புகையிலை விளம்பரத்துக்கு நோ சொன்ன நடிகர் அல்லு அர்ஜுன்.. வாழ்த்தோடு அன்புமணி சொன்ன அட்வைஸ்!

சென்னை: மக்கள் நலனைக் கருத்தில் கொண்டு புகையிலை விளம்பரங்களில் நடிக்க தெலுங்கு நடிகர் அல்லு அர்ஜுன் மறுத்திருப்பது பாராட்டத்தக்கது என பாமக இளைஞரணி தலைவர் அன்புமணி ராமதாஸ் ட்விட்டர் பதிவிட்டுள்ளார்.

தெலுங்கு திரையுலகின் முன்னணி நடிகராக திகழ்பவர் அல்லு அர்ஜுன். இவர் நடிப்பில் கடந்த சில மாதங்களுக்கு முன்பு வெளியான புஷ்பா திரைப்படம் இந்தியா முழுவதும் பிளாக்பஸ்டர் ஹிட் ஆனது. அல்லு அர்ஜுன் தெலுங்கு மட்டுமின்றி இந்தியா முழுவதும் புகழ்பெற்ற பிரபலமாக உயர்ந்தார். இந்த நிலையில், புகையிலை விளம்பரத்தில் நடிக்க பெரும்தொகை ஒன்றை அவருக்கு வழங்க நிறுவனங்கள் முன்வந்ததாகவும் ஆனால், அதற்கு அவர் மறுப்பு தெரிவித்ததாகவும் செய்திகள் வெளியாகின.

இந்த நிலையில், அவரை பாராட்டி ட்விட்டரில் அன்புமணி ராமதாஸ் பதிவிட்டுள்ளார். அதில், "புகையிலை நிறுவனம் ஒன்றின் விளம்பரத்தில் நடிக்க பெருந்தொகையை ஊதியமாகத் தருவதாக ஆசை காட்டப்பட்ட போதிலும், சமூகக் கேடுகளை விளைவிக்கும் விளம்பரங்களில் நடிக்க மாட்டேன் என்று நடிகர் அல்லு அர்ஜுன் மறுத்திருப்பது வரவேற்கத்தக்கது.

புகையிலை நிறுவன விளம்பரங்களில் தாம் நடித்தால், அதன் மூலம் உந்தப்பட்டு தமது ரசிகர்கள் புகையிலைப் பழக்கத்திற்கு அடிமையாகக் கூடும் என்பதால் அவர் இந்த முடிவை எடுத்ததாக செய்திகள் வெளியாகியுள்ளன. அவரது சமூக அக்கறை பாராட்டத்தக்கது. நடிகர்கள் புகை பிடிக்கும் காட்சிகளில் நடித்தால், அதைப் பார்த்து ரசிகர்கள் புகையிலைக்கு அடிமையாவார்கள் என்பதால் தான் அத்தகைய காட்சிகளில் நடிப்பதை தவிர்க்கும்படி , மத்திய சுகாதாரத்துறை அமைச்சராக இருந்த போது முன்னணி நடிகர்களுக்கு கடிதம் எழுதினேன்.

புகையிலை நிறுவன விளம்பரத்தில் நடிக்க மறுத்த நடிகர் அல்லு அர்ஜுன் திரைப்படங்களிலும் புகைக்கும் காட்சிகளில் நடிப்பதை தவிர்க்க வேண்டும். அனைத்து நடிகர்களும் அவர்களின் ரசிகர்கள் உள்ளிட்ட மக்கள் நலன் கருதி புகைக்கும் காட்சிகளைத் தவிர்க்க வேண்டும்." என கேட்டுக்கொண்டார்.

English summary

Anbumani Ramadass wishes Allu arjun for rejecting tobacco ads: மக்கள் நலனைக் கருத்தில் கொண்டு புகையிலை விளம்பரங்களில் நடிக்க தெலுங்கு நடிகர் அல்லு அர்ஜுன் மறுத்திருப்பது பாராட்டத்தக்கது என பாமக இளைஞரணி தலைவர் அன்புமணி ராமதாஸ் ட்விட்டர் பதிவிட்டுள்ளார்.