செங்கோட்டையன் விஜய் பக்கம் செல்ல கூடாது.. சமாதானம் செய்ய.. தீவிரமாக காய் நகர்த்தும் அதிமுக தலைகள்
சென்னை: விஜயின் தவெக கட்சிக்கு செங்கோட்டையன் செல்ல போவதாக செய்திகள் வரும் நிலையில் செங்கோட்டையனை சமாதானம் செய்ய அதிமுகவில் ஒரு தரப்பினர் பேசி வருகிறார்களாம்.
அதிமுக மாஜி அமைச்சரான கே.ஏ. செங்கோட்டையன், சமீபத்தில் ஓ. பன்னீர்செல்வம் மற்றும் டி.டி.வி. தினகரன் ஆகியோருடன் இணைந்ததால், கட்சியில் இருந்து நீக்கப்பட்டார். இந்த நிலையில், அவர் நடிகர் விஜயின் கட்சியான தமிழக வெற்றிக் கழகத்தில் (TVK) சேரக்கூடும் என்ற ஊகங்களை கிளப்பியுள்ளது. மாஜி அமைச்சர் செங்கோட்டையன் மட்டுமன்றி பல முக்கிய தலைவர்கள் விஜயின் தமிழக வெற்றிக் கழகம் கட்சியில் இணைய ஆர்வம் காட்டி வருகிறார்களாம். இதற்காக விஜயுடன் அவர்கள் தீவிரமாக பேசி வருவதாக அரசியல் வட்டார தகவல்கள் தெரிவிக்கின்றன.
கே.ஏ. செங்கோட்டையன் - விஜயின் தமிழக வெற்றிக் கழகம்
அதிமுகவில் இருந்து நீக்கப்பட்ட முன்னாள் அமைச்சர் கே.ஏ. செங்கோட்டையன், நடிகர் விஜயின் தமிழக வெற்றிக் கழகத்தில் இணையவுள்ளதாகத் தகவல்கள் வெளியாகியுள்ளன. வரும் 26 அல்லது 27 ஆம் தேதிகளில் இந்த இணைப்பு நிகழ்வு நடக்கும் என எதிர்பார்க்கப்படுகிறது.
செங்கோட்டையன் போன்ற மூத்த அரசியல் தலைவர் TVK-வுடன் கைகோர்க்க முயல்வது அதிமுக தரப்பை அதிர்ச்சிக்கு உள்ளாக்கி உள்ளதாம். முன்னாள் அமைச்சர் கே.ஏ. செங்கோட்டையன், நடிகர் விஜய் தலைமையிலான தமிழக வெற்றிக் கழகத்தில் இணைவதைத் தடுக்கும் முயற்சியில் அதிமுகவின் மூத்த தலைவர்கள் ஈடுபட்டுள்ளனர். அவரது அரசியல் எதிர்காலம் பாதுகாப்பாக இருப்பதாகவும், கட்சியின் வளர்ச்சிக்கு அவரது அனுபவமும், ஆதரவும் தேவை எனவும் அவர்கள் வலியுறுத்தி வருகின்றனர். அவர் மீண்டும் அதிமுகவிற்குள் வர வழிகள் செய்யப்படும் என்றும் கூறப்பட்டு உள்ளதாம்.
அதிமுக செங்கோட்டையன்
உள்கட்சி வட்டாரங்களின்படி, இது தொடர்பாக பல சுற்றுப் பேச்சுவார்த்தைகள் ஏற்கனவே முடிந்துள்ளதாகவும், வரும் நாட்களில் மேலும் பல சந்திப்புகள் நடைபெற உள்ளதாகவும் தகவல்கள் தெரிவிக்கின்றன. செங்கோட்டையன் சமீபத்தில் அதிமுகவிலிருந்து நீக்கப்பட்டதால், அவரது ஆதரவாளர்கள் மத்தியில் பெரும் அதிர்ச்சி ஏற்பட்டது.
அப்போதிருந்து, அவரது அடுத்த அரசியல் நகர்வு குறித்த ஊகங்கள் அதிகரித்துள்ளன. தமிழக வெற்றிக் கழகத்தில் அவர் இணையக்கூடும் என்ற செய்திகள், அதிமுக தலைமைக்கு நெருக்கடியை ஏற்படுத்தியுள்ளன. செங்கோட்டையனின் விலகல், அதிருப்தியில் உள்ள மற்ற உறுப்பினர்களையும் அதே பாதையைப் பின்பற்றத் தூண்டும் என்று கட்சித் தலைவர்கள் அஞ்சுகின்றனர்.
அதிமுக தலைவர்கள் தங்கள் பேச்சுவார்த்தையின்போது, விரைவில் கட்சி பொதுச் செயலாளர் எடப்பாடி கே. பழனிசாமியை அணுகி செங்கோட்டையனை மீண்டும் கட்சியில் சேர்க்கக் கோருவதாக உறுதியளித்துள்ளனர். அவரை மீண்டும் கட்சிக்குள் கொண்டுவரவும், அவரது பதவியை மீட்டெடுக்கவும் தீவிர முயற்சிகள் மேற்கொள்ளப்படும் என்றும் அவர்கள் தெரிவித்துள்ளனர்.
பல ஆண்டுகளாகப் பணியாற்றிய ஒரு மூத்த தலைவரை இழக்க கட்சி விரும்பவில்லை என்பது இதன் மூலம் தெளிவாகிறது. செங்கோட்டையன் இரு வாய்ப்புகளையும் கவனமாக பரிசீலித்து வருவதாகவும் வட்டாரங்கள் தெரிவிக்கின்றன. ஒருபுறம், விஜய் தலைமையிலான வளர்ந்து வரும் தமிழக வெற்றிக் கழகத்தில் இணையும் வாய்ப்பு உள்ளது.
மறுபுறம், அதிமுக தலைவர்கள் அவருடன் இணைந்து அரசியல் பயணத்தைத் தொடர வற்புறுத்துகின்றனர். அரசியல் நோக்கர்கள் அடுத்த சில நாட்கள் முக்கியத்துவம் வாய்ந்ததாக இருக்கும் என்று நம்புகின்றனர். செங்கோட்டையனின் இறுதி முடிவு மற்ற தலைவர்களைப் பாதித்து, தமிழகத்தின் எதிர்கால அரசியல் கூட்டணிகளை வடிவமைக்கக்கூடும். இந்தச் சூழல் எவ்வாறு முடிவடையும் என்பதைக் கூர்ந்து கவனித்து வருகின்றனர்.
Click it and Unblock the Notifications
Sign in with Google