எம்ஜிஆருக்கு பின் புதிய சாதனை படைத்த விஜய்.. வரலாறு திரும்பியது! முதல் தேர்தலிலேயே ஆட்சி அரியணை

சென்னை: எம்ஜிஆருக்கு அடுத்தபடியாக தான் சந்தித்த முதல் தேர்தலிலேயே ஆட்சியை பிடித்த வரலாற்று சாதனையை படைத்துள்ளார் விஜய்.. தான் சந்தித்த முதல் தேர்தலிலேயே 108 தொகுதிகளில் வென்று 34.9% வாக்குகள் பெற்று வரலாறு படைத்து இருக்கிறார். கட்சி ஆரம்பித்த இரண்டு ஆண்டுகளில் இந்த சாதனையை படைத்து உள்ளார்.

தமிழக வெற்றிக் கழகம் கட்சியின் தலைவர் கட்சி தொடங்கி இரண்டே ஆண்டுகளில் முதல்வர் பதவியை எட்டிப்பிடித்து புதிய வரலாறு படைத்துள்ளார். தமிழக அரசியல் வரலாற்றில் கட்சி தொடங்கிய பின் நேரடியாக முதல்வராகும் வாய்ப்பை எம்.ஜி.ஆருக்கு பிறகு விஜய் பெற்றுள்ளார்.

ஆட்சியை பிடித்த எம்.ஜி.ஆர்

அதிமுக நிறுவனரான எம்.ஜி.ஆர் கட்சியை தொடங்கும் முன்பே நீண்ட காலமாக திமுகவில் பயணித்தவர். திமுகவில் பொருளாளராக இருந்த எம்.ஜி.ஆர், அக்கட்சியிலிருந்து பிரிந்து அதிமுகவை தொடங்கினார். 1977 சட்டசபை தேர்தலுக்கு முன்பாக நாடாளுமன்ற தொகுதிக்கான இடைத்தேர்தலில் வேட்பாளரை எம்.ஜி.ஆர் களமிறக்கினார்.

பின்னர் 1977 ஆம் ஆண்டு நடைபெற்ற சட்டசபை தேர்தலில் களம் கண்டார். பெரும் தொண்டர்கள் படையை வைத்து இருந்த எம்.ஜி.ஆர் இந்த தேர்தலில் வெற்றி பெற்று ஆட்சியை பிடித்தார். 1977 சட்டசபை தேர்தலில் வெற்றி பெற்று எம்.ஜி.ஆர் தமிழ்நாட்டின் முதல்வர் ஆனார். முதல் தேர்தலில் எம்.ஜி.ஆர் 30.4% வாக்குகள் பெற்றார்.

சிவாஜி முதல் கமல் வரை

அதன்பிறகு எம்.ஜி.ஆர் மறைவு வரை தொடர்ந்து 10 ஆண்டுகள் ஆட்சி செய்தார். தொடர்ந்து 3 சட்டசபை தேர்தலில் எம்.ஜி.ஆரின் அதிமுகவே வெற்றி பெற்றது. 1987 ஆம் ஆண்டு வரை முதல் அமைச்சராக இருந்தார். அவரது மறைவுக்கு பிறகு சிவாஜி, பாக்யராஜ், டி.ராஜேந்தர், விஜயகாந்த், கமல்ஹாசன் என எத்தனையோ நடிகர்கள் அரசியலுக்கு வந்தனர்.

அவர்களில் விஜயகாந்த் மட்டுமே, எம்.ஜி.ஆருக்கு பிறகு பெரும் தாக்கத்தை முதல் தேர்தலில்யே ஏற்படுத்தினார். இதற்கு பிறகு அரசியலுக்கு வருவதாக அறிவித்த ரஜினி, கொரோனா உள்ளிட்டவை காரணங்களால் முடிவில் இருந்து பின்வாங்கினார். 2021 தேர்தலில் முதல் தேர்தலை சந்தித்த கமல்ஹாசனும் தோல்வியையே சந்தித்தார்.

வரலாறு படைத்த விஜய்

இந்த சூழலில் தான் விஜய் பெரும் எதிர்பார்ப்புடன் கடந்த பிப்ரவரி மாதம் 2024 ஆம் ஆண்டு தமிழக வெற்றிக் கழகம் என்ற கட்சியை தொடங்கினார். நாடாளுமன்ற தேர்தலை சந்திக்காத விஜய், 2026 சட்டசபை தேர்தல் தான் முதல் இலக்கு என்று கூறினார். மேலும் அப்போதே திமுகவை அரசியல் எதிரியாகவும், பாஜகவை கொள்கை எதிரியாகவும் அறிவித்தார் விஜய்.

2026 தேர்தலில் களம் இறங்கிய விஜய் சந்தித்த முதல் தேர்தலிலேயே 108 தொகுதிகளில் வென்று வரலாறு படைத்தார். இத்தனைக்கும் தனியாக களமிறங்கி விஜய் இந்த சாதனையை படைத்தார். விஜய் முதல் தேர்தலிலேயே 34.9% வாக்குகள் சதவீதம் பெற்று வரலாற்று சாதனை படைத்தார்.

நாளை பதவியேற்கிறார்

வெறும் சினிமா பிரபலத்தை வைத்துக்கொண்டு அரசியலில் வெற்றி பெற முடியாது.. கூட்டம் ஓட்டாக மாறாது.. சினிமா பிரபலங்கள் என்றால் கூட்டம் வரத்தான் செய்யும் என முன் வந்த பல விமர்சனங்களையும் பொய்யாக்கி.. முதல் தேர்தலிலேயே வெற்றி வாகை சூடி.. முதல்வராக ஆட்சி பொறுப்பேற்கிறார் விஜய்.

English summary

After MGR, Vijay Creates Historic Record: Vijay has scripted political history by emerging victorious in his very first election, a feat widely compared to the achievement of M. G. Ramachandran. TVK reportedly won 108 seats and secured 34.9% vote share, marking a remarkable rise within just two years of the party’s launch.