லண்டன் ஓவர்.. அடுத்து சுவிட்சர்லாந்து டிரிப் செல்லும் விஜய்.. எதுக்கு தெரியுமா?
சென்னை: தவெக ஆட்சியமைத்து 5 மாதங்கள் கடந்துவிட்டன. முதலமைச்சர் விஜயும், அதிகாரிகளும் ஏராளமான சர்ச்சைகளில் சிக்கி வருகிறார்கள். சட்டம் ஒழுங்கு பாதிப்பு, மின்வெட்டு, தொழில் முதலீடு சொதப்பல் என பல்வேறு பிரச்சனைகள் எழுந்து வருகின்றன. அண்மையில் விஜய் லண்டன் சென்று வந்தார். லண்டன் பயணம் வெற்றி என தவெக அரசு கூறினாலும் எதிர்க்கட்சிகள் அதை கடுமையாக விமர்சித்தன. இந்நிலையில் விஜய் விரைவில் சுவிட்சர்லாந்து செல்ல உள்ளதாக தகவல் வெளியாகியுள்ளது.
தமிழகத்திற்கு முதலீட்டை ஈர்ப்பதற்காக விஜய் 7 நாள் அரசு பயணமாக லண்டன் சென்றார். கடந்த செப்டம்பர் 10 ஆம் தேதி லண்டன் சென்றவர், நேற்று முன்தினம் சென்னை திரும்பினார். அவருடன் அமைச்சர் ஆதவ் அர்ஜுனா, தலைமை செயலாளர் உள்ளிட்ட அதிகாரிகள் லண்டன் சென்றனர். லண்டனில் ரூ.15,300 கோடிக்கு முதலீட்டுக்கான ஒப்பந்தம் போடப்பட்டதாக அரசு கூறியுள்ளது.
லண்டன் பயணம்
அதேநேரத்தில் விஜய்யின் லண்டன் பயணம் பல்வேறு சர்ச்சைகளையும் கிளப்பியது. நடிகர் அஜித்குமார் பங்கேற்ற கார் ரேஸ் போட்டியை தொடங்கி வைப்பதற்காக தான் விஜய் லண்டன் சென்றார். அங்கு அவர் போட்டோசூட் தான் செய்தார் என்று திமுக, அதிமுக, பாஜக, நாம் தமிழர் எதிர்க்கட்சிகள் கடுமையாக விமர்சனம் செய்து வருகிறார்கள். அந்த பரபரப்பு ஓய்வதற்குள் அடுத்த சர்ச்சை எழுந்துள்ளது.
முதலமைச்சர் விஜய் வருகிற ஜனவரி மாதம் சுவிட்சர்லாந்து செல்லவுள்ளதாக தகவல் வெளியாகியுள்ளது. டாவோஸ் நகரில் வருகிற ஜனவரி 18, 19, 20 ஆகிய 3 நாட்கள் உலக பொருளாதார மன்ற ஆண்டு கூட்டம் நடைபெறுகிறது. இதில் விஜய் கலந்துகொள்ளவுள்ளார். உலக பொருளாதாரமன்ற தலைவர் அலோஸிஸ் அந்த கூட்டத்தில் கலந்து கொள்ளுமாறு விஜய்க்கு அழைப்பு விடுத்தார். அதனடிப்படையில் விஜய் சுவிட்சர்லாந்து செல்லவுள்ளார். இதுகுறித்து அதிகாரபூர்வ அறிவிப்பு வெளியாகவில்லை.
அடுத்த டிரிப் சுவிட்சர்லாந்து
தமிழகத்திற்கு முதலீடு ஈர்ப்பது தொடர்பான நடவடிக்கையிலும் அவர் ஈடுபடுவார் என்று எதிர்பார்க்கப்படுகிறது. விஜயுடன் அமைச்சர்கள், தலைமை செயலாளர் உள்ளிட்ட அதிகாரிகள் சுவிட்சர்லாந்து செல்வார்கள் என்று தகவல் வெளியாகியுள்ளது. லண்டன் சென்று வந்த சர்ச்சையே ஓயாத நிலையில், ஜனவரியில் விஜய் சுவிட்சர்லாந்து செல்வதை திமுக, அதிமுக உள்ளிட்ட எதிர்க்கட்சிகள் கடுமையாக விமர்சித்து வருகின்றன.
Click it and Unblock the Notifications
Sign in with Google
