அல்டிமேட் ஸ்டாரும் வேண்டாம்.. "தல" யும் வேண்டாம்.. ஏ.கே. கூட ஓகேதான்- நடிகர் அஜித் அறிக்கை
சென்னை: தல என்று என்னை யாரும் அழைக்க வேண்டாம். பெயர் சொல்லி அழைத்தாலே போதும் என நடிகர் அஜித் அறிக்கை வெளியிட்டுள்ளார்.
நடிகர் அஜித்குமாரை தனது அபார நடிப்பாற்றலால் ரசிகர்களிடையே அல்டிமேட் ஸ்டார், தல என அழைக்கப்பட்டு வந்தார். 2012 ஆம் ஆண்டு போர்ப்ஸ் பத்திரிகை வெளியிட்ட இந்தியாவின் புகழ்பெற்ற மனிதர்கள் பட்டியலில் அஜித்குமார் 61 ஆவது இடத்தை பிடித்திருந்தார்.
பின்னர் 2014 ஆம் ஆண்டு சற்று முன்னேறி போர்ப்ஸ் பத்திரிகையில் 51 ஆவது இடத்திற்கு வந்தார். கேட்பவர்களுக்கு உதவிகளை செய்து வருவார். ரசிகர்கள் குடும்பத்தை பார்க்க வேண்டும் என்றும் அறிவுறுத்துவார்.
நடிகர் அஜித் வீட்டின் முன்பு பெண் தீக்குளிக்க முயற்சி.. அஜித் மீது பரபரப்பு புகார்.. சென்னையில் ஷாக்
சொந்த வீடு
தனது வீட்டில் வேலை பார்ப்பவர்கள் அனைவருக்கும் வீடு கட்டி கொடுத்துள்ளார். இவர் பல்வேறு அரசியல் நிகழ்வுகளுடன் தொடர்புப்படுத்தப்பட்டாலும் தொடர்ந்து அரசியலில் இருந்து விலகியே இருந்து வருகிறார். தனது படத்திலும் அரசியல் வாடை அடிக்காமல் பார்த்துக் கொள்வார்.
ரசிகர் மன்றம்
ஏகோபித்த ரசிகர்களின் ஆதரவை பெற்ற அஜித், ரசிகர் மன்றத்தை கலைத்துவிட்டார். கடந்த 2011 ஆம் ஆண்டு தன்னை அல்டிமேட் ஸ்டார் அஜித் என ரசிகர்கள் அழைத்த போதும் அப்படி அழைக்க வேண்டாம் என அறிவித்தார்.தனது படங்களிலும் அல்டிமேட் ஸ்டார் என்ற பட்டம் வராமல் பார்த்து கொண்டார். ரசிகர் மன்றத்தை அவர் கலைத்த போதிலும் சமூகவலைதளங்களில் உள்ள ரசிகர்கள் கிளப் செய்யும் அலப்பறை வலிமை விவகாரத்தில் நன்றாக தெரிந்தது.
வலிமை அப்டேட்
அப்போதும் அவர் ரசிகர்களை அன்பாக கண்டித்தார். வலிமை அப்டேட் வரும் நேரத்தில் வரும் என்றார். அல்டிமேட் பட்டத்தை துறந்தது போல் இனி தல என அழைக்க வேண்டாம் என அஜித் தெரிவித்துள்ளார். நடிகர் அஜித் அறிக்கையை அவரது மக்கள் தொடர்பு அதிகாரி சுரேஷ் சந்திரா தனது ட்விட்டர் பக்கத்தில் கூறுகையில், பெரும் மரியாதைக்குரிய ஊடக பொது ஜன மற்றும் என் உண்மையான ரசிகர்களுக்கு, இனி வரும் காலங்களில் என்னை பற்றி எழுதும் போதோ, என் பெயரான அஜித் குமார் மற்றும் அஜித் என்றோ அல்லது ஏ.கே. என்றோ குறிப்பிட்டால் போதுமானது.
ஆரோக்கியம்
தல என்றோ வேறு ஏதாவது பட்ட பெயர்களையோ குறிப்பிட்டு அழைக்க வேண்டாம் என்று அன்போடு வேண்டுகோள் விடுக்கிறேன். உங்கள் அனைவரின் ஆரோக்கியம், உள்ள உவகை, வெற்றி, மன அமைதி, மன நிறைவு உள்ளிட்ட சகலமும் கிடைக்க வாழ்த்துகிறேன் , அன்புடன் அஜித்குமார்.