அதிமுகவின் டெல்லி முகம்.. லோக்சபா துணை சபாநாயகர்.. 6 முறை எம்.பி.. யார் இந்த தம்பிதுரை?

Updated: Wednesday, March 4, 2026, 23:40 [IST]

Subscribe to Oneindia Tamil

சென்னை: அதிமுக சார்பில் ராஜ்யசபா வேட்பாளராக தம்பிதுரை தேர்வு செய்யப்பட்டுள்ளார். கிருஷ்ணகிரி மாவட்டத்தை சேர்ந்த தம்பிதுரை 6 முறை எம்பியாக இருந்துள்ளார். டெல்லியின் முகமாக பார்க்கப்படும் இந்த தம்பிதுரை லோக்சபா துணை சபாநாயகராகவும் இருந்துள்ளார்.

கிருஷ்ணகிரி மாவட்டத்தைச் சேர்ந்தவர் தம்பிதுரை. அதிமுகவில் தனது 18 வயதில் இணைந்த தம்பிதுரை அக்கட்சியின் டெல்லி முகமாக அறியப்படுகிறார். 1985 முதல் 1989 வரை நாடாளுமன்ற குழு துணைத் தலைவராகச் செயல்பட்டார்.

AIADMK Delhi Face Six-Time MP Thambidurai Nominated to Rajya Sabha

கரூர் தொகுதியில் போட்டியிட்டு

2009, 2014 தேர்தல்களில், அதிமுக கட்சியின் சார்பாக கரூரில் போட்டியிட்டு வென்றவர். அதிமுகவில் கொள்கைப் பரப்புச் செயலாளராகச் செயல்பட்டு வருகிறார். கரூர் தொகுதியில் இருந்து 4 முறை நாடாளுமன்ற உறுப்பினராக தேர்ந்தெடுக்கப்பட்ட தம்பிதுரை, லோக்சபா துணை சபாநாயகராகவும் இருந்துள்ளார்.

மத்திய இணை அமைச்சர் (சட்டம், கல்வி) என உயர்பதவிகளை வகித்தவர். எம்.ஜி.ஆர். காலத்தில் அரசியலில் இணைந்து, அதிமுகவின் மிக மூத்த தலைவர்களில் ஒருவராக உள்ளார். 1998 -1999 வரை அடல் பிஹாரி வாஜ்பாய் தலைமையிலான அமைச்சரவையில் மத்திய சட்டம், நீதி, கம்பெனி விவகாரங்கள் மற்றும் தரைவழிப் போக்குவரத்துத் துறை அமைச்சராகப் பணியாற்றினார்.

5 வது முறையாக தேர்வு

2019 லோக்சபா தேர்தலில் கரூர் தொகுதியில் போட்டியிட்டு தோல்வி அடைந்தார் தம்பிதுரை. இதையடுத்து ராஜ்யசபா எம்பியாக அறிவிக்கப்பட்டார். அவரது பதவிக்காலம் முடிவடைய உள்ள நிலையில், மீண்டும் 5 வது முறையாக அதிமுக ராஜ்யசபா வேட்பாளராக அறிவிக்கப்பட்டுள்ளார்.

சென்னையில் இன்று நடந்த அதிமுக மாவட்ட செயலாளர்கள் கூட்டத்தில் அதிமுக ராஜ்யசபா வேட்பாளராக தம்பிதுரை தேர்வு செய்யப்பட்டுள்ளார். இன்னொரு சீட்டினை கூட்டணி கட்சியில் உள்ள பாமகவுக்கு ஒதுக்கீடு செய்யப்பட்டுள்ளதாகவும் எடப்பாடி பழனிசாமி அறிவித்தார்.

அதிமுக பாஜக கூட்டணி

அதிமுக பாஜக கூட்டணி அமைந்துள்ள நிலையில் ஒரு சீட் அதிமுகவுக்கு என்றும், இன்னொரு சீட் கூட்டணிக்கு எனவும் ஏற்கனவே முடிவு செய்யப்பட்டு இருந்தது. இதில் தமிழ் மாநில காங்கிரஸ் தலைவர் ஜிகே வாசன் ராஜ்யசபா சீட் கேட்டிருந்த நிலையில் எடப்பாடி அன்புமணி பாமகவுக்கு வழங்க முன் வந்ததாக கூறப்படுகிறது.

இதன் அடிப்படையில் தான் பாமகவுக்கு மற்றொரு ராஜ்யசபா சீட் வழங்கப்பட்டு இருக்கிறது. பாமகவில் அன்புமணி ராமதாசே ராஜ்யசபா எம்பி வேட்பாளராக தேர்வு செய்யப்பட வாய்ப்பு இருக்கிறது.