட்டணியிலிருந்து வெளியேறிய பாஜக.. வேட்பாளர்களை அறிவித்து அதிமுக அதிரடி

Updated: Monday, January 31, 2022, 16:21 [IST]

Subscribe to Oneindia Tamil

சென்னை: அதிமுக கூட்டணியிலிருந்து பாஜக வெளியேறிய நிலையில் மாநகராட்சி, நகராட்சி, பேரூராட்சிக்கான வேட்பாளர்கள் பட்டியலை அதிமுக அறிவித்தது.

தமிழகத்தில் உள்ள 21 மாநகராட்சிகள், 138 நகராட்சிகள், 490 பேரூராட்சிகள் என அனைத்து நகர்ப்புற உள்ளாட்சி அமைப்புகளுக்கும் வரும் பிப்ரவரி 19 ஆம் தேதி தேர்தல் நடத்தப்படுகிறது.

12,838 பதவியிடங்களுக்கான நகர்ப்புற உள்ளாட்சி பிரதிநிதிகள் நேரடி தேர்தல் மூலம் தேர்ந்தெடுக்கப்பட உள்ளனர். மொத்தம் 1,298 பதவியிடங்களுக்கு மார்ச் 4-ஆம் தேதி மறைமுகத் தேர்தல் நடைபெறும் என்று அறிவிக்கப்பட்டுள்ளது.

திமுக

இதற்காக அதிமுக, திமுக, பாமக, தேமுதிக, அமமுக, நாம் தமிழர், மக்கள் நீதி மய்யம் உள்ளிட்ட கட்சிகள் தனித்து போட்டியிடுகின்றன. இந்த நிலையில் அதிமுக- பாஜக இடையே இடப்பங்கீட்டு பிரச்சினையில் பேச்சுவார்த்தை நடத்தப்பட்டு வந்தது. எனினும் அதிக இடங்களை ஒதுக்க அதிமுக முன்வராததால் பாஜக கூட்டணியை முறித்து கொள்ள முடிவு செய்திருந்தது.

வேட்பாளர் பட்டியல்

அதற்கேற்ப நேற்றைய தினம் அதிமுக விழுப்புரம், கடலூர், தருமபுரி மாவட்டத்தில் அதிமுக வேட்பாளர்களின் பட்டியலை வெளியிட்டது. இதையடுத்து இன்றைய தினம் பாஜக நிர்வாகிகள் ஆலோசனை மேற்கொண்டனர். இதனிடையே அதிமுக இரண்டாவது கட்ட வேட்பாளர் பட்டியலையும் வெளியிட்டது.

8 பேரூராட்சிகள்

அந்த வகையில் ராணிப்பேட்டை மாவட்டத்தில் உள்ள 8 பேரூராட்சிகளில் போட்டியிடும் வேட்பாளர்களை அதிமுக அறிவித்துள்ளது. தக்கோலம், நெமிலி, பனப்பாக்கம், காவேரிப்பாக்கம், விளாப்பாக்கம், திமிரி, கலவை பேரூராட்சிகளுக்கு வேட்பாளர்கள் அறிவிக்கப்பட்டுள்ளார்கள்.

அதிமுக- பாஜக கூட்டணி முறிவு

தற்போது அதிமுகவுடனான கூட்டணியை பாஜக முறித்து கொள்வதாக அறிவித்துள்ளது. ஆனாலும் அதிமுக- பாஜக கூட்டணி தேசிய அளவில் தொடரும் என பாஜக கூறியுள்ளது. எனவே தேமுதிக, பாமகவை போல அதிமுக கூட்டணியிலிருந்து வெளியேறிய பாஜக நகர்ப்புற தேர்தலில் தனித்து போட்டியிடுகிறது.

அதிமுக- பாஜக கூட்டணி முறிவு

ராணிப்பேட்டை பேரூராட்சிக்கு மட்டும் வேட்பாளர்களை அதிமுக இன்றைய தினம் அறிவித்தது. ஆனால் அதிமுக கூட்டணியிலிருந்து பாஜக விலகியதை அடுத்து மாநகராட்சி, நகராட்சிகளுக்கான வேட்பாளர்களையும் அறிவித்துவிட்டது. சேலம், சிவகாசி, ஆவடி, திருச்சி, மதுரை, தூத்துக்குடி மாநகராட்சிகளுக்கு போட்டியிடும் அதிமுக வேட்பாளர்கள் பட்டியலை அதிமுக வெளியிட்டுள்ளது. அது போல் திருவண்ணாமலை, தேனி, சேலம், செங்கல்பட்டு, திருவள்ளூர், கிருஷ்ணகிரி, ஈரோடு, திருச்சி, நாகை, அரியலூர், மயிலாடுதுறை, மதுரை, விருதுநகர், சிவகங்கை, தூத்துக்குடி , குமரி ஆகிய நகராட்சிகளுக்கும் வேட்பாளர்களை அறிவித்துள்ளது. ஏற்கெனவே விழுப்புரம், கடலூர், தருமபுரி மாவட்ட நகராட்சிகளுக்கான வேட்பாளர் பட்டியல் நேற்று வெளியானது.