பெரிய அடி வாங்கிய அதிமுக.. 7 தொகுதிகளில் டெபாசிட் காலி! 3 தொகுதிகளில் 3வது இடம்.. அதிர்ந்த ர.ரக்கள்!
சென்னை: தமிழ்நாடு + புதுச்சேரியில் உள்ள 40 தொகுதிகளையும் திமுக கூட்டணி அள்ளிய நிலையில், அதிமுக பெரும் பின்னடைவைச் சந்தித்துள்ளது. 7 தொகுதிகளில் அதிமுக டெபாசிட் இழந்துள்ளது.
தமிழகம் மற்றும் புதுச்சேரியில் மொத்தமுள்ள 40 தொகுதிகளிலும் திமுக கூட்டணி அமோக வெற்றி பெற்று மொத்தமாக வாரி சுருட்டியது. அதிமுக மற்றும் பாஜக கூட்டணிகளுக்கு ஒரு இடம்கூட கிடைக்கவில்லை. இரு கட்சிகளுமே பல தொகுதிகளில் டெபாசிட் இழந்துள்ளன.
நாட்டின் 18வது நாடாளுமன்றத்துக்கான தேர்தல் கடந்த ஏப்ரல் 19 ஆம் தேதி முதல் ஜூன் கடந்த 1 ஆம் தேதி வரை 7 கட்டங்களாக நடந்து முடிந்தது. நாடு முழுவதும் 96 கோடிக்கும் அதிகமான வாக்காளர்களில், 64 கோடி பேர் வாக்களித்திருந்தனர். நாடு முழுவதும் பதிவான ஓட்டுகளை எண்ணும் பணி நேற்று காலை 8 மணிக்கு தொடங்கியது.
ஆரம்பம் முதலே திமுக கூட்டணி அதிக இடங்களில் முன்னணியில் உள்ளதாக தகவல்கள் வெளியாகியது. தமிழ்நாட்டில் மொத்தமுள்ள 39 தொகுதிகளிலும், புதுச்சேரியில் ஒரு தொகுதி என 40 தொகுதிகளிலும் திமுக மற்றும் கூட்டணி கட்சி வேட்பாளர்கள் வெற்றி பெற்றனர்.
தமிழகத்தில் திமுக போட்டியிட்ட 21 தொகுதி, காங்கிரஸ் 9, மார்க்சிஸ்ட் கம்யூனிஸ்ட் 2 தொகுதி, இந்திய கம்யூனிஸ்ட் 2 தொகுதி, விடுதலை சிறுத்தைகள் 2 தொகுதி, மதிமுக 1, கொங்குநாடு மக்கள் தேசிய கட்சி 1, இந்திய யூனியன் முஸ்லிம் லீக் 1 ஆகிய 39 தொகுதிகளிலும் வெற்றி பெற்றன. அதேபோன்று புதுச்சேரியில் காங்கிரஸ் போட்டியிட்ட ஒரு தொகுதியிலும் வெற்றி பெற்றது.
திமுக கூட்டணி 40 இடங்களிலும் வெற்றி பெற்ற நிலையில், அடுத்த இடத்தில் அதாவது 2வது இடத்திற்கு அதிமுக, பாஜக வேட்பாளர்கள் இடையே கடும் போட்டி நிலவியது. பிரதான எதிர்க்கட்சியான அதிமுக பின்தங்கி, பாஜக கூட்டணியில் போட்டியிட்ட பல தலைவர்கள் 2வது இடத்துக்கு வந்துள்ளனர். சில இடங்களில் அதிமுக 3வது இடத்துக்கு தள்ளப்பட்டது. மதுரை மக்களவைத் தொகுதியில் பாஜக வேட்பாளர் ராம சீனிவாசன் இரண்டாம் இடம் பிடித்து அதிமுகவை மூன்றாம் இடத்துக்குத் தள்ளி அந்தக் கட்சிக்கு அதிர்ச்சியை கொடுத்தார்.
கோவையில் கணபதி ராஜ்குமார் வெற்றி பெற்ற நிலையில், பாஜகவின் அண்ணாமலை இரண்டாம் இடம் பிடித்தார். அதிமுக வேட்பாளர் சிங்கை ராமச்சந்திரன் 3வது இடத்துக்கு தள்ளப்பட்டார். இதுபோன்று, 9 இடங்களில் அதிமுக வேட்பாளர்கள் மூன்றாம் இடத்துக்கு தள்ளப்பட்டனர்.
அதிமுக தமிழகத்தில் மட்டும் 32 இடங்களில் தனித்து போட்டியிட்டது. தேமுதிகவுக்கு 5 இடங்களும், புதிய தமிழகம் 1, எஸ்டிபிஐ 1 என 7 இடங்களை கூட்டணி கட்சிகளுக்கு ஒதுக்கியது. இதில் அதிமுக போட்டியிட்ட 32 இடங்களிலும் படுதோல்வி அடைந்துள்ளது. இதில் அதிமுக நெல்லை, கன்னியாகுமரி மற்றும் புதுச்சேரியில் 4வது இடத்திற்கும் தள்ளப்பட்டுள்ளது. விளவங்கோடு சட்டமன்ற இடைத்தேர்தலிலும் அதிமுக 4வது இடத்துக்கு தள்ளப்பட்டது.
40ல் மொத்தம் 10 தொகுதிகளில் டெபாசிட் இழந்தது அதிமுக கூட்டணி. தென் சென்னை, கன்னியாகுமரி, புதுச்சேரி, தேனி, தூத்துக்குடி, நெல்லை மற்றும் வேலூர் ஆகிய 7 தொகுதிகளில் அதிமுக டெபாசிட் இழந்துள்ளது. பிரதான எதிர்க்கட்சியான அதிமுக 7 லோக்சபா தொகுதிகளில் டெபாசிட் இழந்துள்ளது மிகப்பெரிய பின்னடைவாக பார்க்கப்படுகிறது.
Click it and Unblock the Notifications
Sign in with Google