அமோனியா கேஸ் கசிவால் 5 பெண்கள் பலி! நடந்தது என்ன? 110 விதியின் கீழ் அமைச்சர் விளக்கம்
சென்னை: திருவள்ளூர் மாவட்டம் கும்மிடிப்பூண்டியில் இறால் பதப்படுத்தும் ஆலையில் அமோனியா வாயு கசிவால் 5 பேர் பலியானதற்கு பைப் லைனில் ஏற்பட்ட கோளாறே காரணம் என தொழிலாளர் நலத் துறை அமைச்சர் பர்வேஸ் தெரிவித்துள்ளார்.
பெரியபாளையம் அருகே மஞ்சங்கரணையில் இறால் பதப்படுத்தும் தொழிற்சாலை செயல்பட்டு வருகிறது. இங்கு ஏராளமான தொழிலாளர்கள் பணியாற்றி வருகிறார்கள். அவர்கள் நேற்று வேலைக்கு வந்தனர். அப்போது திடீரென அமோனியா வாயுக் கசிவு ஏற்பட்டது.
இந்த கேஸை சுவாசித்த சிலருக்கு வாய், மூக்கில் ரத்தம் கசிந்து மயக்க நிலைக்கு சென்றனர். பலர் மூச்சுத்திணறலால் மயங்கினர். இதையடுத்து தகவல் அறிந்த சம்பவ இடத்திற்கு வந்த போலீஸாரும் தீயணைப்புத் துறையினரும் பாதிக்கப்பட்ட தொழிலாளர்களை மருத்துவமனைக்கு அனுப்பி வைத்தனர்.
இந்த விவகாரத்தில் 70-க்கும் மேற்பட்டோர் பாதிக்கப்பட்டனர். இதில் ஆபத்தான முறையில் சிகிச்சை பெற்ற 5 பெண்கள் சிகிச்சை பலனின்றி பலியாகிவிட்டனர். இறந்தவர்களுக்கு தலா ரூ 2 லட்சம் நிவாரணமாக வழங்கப்படும் என முதல்வர் விஜய் அறிவித்துள்ளார்.
இந்த நிலையில் 2 நாள் விடுப்புக்கு பிறகு இன்றைய தினம் சட்டசபை கூட்டத் தொடர் கூடியது. அப்போது அமோனியா கேஸ் கசிவு குறித்து அமைச்சர் பர்வேஸ் 110- விதியின் கீழ் விளக்கம் அளித்தார்.
ஆனால் அமைச்சர் பேசுவதற்கு முன்பு தாங்கள் பேச வேண்டும் என அதிமுக பொதுச் செயலாளர் எடப்பாடி பழனிசாமி தொடர்ந்து சபாநாயகருடன் வாக்குவாதம் செய்தார்.
இதைத் தொடர்ந்து அமைச்சர் பர்வேஸ் விளக்கம் அளித்தார். அதில் திருவள்ளூரை அடுத்த பெரியபாளையத்தில் உள்ள இறால் பதப்படுத்தும் ஆலையில் பைப் லைனில் இருந்த கோளாறால் அமோனியா வாயு கசிந்தது.
இதை சுவாசித்தவர்கள் மயங்கி விழுந்தனர். பாதிக்கப்பட்டவர்கள் மருத்துவமனையில் அனுமதிக்கப்பட்ட 5 பெண்கள் பலியானார். இந்த சம்பவம் குறித்து தகவலறிந்த முதல்வர் விஜய், மனவேதனை அடைந்தார்.
பாதிக்கப்பட்டவர்களின் குடும்பத்தினருக்கு ஆறுதல் தெரிவித்ததுடன் அவர்களின் குடும்பத்தினருக்கு தலா ரூ 2 லட்சம் நிதியுதவி வழங்கப்படுவதாக அறிவித்திருந்தார். மேலும் சம்பவம் குறித்து 3 நாட்களில் விளக்கம் அளிக்கப்படும். இனி வரும் நாட்களில் இது போன்ற சம்பவம் நடைபெறாத வண்ணம் ஆய்வுகள் தொடரும் என பர்வேஸ் தெரிவித்துள்ளார்.
Click it and Unblock the Notifications
Sign in with Google