இன்றுடன் முடியும் அன்பில் மகேஷ் நீதிமன்ற காவல்! சொந்த ஜாமீனில் விடுதலையா? மீண்டும் நீட்டிப்பா?
சென்னை: மாஜி அமைச்சர் அன்பில் மகேஷுக்கு இன்று ஜாமீன் கிடைக்குமா? அல்லது மீண்டும் நீதிமன்ற காவல் நீட்டிக்கப்படுமா? என்ற கேள்வி எழுந்துள்ளது.
கடந்த திமுக ஆட்சிக் காலத்தில் தனியார் பள்ளிகளுக்கு அங்கீகாரம் மற்றும் அனுமதி வழங்குவதற்காகப் பல கோடி ரூபாய் லஞ்சம் பெற்றதாக எழுந்த புகாரில், முன்னாள் பள்ளிக்கல்வித் துறை அமைச்சர் அன்பில் மகேஷ் பொய்யாமொழி கடந்த அக்டோபர் 26-ம் தேதி மத்திய குற்றப்பிரிவு போலீசாரால் கைது செய்யப்பட்டார். இந்த வழக்கில் அவரது நீதிமன்றக் காவல் இன்று நிறைவடைய உள்ள நிலையில், அவருக்கு என்ன மாதிரியான உத்தரவு பிறப்பிக்கப்படும் என்ற பெரும் எதிர்பார்ப்பு திமுக வட்டாரத்தில் எழுந்துள்ளது.

வழக்கின் பின்னணி என்ன?
தமிழ்நாடு தனியார் பள்ளிகள் சங்கங்களின் கூட்டமைப்பு செயலாளர் டி.சி. இளங்கோவன் அளித்த புகாரின் அடிப்படையில் இந்த வழக்குப் பதிவு செய்யப்பட்டது. தனியார் பள்ளிகளுக்கு நிரந்தர அங்கீகாரம் மற்றும் தரம் உயர்த்துவதற்கான அனுமதி வாங்கித் தருவதாகக் கூறி, கட்சி நிதி என்ற பெயரில் சுமார் 100 கோடி முதல் 400 கோடி ரூபாய் வரை வசூலிக்கப்பட்டதாகக் குற்றம் சாட்டப்பட்டது.
இந்த வழக்கில் ஏற்கனவே பி.டி. அரசகுமார் கைது செய்யப்பட்டிருந்த நிலையில், முத்துக்குமார் மற்றும் அவரது ஓட்டுநர் சரவணன் ஆகியோரும் நீதிமன்றத்தில் சரணடைந்தனர். வசூலிக்கப்பட்ட பணம் ஓட்டுநர் சரவணன் மூலம் முன்னாள் அமைச்சரின் வீட்டிற்குக் கொண்டு செல்லப்பட்டதற்கான வீடியோ ஆதாரங்கள் இருப்பதாகப் போலீசார் நீதிமன்றத்தில் தெரிவித்துள்ளனர்.
சிறைக் காவல் நீட்டிப்பும் இன்றைய நிலையும்
அக்டோபர் 26-ம் தேதி கைது செய்யப்பட்ட அன்பில் மகேஷ், சென்னையில் உள்ள ஊழல் தடுப்புச் சிறப்பு நீதிமன்றத்தில் ஆஜர்படுத்தப்பட்டார். அப்போது நீதிபதி அவரை நவம்பர் 6-ம் தேதி வரை நீதிமன்றக் காவலில் வைக்க உத்தரவிட்டார். அதனைத் தொடர்ந்து, நவம்பர் 2 முதல் 4-ம் தேதி வரை அவரை போலீஸ் காவலில் எடுத்து விசாரித்தனர். பின்னர், நவம்பர் 6-ம் தேதி வீடியோ கான்பரன்ஸ் மூலம் ஆஜர்படுத்தப்பட்டபோது, அவரது நீதிமன்றக் காவல் இன்று நவம்பர் 18 வரை நீட்டிக்கப்பட்டது.
ஜாமீன் மனுக்களின் நிலை என்ன?
இதற்கிடையில், அன்பில் மகேஷ் தரப்பில் தாக்கல் செய்யப்பட்ட ஜாமீன் மனுவைச் சென்னை ஊழல் தடுப்புச் சிறப்பு நீதிமன்றம் கடந்த நவம்பர் 10-ம் தேதி தள்ளுபடி செய்தது. விசாரணை ஆரம்பக் கட்டத்தில் இருப்பதாலும், முக்கியக் குற்றவாளிகள் சிலர் இன்னும் பிடிபடாமல் இருப்பதாலும் ஜாமீன் வழங்க முடியாது என நீதிபதி எல்.எஸ். சத்தியமூர்த்தி மறுத்துவிட்டார். இதனைத் தொடர்ந்து, சென்னை உயர்நீதிமன்றத்தில் அன்பில் மகேஷ் தரப்பில் புதிய ஜாமீன் மனு தாக்கல் செய்யப்பட்டது. இந்த மனு நேற்று (நவம்பர் 17) நீதிபதி வி. லட்சுமிநாராயணன் முன்பு விசாரணைக்கு வந்தது. அப்போது, போலீசார் தாக்கல் செய்த பதில் மனுவுக்குப் பதிலளிக்க அன்பில் மகேஷ் தரப்பு மூத்த வழக்கறிஞர் பி. வில்சன் கால அவகாசம் கேட்டதால், விசாரணையை வரும் நவம்பர் 24-ம் தேதிக்கு உயர்நீதிமன்றம் ஒத்திவைத்துள்ளது.
இன்று நீதிமன்றத்தில் நடக்கப்போவது என்ன?
இன்றுடன் நீதிமன்றக் காவல் முடிவடைவதால், புழல் சிறையில் அடைக்கப்பட்டுள்ள அன்பில் மகேஷ் இன்று மீண்டும் சென்னை ஊழல் தடுப்புச் சிறப்பு நீதிமன்ற நீதிபதி முன்பு ஆஜர்படுத்தப்பட உள்ளார். கடந்த முறையைப் போலவே இன்றும் அவர் புழல் சிறையில் இருந்தபடியே வீடியோ கான்பரன்ஸ் மூலம் ஆஜர்படுத்தப்பட வாய்ப்புள்ளது.
உயர்நீதிமன்றத்தில் ஜாமீன் மனு இன்னும் நிலுவையில் இருப்பதால், அவரைச் சொந்த ஜாமீனில் நீதிமன்றம் விடுவிக்க வாய்ப்பில்லை என்றே சட்ட வல்லுநர்கள் கூறுகின்றனர். மாறாக, வழக்கமான நடைமுறைப்படி அவரது நீதிமன்றக் காவலை நீதிபதி மேலும் சில நாட்களுக்கு நீட்டித்து உத்தரவிடுவார் என எதிர்பார்க்கப்படுகிறது. மேலும், இந்த வழக்கில் சரணடைந்த ஓட்டுநர் சரவணனும் போலீஸ் காவல் முடிந்து இன்று நீதிமன்றத்தில் ஆஜர்படுத்தப்பட உள்ளதால், இன்றைய நீதிமன்ற நடவடிக்கைகள் மிகுந்த முக்கியத்துவம் பெற்றுள்ளன.


Click it and Unblock the Notifications
