'அம்பேத்கர் சுடர் ' பிரகாஷ்ராஜுக்கு விசிக அளிக்கும் கவுரவம்! விசிக விருதுகள் 2024..முழு பட்டியல் இதோ

Updated: Monday, April 29, 2024, 14:08 [IST]

Subscribe to Oneindia Tamil

சென்னை: நடிப்பை தாண்டி சமூக நலன், அரசியல் என தொடர்ந்து பல தளங்களில் பயணித்து வரும் நடிகர் பிரகாஷ்ராஜுக்கு அம்பேத்கர் சுடர் விருது வழங்கப்படும் என விடுதலை சிறுத்தைகள் கட்சித் தலைவர் தொல்.திருமாவளவன் அறிவித்துள்ளார்

விடுதலைச் சிறுத்தைகள் கட்சியின் சார்பில் தமிழகம் மற்றும் இந்திய அளவில் ஆண்டுதோறும் பல்வேறு தளங்களில் சாதனைகள் படைத்த பிரபலங்கள், சமூக ஆர்வலர்கள், அரசியல் கட்சி தலைவர்களுக்கு விருதுகள் வழங்கப்படுகிறது.

Ambedkar sudar award announced to actor prakash raj by vck president thirumavalavan

சமூகம், அரசியல், பண்பாடு, கலை-இலக்கியம் போன்ற தளங்களில் சீரிய முறையில் தொண்டாற்றும் சிறப்புமிக்க தலைவர்கள் உள்ளிட்ட பல்வேறு ஆளுமை வாய்ந்த சான்றோருக்கு "அம்பேத்கர் சுடர், பெரியார் ஒளி, காமராசர் கதிர், அயோத்திதாசர் ஆதவன், காயிதேமில்லத் பிறை மற்றும் செம்மொழி ஞாயிறு " ஆகிய விருதுகளை 2007 முதல் ஆண்டுதோறும் வழங்கப்படுகிறது.

விசிக விருதுகள்: இதுவரை கலைஞர், முதல்வர் மு.க.ஸ்டாலின், கேரள முதலமைச்சர் பினராயி விஜயன், கர்நாடக முதலமைச்சர் சித்தராமையா, கி.வீரமணி, எழுத்தாளர் அருந்ததி ராய், து.ராஜா, குமரிஅனந்தன், தமிழ்நாடு காங்கிரஸ் முன்னாள் தலைவர் கே.எஸ்.அழகிரி, பேராசிரியர் ஜவாஹிருல்லா, ஏ.எஸ்.பொன்னம்மாள், கிருஷ்ணம்மாள் ஜெகந்நாதன் உள்ளிட்ட பலருக்கு விசிக-விருதுகள் வழங்கப்பட்டுள்ளன. இந்நிலையில் 2024 ஆம் ஆண்டுக்கான விசிக-விருதுகள் பெறுவோரின் பட்டியலை விசிக தலைவர் திருமாவளவன் வெளியிட்டுள்ளார்.

அம்பேத்கர் சுடர்: அதில்,” இந்த ஆண்டுக்கான "அம்பேத்கர் சுடர்" விருதினை திரைப்படக் கலைஞரும் மதச்சார்பின்மைக்காக சமரசமில்லாமல் போராடி வருபவருமான திரு. பிரகாஷ்ராஜ்-க்கும், பெரியார் ஒளி விருதினை திராவிடர் கழகத்தின் பிரச்சாரச் செயலாளர் வழக்கறிஞர் அருள்மொழி-க்கும் வழங்குவதாக அறிவிக்கப்பட்டுள்ளது. மேலும் மார்க்ஸ் மாமணி விருது இந்திய கம்யூனிஸ்ட் கட்சி மாநில செயலாளர் முத்தரசனுக்கும், காமராசர் கதிர் விருது பேராயர் எஸ்ரா சற்குணத்துக்கும் அறிவிக்கப்பட்டுள்ளது.

விருது பட்டியல்: இதேபோல் அயோத்திதாசர் ஆதவன் விருது பேராசிரியர் ராஜ கவுதமனுக்கும், காயிதே மில்லத் பிறை விருது மேனாள் மாநில தலைவர் சிக்கந்தருக்கும், செம்மொழி ஞாயிறு விருது கல்வெட்டியலாளர் சுப்பராயலுவுக்கும் அறிவிக்கப்பட்டுள்ளது. மேலும் இந்த விருது வழங்கும் விழா மே 25ஆம் தேதி சென்னையில் நடைபெறும் எனவும் அறிவிக்கப்பட்டுள்ளது.

பிரகாஷ்ராஜ்: பாஜக ஆட்சிக்கு வந்ததிலிருந்தே நடிகர் பிரகாஷ்ராஜ் பாஜகவுக்கு எதிராகவும் மதவெறிக்கு எதிராகவும் குரல் கொடுத்து வருகிறார். நடிப்பை தாண்டி சமூக நலம் சார்ந்த அரசியல் உள்ளிட்ட பல தளங்களில் பயணித்து வரும் அவர் சில இடங்களில் பாஜகவுக்கு எதிராக பிரச்சாரமும் மேற்கொண்டார். மேலும் தேர்தலில் மாற்றத்திற்காகவும் வெறுப்பிற்கு எதிராகவும் வாக்களித்ததாக கூறினார். கடந்த சில நாட்களுக்கு முன்பு பிரகாஷ்ராஜை விடுதலை சிறுத்தைகள் கட்சித் தலைவர் திருமாவளவன் நேரில் சந்தித்து பேசியது குறிப்பிடத்தக்கது.