திருமாவளவனுக்கு தெரியும்.. சீட் கொடுக்காதது பற்றி உடைத்து பேசிய ஆளூர் ஷாநவாஸ்!

Updated: Wednesday, April 1, 2026, 13:30 [IST]

Subscribe to Oneindia Tamil

சென்னை: நாகப்பட்டினம் சட்டமன்ற தொகுதி விசிக எம்எல்ஏவான ஆளூர் ஷாநவாஸுக்கு இந்த முறை கட்சி தலைமை போட்டியிட வாய்ப்பளிக்கவில்லை. இது தொடர்பாக சோஷியல் மீடியாக்களில் விவாதங்கள் வெடித்த நிலையில், ஆளூர் ஷாநவாஸ் விளக்கமளித்துள்ளார்.

ஏன் இந்த முறை போட்டியிடவில்லை என்றும்? தனது நிலைப்பாடு என்ன என்பது குறித்தும் ஆளூர் ஷாநவாஸ் தற்போது வெளியிட்டிருக்கும் அறிவிக்கையில் விளக்கியிருக்கிறார்.

உடைத்து பேசிய ஷாநவாஸ்

அவர் வெளியிட்டிருக்கும் அறிக்கையில் தெரிவிக்கப்பட்டிருப்பதாவது, "2026 தமிழ்நாடு சட்டமன்றப் பொதுத் தேர்தலில், விசிக சார்பில் போட்டியிட எமக்கு மீண்டும் வாய்ப்பு அமையவில்லை என்பதை வைத்து வலைதளங்களில் பல்வேறு கருத்துக்களில் விவாதம் நடைபெற்றுக் கொண்டிருப்பதை அறிகிறேன்.

கட்சியின் முடிவு

இதில் என் மேல் அன்பு கொண்டு எனக்கு ஆதரவாக கருத்துப் பரிமாறிய அனைத்துத் தோழர்களுக்கும் என் நன்றியை உரித்தாக்குகிறேன்.

அதே நேரத்தில், ஒரு கட்சியில் யாருக்கு எப்போது எப்படி வாய்ப்பளிக்க வேண்டும் என்பது அந்தக் கட்சியின் தலைமை எடுக்கும் முடிவாகும். அம்முடிவு எதுவாயினும் அதை ஏற்றுக் கொள்வதே சிறந்த அறமாகும்.

அனைவரும் பாடுபடுவோம்

அந்த வகையில், 2026 சட்டமன்றத் தேர்தலில் தலைவர் எழுச்சித் தமிழர் உள்ளிட்ட 8 வேட்பாளர்களும் வெற்றி பெற்று சட்டப்பேரவையில் விசிகவின் குரல் வலுவாக ஒலிப்பதற்கும், நமது கூட்டணி சார்பில் களம் காணும் அனைவரும் வெல்வதற்கும், திமுக தலைமையிலான நல்லாட்சி மீண்டும் அமைவதற்கும் அனைவரும் ஒருங்கிணைந்து பாடுபடுவோம்.

வீரியத்துடன் செயல்படுவேன்

எனது பொது வாழ்க்கையில் நான் சட்டமன்ற உறுப்பினராக இருந்து பணியாற்றியதை விட, இன்னும் வீரியத்துடன் தொடர்ந்து அரசியல் களத்தில் பணியாற்றுவேன் என்பதையும் உறுதியுடன் தெரிவித்துக் கொள்கிறேன்" என கூறியிருக்கிறார்.