கிராமங்களுக்கு போங்க! ஊர் தோறும் டூ வீலர் பேரணி நடத்துங்க! பாமகவினருக்கு அன்புமணியின் அன்புக்கட்டளை!
சென்னை: பாட்டாளி மக்கள் கட்சியினர் கிராமங்களுக்கு மக்களை தேடிச் செல்ல வேண்டும் என்றும் ஒன்றியம் தோறும் இரு சக்கர வாகன பேரணி நடத்த வேண்டும் எனவும் அக்கட்சியின் தலைவர் அன்புமணி ராமதாஸ் அன்புக்கட்டளை போட்டுள்ளார்.
நீங்கள் வேறு நான் வேறு அல்ல, நாம் அனைவரும் ஒன்றாக சேர்ந்து உழைப்போம் என கட்சியினருக்கு அன்புமணி அழைப்பு விடுத்துள்ளார்.
வழக்கமாக அறிக்கை வெளியிடும் அவர், இந்த முறை உருக்கமுடன் கடிதம் ஒன்றை எழுதி வெளியிட்டுள்ளார்.
அதன் விவரம் வருமாறு;
பாசமழை
பாட்டாளி மக்கள் கட்சியின் தலைவராக பொறுப்பேற்றுக் கொண்ட நான் உங்களின் பாச மழையில் நனைந்து கொண்டிருக்கிறேன். மருத்துவர் அய்யா அவர்களுக்கும் உங்களுக்கும் என் மனமார்ந்த நன்றிகளை தெரிவித்துக்கொள்கிறேன். என் மீது நீங்கள் கொண்டுள்ள அன்பு, பாசம், மரியாதை, நம்பிக்கை அனைத்துக்கும் நான் நன்றிக்கடன் பட்டுள்ளேன்.
உங்களில் ஒருவன்
பாட்டாளி மக்கள் கட்சியின் தலைவராக பொறுப்பு ஏற்றிருந்தாலும் என்னைப் பொருத்தவரை நான் உங்களில் ஒருவன் தான். பாட்டாளி மக்கள் கட்சியின் அடிமட்டத் தொண்டன் தான். 2026-&ஆம் ஆண்டில் தமிழகத்தில் பாட்டாளி மக்கள் கட்சி ஆட்சி அமைப்போம். அதற்காக ஓயாமல் உழைக்கும் மற்றொரு பாட்டாளி தான் நானும்.
பணிகள் ஏராளம்
மருத்துவர் அய்யா அவர்கள் தொடங்கி பாட்டாளி மக்கள் கட்சியின் கடைநிலைத் தொண்டன் வரை என் மீது வைத்திருக்கும் நம்பிக்கையை எண்ணிப் பார்க்கும் போது எனது பொறுப்புணர்வு கூடுகிறது. எனது கடமைகளும், பணிகளும் அதிகரிக்கின்றன. தமிழ்நாட்டு மக்களைக் காக்க மதுவிலக்கு, இளைஞர்களைக் காக்க போதை ஒழிப்பு, பெண்கள் பாதுகாப்பு, விவசாயிகளின் நலனுக்காக நீர் மேலாண்மை, வேளாண் வளர்ச்சி, நாட்டைக் காக்க சுற்றுச்சூழல் மற்றும் காலநிலை மாற்றத் தணிப்பு, மக்களின் நலனுக்காக கல்வி, சுகாதாரம், விவசாயம், அரசு நிர்வாக சீரமைப்பு, தொழிலாளர்கள் மற்றும் அரசு ஊழியர்களின் நலன், இளைஞர்களுக்கு வேலைவாய்ப்பு என நாம் ஆற்ற வேண்டிய பணிகள் ஏராளமாக உள்ளன.
பாமக 2.0
பா.ம.க. 2.0 என்ற புதிய செயல் திட்டத்தை தொடங்கி இருக்கிறோம். அதை வெற்றிகரமாக நடத்திக் காட்டுவோம். 2026-ல் பாட்டாளி மக்கள் கட்சி ஆட்சி நடக்கும். அதற்காக எல்லோருடனும் இணைந்து ஒற்றுமையாக அர்ப்பணிப்போடு செயலாற்றுவோம். பாட்டாளி மக்கள் கட்சியின் தலைவராக எனக்கும், நிர்வாகிகளாக உங்களுக்கும் மருத்துவர் அய்யா அவர்கள் அளித்திருக்கும் பணி ஒன்றுதான். "அந்த பணியை செய்து முடிப்பதற்காக இன்று முதல் நாம் அனைவரும் கைகோர்த்து உழைப்போம் வாருங்கள்" என்று பாட்டாளி சொந்தங்கள் அனைவரையும் அழைக்கிறேன். கட்சியில் நீங்கள் வேறு நான் வேறு அல்ல. நாம் அனைவரும் ஒன்றாக சேர்ந்து உழைப்போம்.
கிராமங்களுக்கு போங்க
நீங்கள் அனைவரும் நமது அய்யா அறிவுறுத்துவது போல மக்களைத் தேடி கிராமங்களுக்குச் செல்லுங்கள். ஒன்றியம் தோறும் இருசக்கர ஊர்திப் பேரணிகளை நடத்துங்கள். நீங்கள் அழைக்கும் ஒன்றியத்திற்கு மருத்துவர் அய்யா அவர்களும் வருவார், நானும் வரக் காத்திருக்கிறேன். நமது கொள்கைகளையும், இதுவரை பாட்டாளி மக்கள் கட்சி படைத்த சாதனைகளையும் மக்களிடம் எடுத்துக் கூறுவோம். தமிழ்நாட்டு மக்களின் நம்பிக்கையை முழுமையாகப் பெறுவோம். 2026&ஆம் ஆண்டில் மக்கள் நம்மை ஆட்சியில் அமர்த்துவர்.
நேர்மையான அரசியல்
நாற்பத்து மூன்று ஆண்டுகால பொது வாழ்க்கையில் ஈடுபட்டு இன்று வரை சமூக நீதிக்காக போராடும் மருத்துவர் அய்யா அவர்களுடைய லட்சியங்களை நிறைவேற்ற எழுச்சியுடன் பணியாற்றுவோம். இப்போது எனது எண்ணம் முழுவதும் நிறைந்திருப்பது நீங்களும், தமிழ்நாட்டு மக்களின் முன்னேற்றமும் தான். உங்களுடன் நான் இருக்கிறேன் உங்களை நான் வழி நடத்துகிறேன். நேர்மையான அரசியலை நடத்துவோம்.
இயக்கத்தின் நலன்
நான் எந்த முடிவு எடுத்தாலும் அது நமது கட்சி மற்றும் நமது தமிழகத்தின் நலன் சார்ந்தே இருக்கும். அதற்கு நீங்கள் உறுதுணையாக இருப்பீர்கள் என்று உறுதியாக நம்புகிறேன். அப்பொழுதுதான் நாம் நினைத்ததை சாதிக்க முடியும். வாருங்கள்! உழைப்பால் உயர்வோம்.
Click it and Unblock the Notifications
Sign in with Google